Read bassa 1 TIMOTI HIIŊ 3 Bible Online

1 TIMOTI HIIŊ 3 - bassa bible

1 TIMOTI HIIŊ 3

¹Tihiɛŋ tu ga tɛ shɛ tihiɛŋ tɛ tɛcara maa: Yaa shɛ bụtụ be elele ba jalakaka maa sha bishiyeni-be-eshe,[4] asha ba jalakaka ohwolu ugondu ubiye.

²Ibɛ po yaa shɛ tilɛɛ maa kede bishiyeni-be-eshe 'yaga unu-tusapa o, ga 'yaga biyikwo bu ko,[5] kede sha buswe bu mayaga o, ga 'yaga ahaŋsa tuhwungbɛ, ga sha bụtụ na masha mu bwa mi teni cɛŋ, ga sha bụtụ na bo mbiyono agaiŋ, keeni bụtụ na eri bo mbisogono atwa iyi.

³Kede ba sha buswe o, kede bu na nda abwagara o, ama ga bu na ima-isɛbwɛ, kede ba sha bu'weji o, ga sha bụtụ na lubi shi ukwuribi.

⁴I shɛ tilɛɛ maa ga sha bụtụ na eri ba 'yagaga ihwɛ ibwɛ tebiye. Ga miaụŋ mu bwa mu na muna atwa ụjɛrụma ni iyi elele hwɛɛ.

⁵Ama yaa shɛ bụtụ mepi shi gana na maa bu na untangana ihwɛ ibwɛ, asha gana naa bee eri ba untangana ya tu'ulwa-tụ-ụhiɛŋshɛ-Agwatanaa?

⁶Kede sha bụtụ na ahaŋsa te ci shi o, shibwonu bi zhɛ na mama sata nu unyangana tɛnda, nazhɛ ba laya nu n-ndumwa-tụwụma abana ni Ibiri.

⁷Ama i shɛ tilɛɛ maa ga atwa tupohondo le bu du tiseyida ti biye, shibwonu ɛ zhɛ na twagaga bụ, bɛɛ zhɛ kaa ba laya nu ugwuru Ibiri.

⁸Gobwonu du anjɛ-iyi, ga a shɛ atwa na 'yajɛ igɛhi, maa kede o no sheyingongo n-ndumwa ma aba o, kede a shɛ eswe-mayaga o, kede o no 'wonu iwɛ titeni to orugwusu o.

⁹Ama ga a shɛ atwa na a untangana iyi tusweci i rishe-tɛtɛtana na haŋsa tụrụmbɛɛ.

¹⁰Ama ge menji tugwo atwa gana ata hiiŋ, yaa shɛ aa zasa unu-tusapa, nazhɛ e leneni aŋ maa a shɛ anjɛ-iyi.

¹¹Gobwonu du ge eyikwo aba a shɛ atwa na 'yajɛ igɛhi,[6] kede a shɛ atwa na a nda izeci ya atwa ufwu o, ama ga a shɛ atwa na swe shi mayaga, ga a shɛ eyikwo tɛcara ni iyi elele.

¹²Ga anjɛ-iyi na 'yaga eyikwo oko oko, ga a shɛ atwa na a 'yagaga miaụŋ ma aba keeni atwa nhwaŋ ma aba tebiye.

¹³Anjɛ-iyi elele na a nda iyi tebiye, asha e meme gwushigeni ohwolu ebiye, keeni eshe-hwoo a'wụtụ ne rishe-tɛtɛtana ru na ru namɛ na amɛ Krast Jisus.

¹⁴Ma bu 'nyatanɛ ijɛ, okwo ti yaa namɛ na ahaŋsa mi maa i zha shɛ yo ilogogo ti Ngɛɛ zhɛ ma zhajɛ pụ bụ o.

¹⁵Ama iwɛ maa yaa shɛ Ngee ilegeji epe, iwɛ maa tuba mepi gana na shɛ tilɛɛ maa bụtụ na nda iyi nu umwono wa Agwatana na shɛ tu'ulwa-tụ-ụhiɛŋshɛ-Agwatana na shɛ buumwa, tu na kaa tɛ shɛ utukpa keeni ukoshilo iwɛ-tɛkana.

¹⁶I zasa ashamanjɛ o, maa iyi ụrụhwajɛ i tusweci eshe-tupatana Agwatana, i shɛ iyi ụrụhwajɛ i'wɛtwɛ. Ibɛ shɛ maa: Agwatana meme mbiseni[7] caakwụ na tu'waba[8] ta butugwumwa, n-ndumwa kaa mɛ zhɛmɛ bụ na Mpiala, atumwa-azuba kwụbɛ bụ, atwa enenji iwɛ ubwa na ashashɛ atwa na shɛ shɛ Eju, aa tɛtanɛ bụ kaa rishe nu unyizo, ee shepi bu na azuba nụ ụjɛrụma.