Read bassa 1 TIMOTI HIIŊ 4 Bible Online

1 TIMOTI HIIŊ 4 - bassa bible

1 TIMOTI HIIŊ 4

¹Ama Mpiala ba duma kpataa tebiye maa, na aka ɛmɛwɛɛ, atwa oko zhɛ a vwula a ganga rishe-tɛtɛtana, ɛ zhɛ na shɛlagana atwa na 'yajɛ mpiala mu tuhalakaka keeni imbisegeni ya atumwa-ibiri.

²Imbisegeni gɛnɛ ɛtɛ banɛ tedure na atwa tɛnda-te-eshe a na a dwatwaga ụzagwụ. O to bimbisegeni-ba-shɛmɛ sha aba i'nyɛtɛ gana maa nu ụshɛmbɛrɛ na vwi.

³A lakana atwa tụmbụla tɛnda, ɛɛ hiɛŋ maa iyimɛyɛ ike namba ahiɛ shɛ shɛ hia ya. Agwatana kaa karɛ iyimɛyɛ ɛtɛ maa ga atwa na tɛtanɛ-rishe, a na kaa mepi iwɛ-tɛkana na ya iŋ nu ugwoje tɛnda.

⁴Iyi elele nɛ kaa Agwatana karɛ zhɛmɛ, maa ga atwa na ya iŋ nu ugwoje tɛnda zawa tulakana.

⁵Agwatana kaa nduwa iŋ tijilo tedure nu n-ndumwa mu bwa keeni adua tɛnda.

⁶Yaa shɛ obo mbisogono miaụŋ-mo-bino ijɛ, asha bi zhɛ ba sha yɛu-ugondu ibiye Krast Jisus, asha bu mama nɛnga nu n-ndumwa me rishe-tɛtɛtana keeni imbisegeni ibiye nɛ abu 'wa.

⁷Ama na laka ashwa na a hashɛgana bụtụ keeni a na ụlagwụ. Ama no vwongongo ne eshe-tupatana Agwatana.

⁸Iwɛnɛ po tu'waba tuvwongicingo ti 'yajɛ ule cwɛŋbana, ama eshe-tupatana Agwatana 'yajɛ ule ni iyi elele, iwɛnɛ te e shileni iŋ unu na aka ga keeni aka na te e ci.

⁹Tihiɛŋ tu ga tɛ shɛ tihiɛŋ tɛ tɛcara, taa lanɛ kaa maa ga atwa kpaaŋ leshiji tu ta ulwa.

¹⁰Iwɛ ecilo ga ata nda tire,[9] ata shana du ikɛnyi, iwɛnɛ ata nda ashɛlatụ Agwatana na shɛ buumwa. Ubwa shɛ Bibicinji ba atwa kpaaŋ, ama inɛ ya atwa na tɛtanɛ-rishe uhwuri inɛ ya atwa vwɛ.

¹¹Pana-unu, no mbisogono ijɛ.

¹²Ta nda maa bụtụ be elele na bu ngbaraka cwɛŋ iwɛnɛ abu ta shɛ usemberi o, ama sha bimenji ba atwa na tɛtanɛ-rishe, nu n-ndumwa tụdụma, na masha, no tulubo, ne rishe-tɛtɛtana, na tụrụmbɛɛ.

¹³Okwo Ngee te ci shi, na pana ahaŋsa bụ nu utakada n-ndumwa ma Agwatana tɛrɛta na tukpataa, ni ikɛnyi tukaana atwa, keeni imbisegeni.

¹⁴Ta ganga uhwara tɛnda nu upwaŋ ata namɛ na amɛ bụ o, ubwa shɛ unaa na ee bi peni tedure ne tigesere tụdụma, aka na tu n-nyarɛ mi bi petengeni la i'ɛlɛ.[10]

¹⁵Na nda ijɛ ɛgbɛ ɛgbɛ, no shiyono ahaŋsa bụ hwɛɛ ni ibɛ, iwɛ maa ugombo bu tɛkaana bananɛ atwa elele caakwụ.

¹⁶Ama na nda pece iwɛ ikɛnyi bu keeni iyi nɛ obo mbisogono atwa. Na uranga iŋ tɛnda, ni inɛ gɛ tɛnda, ɛbi zhɛ bu momo bicingo, ta atwa na du kaa a hwuga iwɛ bụ.