Read bassa 1 TIMOTI HIIŊ 5 Bible Online

1 TIMOTI HIIŊ 5 - bassa bible

1 TIMOTI HIIŊ 5

¹Ta na tazhɛgana bụtụ na injɛ o, ama na kaana bụ ikɛnyi, gana na aa nda bishi. Na nda esemberi gana miaụŋ-mo-bino bu.

²Na nda n-ndaụŋ gana ono bu; na nda showo gana angwụfwụ bụ, na tụrụmbɛɛ hwɛɛ.

³Na pana olulo na shɛ olulo tukpororo ụjɛrụma.

⁴Ama yaa shɛ bululo be elele 'yajɛ miaụŋ kwo kaa ajalụ, asha ge e seshi hiiŋ maa e mbiseni igɛhi tijilo no ofwo atwa ihwɛ ya aba, maa kaa a tụpanɛ atwa na meci aŋ. Inɛ ɛtɛ ibɛ kwụlanɛ Agwatana.

⁵Ama biyikwo na shɛ bululo bu tukpororo, na kaa zasa bụtụ be elele, baa nda kaa ashɛlatụ Agwatana, baa uranga kaa tutabwa keeni adua tɛnda tụ ụjita tu uwaŋna maa Agwatana mbiyeni bu.

⁶Ama biyikwo na bo shiyono ahaŋsa ubwa ni iyi nɛ ya kwulangana bụ, bɛ shɛ ru'wo okwo tu baa ta ya uraiŋ.

⁷Na pana aŋ unu iwɛ iyi gɛnɛ gɛ iwɛ maa kede a 'yaga unu-tusapa o.

⁸Ama yaa shɛ bụtụ be elele peni shi atwa ubwa iyi nɛ ukekeshi ibɛ wa nda aŋ, a na kaa shɛ atwa umwamwa ubwa gbaa, asha bi teri ashamanjɛ rishe-tɛtɛtana, bee keeni kaa tụwụmangwụ uhwuri bụtụ na tɛtanɛ shɛ rishe.

⁹Bululo be elele na shiywa shɛ bwa shi te ci shi dupu-ne-eshe-umpwa, (60) kede e 'nyeci izeci ibwɛ nu utakada ata o. Shɛ inɛ ɛtɛ kiri o, ga sha biyikwo na cɛnɛ la bwolo bwa bu ko.[11]

¹⁰I shɛ kaa tilɛɛ maa e le bu tiseyida nu ugondu ubiye tɛnda, maa bu waŋnɛcɛngwa la miaụŋ, boo mbiywonuo la agaiŋ, boo loshigwo la atwa tijilo Agwatana ni ihwɛ ibwɛ,[12] boo loshogwo la atwa nụ ụbaụta, baa 'wawa la ugondu ubiye we elele tɛnda hwɛɛ.

¹¹Ama laka nzeci mo olulo na ta shɛ showo ti'nyata nu utakada ata. Iwɛnɛ po yaa shɛ aa mama njɛ eyikwo na ukwedeyi wa aba 'yajɛ ikɛnyi, asha a jala maa e meme jeji na Krast, asha a jala maa a tuna.

¹²Asha n-ndumwa mụ wụmɛ aŋ, iwɛnɛ te e genji rishe ra ba ri hiiŋ tɛtɛtana.

¹³E seshi sasana maa a shɛ aruna, oo rungo nu nhwaŋ. Shɛ aruna kiri aa shɛ o, ama a nda ta tuzwamɛ du, aa ima ugondu wa anya atwa u'ala ee genji una wa aba, a na duma iwɛ nɛ aa ga shɛ shɛ a na duma.

¹⁴Iwɛbɛ po yaa n kwụlanɛ maa go olulo na ta shɛ showo tunanana, maa e meci miaụŋ, maa a shɛ shɛgwuma-shɛ-nhwaŋ ma aba, iwɛ maa kede e peni bụtụ ata bi i'ime ohwolu maa bu na tu twagaga o.

¹⁵Iwɛnɛ po atwa oko jɛshɛrungwa, aa 'wawa Setan.

¹⁶Ama yaa shɛ butubwenyi kwo kaa biyikwo be elele[13] na tɛtanɛ-rishe 'yajɛ olulo, asha ga untangana aŋ, iwɛ maa kede tu'ulwa-tụ-ụhiɛŋshɛ-Agwangwama tu 'waŋna i'wɛŋnɛ ya aba o, semi ga shɛ i'wɛŋnɛ yo olulo na shɛ olulo tugom a na zasa bụtụ be elele.

¹⁷Na rɛta n-nyarɛ[14] mu na ma 'yagaga atwa tebiye maa a lanɛ nụ ụjɛrụma uyebi tumuna,[15] aba shɛ n-nyarɛ mu na ma nda ụbaụta ni i'enenji keeni imbisegeni gbaa.

¹⁸Iwɛ ya Agwatana hiɛŋ, To umpo ma unu buna na bo dubo ohiu o. Yaa dumananɛ, yɛɛ hiɛŋ, Bɛnjɛ-bu-ugondu lanɛ maa bu na lashɛga alubashɛ ubwa.

¹⁹Ta na tɛtana iwɛ ụshɛrɛya na bụtụ peteni iyɛri rishe o, semi ga 'yaga eseyida eyebi kwo kaa atatụ.

²⁰Na tazhɛgana atwa na a nda iwɛwɛ ne she atwa kpaaŋ, iwɛ maa gɛ inyɛsɛ shɛ du atwa vwɛ.

²¹Ma bu tɛtagana-unu tebiye tebiye ne eshe Agwatana, te eshe Krast Jisus, te eshe atumwa-azuba a na ee teri, maa na untangana ijɛ uzawa tumomo hwulo su. Ta na nda iyi elele na atwa tuzanga o.

²²Ta na patana bụtụ be elele i'ɛlɛ eshigiri o, ta na twa-ikpɛngwu ni iwɛwɛ ya anya atwa o. No momo shiyono eshe maa nama rụmbɛɛ.

²³Ta na swa ya meni mo ohondo, ama no zwono meni mụ tụ'walụ ta afwafwa cwɛŋ iwɛ amɛ ata ma bụ gwụma ɛgbɛɛ.

²⁴Iwɛwɛ ya atwa oko banɛ upeje, yee hwuleni aŋ umbe tutu ụshɛrɛya, ama iwɛwɛ ya anya atwa oko kaa zha shɛ ya gbatụ tubanɛ o.

²⁵Gobwonu du ugondu ubiye banɛ upeje, ama okwo una wa atwa na beni shi gana ata, e eri shi kaa a swaka uŋ o.