Read bassa 1 TIMOTI HIIŊ 6 Bible Online

1 TIMOTI HIIŊ 6 - bassa bible

1 TIMOTI HIIŊ 6

¹Ga atwa elele na shɛ ajama na pana shɛgwuma-shɛ-nhwaŋ ma aba ụjɛrụma na lanɛ na aba, iwɛ maa kede atwa na dumangana izeci ya Agwatana keeni imbisegeni tu n-ndumwa mụ wɛ o.

²Ajama na kaa shɛgwuma-shɛ-nhwaŋ ma aba shɛ tɛtanɛ-rishe, kede a na ngbaraka aŋ cwɛŋ, iwɛnɛ ta a shɛ ya miaụŋ-mo-bino ma aba o; ama ga shɛ nazhɛ nazhɛ aa kaana aŋ iyi tɛndana. Iwɛnɛ po atwa na tɛtanɛ-rishe, a na kaa shɛ atwa tulubo, aba zhɛ a lashɛga hwuŋ titeni ti iyi nɛ aa njɛ la. No mbisogono aŋ ijɛ, maa na kaana aŋ ikɛnyi.

³Yaa shɛ bụtụ be elele bo mbisogono imbisegeni inyɛ, bee leni shi kaa ni inɛ ya Agwangwama tu Jisus Krast nɛ shɛ inɛ tukpororo, keeni imbisegeni nɛ teni cɛŋ ne eshe-tupatana Agwatana.

⁴Asha bu mama sata tebiye, asha bi mepi shi kaa du iyi elele o. Ama bi 'yajɛ ukwulana na zasa kpororo, na kaa wa 'waŋnɛ iheŋtene, na ashamanjɛ, ni isɛbwɛngwɛ, nu uwuru, no tugbozhigo, na ahaŋsa awɛ tuhaŋsa,

⁵keeni ashamanjɛ na zasa uce, a na atwa na shihaŋsa sha aba shi teni ụdamụ, a zasa ya iwɛ-tɛkana elele, e heŋshi maa eshe-tupatana Agwatana 'yajɛ titeni. Na mama dashɛgana maa na ganga atwa gana ata.

⁶Ama eshe-tupatana Agwatana medenji maa ge iyi nɛ abi 'yajɛ na bu gwumwa, ibɛ shɛ titeni tụ 'wụtụ.

⁷Gana na ta atu 'waŋnɛ shɛ iyi elele te eti teni nu unyizo ga, gobwonu du ti eri shi ta 'waŋna[16] iyi elele tɛ ɛti zhɛ ụbanụ nu bwa o.

⁸Ama yaa shɛ ati 'yajɛ iyi nɛ maa tu na ya keeni iyi nɛ maa tu no urugono, gɛ inɛ ɛtɛ na tu gwumwa.

⁹Ama atwa na a jala maa a shɛ azhɛgba, a laya na tumanga, nu ugwuru, nu ukwedeyi ụwɛ ofwugwo, unaa na wa lagwụcɛnga bụtụ keeni unaa na wa ngba atwa. Ijɛ ye iricingo atwa na amɛ tugbazhɛgwa keeni ufwu tɛnda.

¹⁰Iwɛnɛ po ukwuribi na atwa o lubo, ibɛ shɛ tini ti iyi iwɛ ye elele hwɛɛ. Ibɛ kaa inzhɛnjɛ atwa oko na njɛ eshe-iyi ibɛ, ee genji ya rishe ra aba tɛtɛtana, aa mama hashagana ya shɛmɛ nụ ụngwụ ofwugwo tuhwuga.

¹¹Ama gabụ, oo a-bụtụ ba Agwatana, gozhigono ijɛ. Ama na 'wa tiririri, ne eshe-tupatana Agwatana, ne rishe-tɛtɛtana, no tulubo, ni isɛbwɛ-ti'ima, keeni timeme zucinje.

¹²Na twa ifelu ibiye iwɛ rishe-tɛtɛtana. Untangana iwɛ ɛtɛ uraiŋ unyizo-nom, inɛɛ nɛ aa bu suyanɛ iwɛ ibɛ, ebi le kaa tiseyida ti biye ne eshe eseyida ofwugwo.

¹³Ma bu tɛtagana-unu ne eshe Agwatana na ba pana iyi elele uraiŋ, ne eshe Krast Jisus du. Ubwa na le unu-tusweji ubiye tiseyida na agba Pontius Pɛilat.

¹⁴Na untangana unu-tupana, maa nama rụmbɛɛ uzawa unu-tusapa, uuwa i ci tubanɛ ta Agwangwama tu Jisus Krast.

¹⁵Inɛɛ nɛ ubwa na shɛ bụtụ bu ukpahiŋ kiri, na oo zhemonjino zhɛ bo mbisono hwuŋ na aka ikɛnyi ibwɛ. Ubwa shɛ Agwuma shɛgwuma na Agwangwama shɛgwangwama.

¹⁶Ubwa bwooko kiri eri shi bo 'wo kwukwuŋ, bu namɛ no ofwo uhioko-uhwaŋna na bụtụ be elele eri shi bo to. Ubwa shɛ bụtụ na bụtụ be elele eri shi ba kwụba. Ga ụjɛrụma keeni ukpahiŋ ụ shɛ una ubwa unyizo-nom. Ami.

¹⁷Na tɛtagana azhɛgba na namɛ na aka ga hwuwayɛ unu, maa kede o no momo mungicingo na shɛmɛ sha aba o, maa kede e peteni ashɛlatụ aba nu uduciya o, semi ga shɛ Agwatana na shɛ buumwa aa shɛlana, ubwa na ma tu pana uduciya we elele maa tu na hwuga-ụlatụ.

¹⁸Na tɛtagana aŋ unu maa a na nda iyi ibiye, maa a shɛ azhɛgba nu ugondu ubiye tɛnda, maa a na pana apwaŋ duwa duwa, maa o no dwotwogonu iyi nɛ aa 'yajɛ na anya aba.

¹⁹Inɛ ɛtɛ zhɛ yo shilono aŋ ukoshilo ubiye iwɛ aka na te e ci geri-be-eshe, iwɛ maa a untangana uraiŋ unyizo-nom.

²⁰Oo gabụ ge Timoti, na ima iyi nɛ ee bu utegeni u'ala. No gozhigono urokwoto na wa hashɛgana bụtụ keeni una tɛgadaga, keeni tusukakana tu na ɛɛ hiɛŋ iyi-tumapa, nɛ kaa shɛ izeci tukata.

²¹Ibɛ kaa i shɛ inɛɛ nɛ atwa oko a ananga, ibɛ po aa 'wanjɛ rishe-tɛtɛtana. Go tulubo-ti-biye tu nama na bụ.