Read bassa 2 TIMOTI YEBI 2 Bible Online

2 TIMOTI YEBI 2 - bassa bible

2 TIMOTI YEBI 2

¹Ibɛ po ɛ-yɛu mi, na 'yaga ukpahiŋ no tulubo-ti-biye tu na tu namɛ na amɛ Krast Jisus.

²Iyi nɛ abụ hwụjɛ nu unu mu ne eshe eseyida ofwugwo, no utogono iŋ atwa tɛcara, a na eri o mbisogono anya atwa du.

³Ima-isɛbwɛ maa no hioko ụbaụta, iwɛnɛ ta abɛ shɛ busaza Krast Jisus bi biye.

⁴I zasa bụtụ na ba nda tusaza na tɛ zhɛ momo umpongo nu ugondu unyizo ga, tu baa jala maa kwulana uhiu wa asaza na ge shiyeni bu na tusaza o.

⁵Yaa shɛ bụtụ ba nanga tụlagwụ tusumwa tugozhigo, a ta zha shɛ a pana bụ udara o, semi aka na tu baa ụrɛcɛnjɛ undwa na ee mengengeni bu.

⁶I shɛ tilɛɛ maa ga bufwashɛ na ba nda ugondu ụshɛjɛ iyimɛyɛ nɛ banɛ ne ehilo ubwa hiiŋ.

⁷Na haŋsa iwɛ iyi nɛ Ama duma tebiye, iwɛnɛ ta Agwangwama ubu pwonuo ti'eshicigo ti iyi elele.

⁸Ne teyinje Jisus Krast na ɛɛ hicinjɛ no tu'wo, na banɛ na bujalalo Devid, nu gana na ta Ama ananga Anabarɛ Ebiye mi.

⁹Iwɛ inɛ ɛtɛ Omo hioko ụbaụta uuwa i ci tukapa tu na ee n kepi nu umwono-tishi, gana bụtụ na ba nda ugondu ụwɛ; ama e kepi shi tuba n-ndumwa ma Agwatana o.

¹⁰Iwɛ ecilo ata, Ama ima-isɛbwɛ iyi elele iwɛ atwa na bee teri, maa e gwushiji du ubino na namɛ na amɛ Krast Jisus, nụ ụjɛrụma unyizo-nom.

¹¹Tihiɛŋ tu ga tɛ shɛ tihiɛŋ tɛ tɛcara. Yaa shɛ etu 'wi na Krast, ti zhɛ tu ma 'yaga du uraiŋ nu bwa.

¹²Yaa shɛ ata la-egiri, ti zhɛ du tu ma ya tugwama nu bwa. Yaa shɛ kaa ata tala ashamanjɛ ubwa, bi zhɛ du ba tala hwuŋ ashamanjɛ tu.

¹³Yaa shɛ atɛ shɛ shɛ atwa tɛcara, bɛ shɛ tuba bụtụ bɛ tɛcara. Bi eri shi kaa ba tala ashamanjɛ ikɛnyi ibwɛ o.

¹⁴Teyingeni aŋ iwɛ gɛ, tɛtagana aŋ unu tebiye ne eshe Agwangwama,[4] maa kede a na nda ashamanjɛ iwɛ n-ndumwa mu na mu zasa titeni te elele o, mu naa na mi zhɛ mo hwuŋzo atwa na a hwụga mụ.

¹⁵Nda gana na ebi eri maa meme mbiseni ne eshe Agwatana maa ma bu la tiseyida maa bi teni cɛŋ, maa shɛ bɛnjɛ-bu-ugondu na ezuye shɛ shɛ, na be sweji n-ndumwa mu tɛkana te teni cɛŋ.

¹⁶Ama no gozhigono urokwoto na wa hashɛgana bụtụ; iwɛnɛ ti yaa nda maa atwa na kaana tụdụlụma na Agwatana.

¹⁷N-ndumwa ma aba du ma yaga gana udobuu. Go Humɛnios keeni Filetos namɛ na ashashɛ aba.

¹⁸Atwa ata teni shi cɛŋ ni iwɛ-tɛkana o, ɛ hiɛŋ maa tihiɛ ta atwa na 'wi tu koshikwo, ibɛ po ee hwuŋzhi rishe-tɛtɛtana ra atwa oko.

¹⁹Ama okwo ti yaa shɛ gana ata, ukoshilo wa Agwatana na namɛ dimi shikeni ba, useyida ubwa hiɛŋ, Agwangwama mepi atwa ubwa, ga atwa elele na kaa du a suyana izeci ya Agwangwama no gozhigono orugwusu tɛnda.

²⁰Ama shɛ iyi-uhwugwa nɛ aa njɛ na azhɛnarɛya keeni azụrụfa kiri zweni ba nu umwono ata ụ'wụtụ o, ama iyi-uhwugwa nɛ aa njɛ nụ ụ'wụ'wụ, ti inɛɛ nɛ oo mo na cɛnjɛ-ti'wɛŋnɛ namba du. Inɛ ike i shɛ iwɛ ụjɛrụma, inɛ ike kaa shɛ shɛ iwɛ ụjɛrụma o.

²¹Yaa shɛ bụtụ be elele mama nda shɛshɛshɛ maa bana ni iyi gɛnɛ ɛtɛ, asha ubwa zhɛ ba sha iyi-uhwugwa iwɛ ụjɛrụma, inɛɛ nɛ i shɛ iyi tijilo, i 'yaganɛ Agwuma-ihwɛ ule, a imwangwa iŋ iwɛ ugondu ubiye we elele.

²²Ama no gozhigono ukwedeyi ụwɛ u tisemberi; ama na 'wa tiririri, ne rishe-tɛtɛtana, no tulubo, keeni amɛ-olom na atwa na a suyana Agwangwama na amɛ tụrụmbɛɛ.

²³Ama na laka shɛshamanjɛ shɛ tusashɛ; gabụ du bi mepi maa shɛshamanjɛ shɛ gana ata sha bila uwuru.

²⁴Yɛu-ugondu ya Agwangwama kaa i shɛ shɛ bu no 'wogo uwuru kwukwuŋ o, semi ga sha bụtụ na mepeni atwa kpaaŋ iwɛ, na eri bo mbisogono atwa iyi, na eri ba ima-isɛbwɛ na aka na ta a njɛ bu iyi iwɛ.

²⁵Ga shɛ ne timeme zucinje boo vwulo atwa na a sukakana bụ. Nekeshi Agwatana a pana aŋ ahaŋsa-tɛjɛshɛrɛga maa e mepi iwɛ-tɛkana.

²⁶Ga shihaŋsa sha aba shɛ nama ngbɛrɛ maa a na nda iyi nɛ kwụlanɛ Agwatana,[5] maa e benengeni ugwuru Ibiri na baa ga 'imɛ aŋ la maa a na hwuga-unu ubwa.