Read bassa TAITOS 3 Bible Online

TAITOS 3 - bassa bible

TAITOS 3

¹Teyingeni aŋ maa go no momo tulonono ụhwada we ehiu atwa na namɛ no shihwolu. Ga a na hwuga-unu wa aba, maa a mama 'imɛ nu ugondu ubiye we elele tɛnda.

²Kede a na dumangana bụtụ be elele iyi iwɛ o, maa a shɛ atwa na zasa uwuru, ama ga a shɛ atwa na a ima-isɛbwɛ, maa o no mbisono timeme zucinje ni iyi nɛ aa nda na atwa kpaaŋ.

³Tu lagwụmɛ la du aka oko, tụ hwụjɛ shɛ la du unu o. A tɛ inzhɛnjɛ la, atɛ ndanɛ la ukwedeyi ụwɛ gɛnɛgɛnɛ iyi keeni iyi nɛ ma tu kwulangana. Ti 'yajɛ la shɛmiaụŋ keeni isɛbwɛngwɛ, tɛ shɛ la atwa ukwara, o tu imo la, otu momo imonu la du.

⁴Ama aka na ti iwɛ-tumapa ya Agwatana na shɛ Bibicinji tu keeni tulubo tu na bee lubi atwa, tu banɛ caakwụ,

⁵ibɛ po bee ti bicinji; shɛ nu ugondu tu tɛnda kwo kaa ne tiririri tu na atɛ njɛ o, semi tedure ni inyɛmɛnyɛmɛ ibwɛ bee ti bicinji, na tɛnyashɛnga ta tumatanana keeni tɛnda tu ufwo tu na Mpiala mi Tijilo mɛ tɛ njɛ.

⁶Ubwa shɛ Mpiala mi Tijilo mu na bee tu dudugeni tebiye tedure ne Jisus Krast Bibicinji tu,

⁷iwɛ maa gana na ti bee ti peni n-ndumwa-zhɛ tedure no tulubo tu bwa ti biye, ti zhɛ ta sha ya ayɛ-ogwu te teni cɛŋ na ashɛlatụ uraiŋ unyizo-nom na ata nda.

⁸Tihiɛŋ tu ga tɛ shɛ tihiɛŋ tɛ tɛcara, i n kwụlanɛ kaa maa na duma mu kpeke, maa atwa na tɛtanɛ Agwatana rishe no momo sho nu ugondu ubiye tɛnda. Inɛ ɛtɛ zhɛmɛ, yaa 'yaganɛ kaa atwa ule.

⁹Ama no gozhigono shɛshamanjɛ shɛ tusashɛ, na n-ndumwa ma alamụ, keeni uwuru keeni ifelu iwɛ Undwa, iwɛnɛ ti yaa zasa ule, i shɛ kaa iyi tɛgadaga.

¹⁰Yaa shɛ ebu vwuri bụtụ na ba karɛ tubogwu na aka ihiiŋ, ebu vwuri sasana na aka yebi, nazhɛ laka bu ya.

¹¹Gana na ebi mepi maa bụtụ gana ata vwụrɛ nụ ụzalụ, asha ubwa du meme peni n-ndumwa-tụwụma ni iwɛwɛ nɛ baa nda.

¹²Aka elele na Ngaa tumwanɛ Atɛmas, kwo kaa ga Taikikos pụ bụ, asha nda gana na ebi eri maa zhajɛ pi mi ni Nikopolis. Apata Ngee heŋshi maa N zhɛ ma gɛga na aka ushwo.

¹³Nda gana na ebi eri maa mbiyeni Zɛnas bụtụ ata bu undwa keeni Apụlụs, na tahaŋnụ ta aba, iwɛ maa kede iyi elele 'nyananɛ aŋ o.

¹⁴Ama ga atwa tu no soso maa e shiyeni ahaŋsa aba nu ugondu ubiye tɛnda, iwɛ maa a na ala mbiyono atwa na ukekeshi wa nda, iwɛ maa kede a vwụnjɛ titeni o.

¹⁵Atwa elele na namɛ ne mi epe ma bụ 'walụ. 'Walụ atwa na mo tu lubo tedure ne rishe-tɛtɛtana. Go tulubo-ti-biye tu nama ne hiŋ hwɛɛ.