Read bassa EHIBRU 1 Bible Online

EHIBRU 1 - bassa bible

EHIBRU 1

¹Na aka cala, Agwatana jɛmɛ la n-ndumwa no ogwunukwoshi tu, ni ihwɛŋnɛ ifwugwo keeni na aka ofwugwo tedure ne egesere.

²Ama na aka ga ɛmɛwɛɛ, bɛ jɛmɛ ya n-ndumwa no tu tedure ni Yɛu ibwɛ nɛ bee teri maa sha bɛyɛ-bo-ogwu bi iyi elele, tedure nu bwa kaa du baa njɛ unyizo kpaaŋ.

³Yɛu ɛtɛ, tedure nu ubwa kaa atu kwụbɛ ụjɛrụma wa Agwatana, ubwa kaa shɛ ụsụbwa wa Agwatana gom gom, nu ukpahiŋ n-ndumwa mu bwa kaa baa untanganɛ iyi elele. Aka na tu baa njɛ iyi nɛ nyashɛnjɛ iwɛwɛ tu shɛshɛshɛ ni ikɛnyi ibwɛ, baa jɛjɛ ya nu u'ala ubiye[1] igɛhi i'wɛtwɛ na azuba.

⁴Gana na tu baa zhɛmɛ bee hwuri atumwa-azuba, ibɛ po oo po bu du izeci nɛ uhwuri inɛ ya aba.

⁵Iwɛnɛ ti yaa ta zasa butumwa-ba-azuba na Agwatana hiwaŋ bụ kwukwuŋ, Gabụ bɛ shɛ yɛu mi; hwayɛ ga Ngee bi meci. Sasana maa, N zhɛ ma sha Bishi bwa, nazhɛ bɛɛ zhɛ ba sha yɛu mi.

⁶Sasana aka na ta Agwatana tecinje tumata ti Yɛu ibwɛ nu unyizo ga hiiŋ, bɛɛ hiɛŋ, Ga atumwa Agwatana a na namɛ na azuba kwuzono bu hwɛɛ, maa a zhɛbɛ bụ.

⁷Bɛ jɛmɛ iwɛ atumwa-azuba, bɛɛ hiɛŋ, Ubwa ba nda atumwa ubwa azuba maa a shɛ mpiala mu uvwugo, baa nda tuba miaụŋ-mu-ugondu ubwa maa mɛ shɛ irɛtu ulwa.

⁸Baa jɛmɛ iwɛ yɛu ɛtɛ, bɛɛ hiɛŋ, Oo Agwatana, gɛ idwɛtwɛ tugwama tụ[2] bụ nama unyizo-nom, go bukwuto ba Cɛnjɛ-ta-tugwama tụ bụ[3] bɛ shɛ bukwuto bi tishiriri.

⁹Bu lubi tiririri, ebi imi iyi iwɛ; ibɛ po Agwatana na shɛ Agwatana bụ ubu dudugwonuo manɛbɛ mu unyasa ụ'wụtụ, uhwuri atwa na a twa-ikpɛngwu na bụ.

¹⁰Baa hiaaŋnanɛ, Oo Gabụ Agwangwama, Gabụ bi shiri ukoshilo unyizo taa nu umozhigo, Gabụ kaa bɛ njɛ azuba ni i'ɛlɛ bu.

¹¹Ɛ zhɛ kaa a inanga eshe, ama bu namɛ gana na abu namɛ tutuu. Ɛ zhɛ a inga hwɛɛ aba gana na utogwo wa inga.

¹²Gabụ kaa bi zhɛ bo kwungwulo aŋ gana na oo kwungwulo upaga. Gabụ bi zhɛ bu no sheyingongo aŋ gana na oo sheyingongo utogwo.[4] Ama inɛɛ bu i shɛ bu namɛ gana na abu namɛ, shiywa shɛ uraiŋ bụ shɛ zasa uce o.

¹³Ama butumwa-ba-azuba bu na naa baa hiwaŋ na ashashɛ aba kwukwuŋ maa, Gɛga nu u'ala ubiye mu uuwa i ci aka na Ngaa njɛ atwa-i'ime bu udusa wɛ ɛvwɛvwɛjɛ mi tupatanganaa?

¹⁴Shɛ aba suu a shɛ mpiala ma ata ma nda iyi, mu na baa tumwanɛ maa a ndanɛ atwa na shɛ ayɛ-ogwu ubino iyi?