Read bassa EHIBRU 11 Bible Online

EHIBRU 11 - bassa bible

EHIBRU 11

¹Rishe-tɛtɛtana rɛ shɛ tumapa ti tikpeke ti iyi nɛ ata nda ashɛlatụ ibɛ, ibɛ shɛ tibɛcinjɛ ti iyi nɛ atu kwụbɛ shɛ.

²Ne rishe-tɛtɛtana ee le atwa angwụshɛ tiseyida.

³Ne rishe-tɛtɛtana oto eshicigo maa tedure nu n-ndumwa mu na Agwatana jɛmɛ, ibɛ po unyizo namɛ, maa iyi nɛ ata kwụba banɛ ni iyi nɛ eti eri shi ta kwụbɛ.

⁴Ne rishe-tɛtɛtana ge Ebɛl shɛkanɛ Agwatana iyi ụrụpɛ nɛ zhɛmɛ uhwuri inɛ Ken. Tedure ni inɛ ɛtɛ, ee le bu tiseyida maa bɛ shɛ bụtụ bi tiririri, Agwatana kaa du le ụrụpɛ ata ubwa tiseyida. Tedure ni inɛ ɛtɛ, okwo ti bee 'wi, bu ta duma ba iwɛ waa.

⁵Ne rishe-tɛtɛtana ee shepi Enok na azuba maa kede bo 'wo; a kwụbɛ shɛ bụ ya o, iwɛnɛ ta Agwatana shepi bu. Iwɛnɛ te e le bu tiseyida maa bu kwụlanɛ Agwatana tebiye tebiye, nazhɛ bee shepi bu.

⁶Ama ti eri shi tu ma kwulana Agwatana nu uzawa rishe-tɛtɛtana o. Iwɛbɛ po yaa shɛ tilɛɛ maa bụtụ na be ci pa Agwatana, ga tɛtana-rishe maa Agwatana namba gom, maa ubwa kaa shɛ bipeni ba atwa na a dwalakaka bu tebiye tebiye ule wa aba.

⁷Ne rishe-tɛtɛtana ga Noa shebi ụhaŋtụ maa bicingo atwa ihwɛ ibwɛ, iwɛnɛ ti inyɛsɛ tijilo shishingeni bu, na aka na ta Agwatana eshicigeni bu iwɛ iyi nɛ atwa ta kwụbɛ shɛ. Tedure ni inɛ ɛtɛ bee peni unyizo n-ndumwa-tụwụma, ibɛ po baa shɛ ya bɛyɛ-bo-ogwu bi tiririri a na banɛ ne rishe-tɛtɛtana.

⁸Ne rishe-tɛtɛtana ga Abraham hwụjɛ-unu, aka na ta Agwatana suyanɛ bụ maa bana na cɛnjɛ tu bwa maa zha no ofwo na Agwatana shileni bu unu maa bi zhɛ ba pana bụ maa tɛ shɛ iyi-yo-ogwu ubwa. Ama bi mepi shi kaa ofwo ata bɛɛ zhɛ ga gom o.

⁹Ne rishe-tɛtɛtana baa shɛ birinji na cɛnjɛ tu unu-tishilo, tu na tɛ shɛ cɛnjɛ ta anya atwa, baa jɛjɛ no shimwono-shi-tugwuno na Azik keeni Jekob, a na shɛ ayɛ-ogwu unu-tishilo ebe uko uko nu bwa.

¹⁰Ga Abraham 'yacɛ ụshɛpwụ na 'yajɛ ukoshilo, unaa na Agwatana imanganjɛ, bee jwe.

¹¹Ne rishe-tɛtɛtana du ge Sera ni ikɛnyi ibwɛ leshiji ukpahiŋ maa la ofubo, bee meci yɛu na aka na ta aka ubwa tumata keshici,[45] iwɛnɛ tu baa rɛcɛ Agwatana na shileni bu unu maa bɛ shɛ bụtụ bɛ tɛcara.

¹²Iwɛnɛ ti yaa banɛ no olugwo bụtụ bu ko na ga shɛ maa bu uwo, ama e meci kaa miaụŋ mu na ufwugwo muba mɛ shɛ gana mkpasu keeni ahwayɛ itekwu a na zasa tɛrɛta.

¹³Atwa ga hwɛɛ 'wi ne rishe-tɛtɛtana, tobwolo e te leshiji shi kaa iyi nɛ Agwatana shileni aŋ unu ata o, ama a kwụbwa uŋ kaa taa dụlụ, ibɛ po ee leni maa a shɛ agaiŋ keeni alashɛ nu unyizo ga.

¹⁴Iwɛnɛ po atwa na a duma iyi gɛnɛ gɛ, ɛ bɛcinjɛ kpataa maa a jalakaka cɛnjɛ ti ikɛnyi aba.

¹⁵Yaa shɛ ee ge shiyeni ahaŋsa aba na cɛnjɛ tu na aa banɛ, ɛ gɛ zhɛ a 'yaga ohwolu maa e gwuri.

¹⁶Ama a jalakaka tuba cɛnjɛ tu na ti tekweci tebiye, tuba tɛ shɛ ma tu ta azuba. Iwɛbɛ po Agwatana njɛ shɛ ezuye maa a suyanɛ bụ maa ubwa shɛ Agwatana aba, iwɛnɛ tu baa imwangwanua aŋ ụshɛpwụ.

¹⁷Ne rishe-tɛtɛtana ga Abraham shepi Azik yɛu ibwɛ bee peni Agwatana, na aka na ta Agwatana mekeni bu, bee leshiji unu ata tishilo nu unyasa. Bu ga vwɛ cwɛŋ maa i shɛ bu go to ụrụpɛ ni yɛu ɛtɛ ibwɛ mokondo[46]

¹⁸Ubwa kaa Agwatana ga dumwa la iwɛ ubwa, bɛɛ hiɛŋ, Tedure na Azik ɛɛ zhɛ a suyana ajalalo bu.[47]

¹⁹Ga Abraham rɛcɛ maa Agwatana eri ɛ hicinjɛ bụtụ okwo no tu'wo, apata du ga Abraham leshiji Azik gana ushi.

²⁰Ne rishe-tɛtɛtana ga Azik shileni Jekob keeni Isụ unu iwɛ uwebiye-tupana geri-be-eshe.

²¹Ne rishe-tɛtɛtana ge Jekob peni miaụŋ mu Josɛf uwebiye hwɛɛ aba na aka na ti bɛɛ zhɛ tu'wo, tu boo to ugbokwunu ni ihiŋhiŋ bukwuto bu bwa, baa zhɛbɛ Agwatana.[48]

²²Ne rishe-tɛtɛtana go Josɛf jɛmɛ iwɛ ụbanụ miaụŋ mi Isrɛl ni Ijipti tu boo gwumwono tu'wo; bee peni aŋ unu iwɛ o-umpwo ubwa[49] tusugo hwuŋ.

²³Ne rishe-tɛtɛtana atwa na meci Moses sweci bu ipiɛnɛ itɛtu na aka na te e meci bu, iwɛnɛ ta a kwụbɛ maa bɛ shɛ yɛu nɛ pilanụ; a njɛ shɛ inyɛsɛ unu-tupana wa agwuma ata o.

²⁴Ne rishe-tɛtɛtana go Moses lacɛ maa a na suyana bu maa bɛ shɛ yɛu yɛu Faro yo o, na aka na ti bee gembi ya.

²⁵Bee teri maa hioko iyi iwɛ na atwa Agwatana, uhwuri maa amɛ ubwa lemi ni iwɛwɛ, na amɛ-olom na kaa zha shɛ o ilogogo.

²⁶N-ndumwa mu na oo mbisogo Krast mu shanɛ bụ uduciya, uhwuri aduciya Ijipti, iwɛnɛ ti bee peteni eshe ubwa nu ule na tee ci.

²⁷Ne rishe-tɛtɛtana bee beni ni Ijipti, baa njɛ shɛ inyɛsɛ ya agwuma ata, iwɛnɛ tu baa 'imɛ-isɛbwɛ gana maa ba kwụba bụtụ ata eshe kwụbɛ shɛ.

²⁸Ne rishe-tɛtɛtana baa njɛ Isene Tɛkashɛka, keeni mehieŋ tizhizhongo no shidubo, iwɛ maa kede bụkwụnɛ bu miaụŋ mu umbe timengeni aŋ o.

²⁹Ne rishe-tɛtɛtana atwa Isrɛl keshi itekwu ishenje[50] gana maa i shɛ cɛnjɛ tu hwoo, inɛɛ nɛ atwa Ijipti menji maa e keshi du, yee tweri aŋ.

³⁰Ne rishe-tɛtɛtana uba Jɛriko hwuŋzwo te e rinji uŋ ijitɛ icenje.

³¹Ne rishe-tɛtɛtana ge Rehab na shɛ buwɛle njɛ shɛ ufwu na atwa na hwụjɛ shɛ unu,[51] iwɛnɛ ti bee leshiji eyeleji na go Joshua tumwanɛ na amɛ-olom.

³²Imbe kwuŋ Ngɛɛ tɛ zhɛ mɛ hiɛŋ yaa? Iwɛnɛ po aka n 'nyananɛ maa Me hi swegeni iwɛ Gidion, na Barak, na Samson, nɛ Jɛfta, ne Devid, na Samuɛl, keeni egesere.

³³Ne rishe-tɛtɛtana atwa go lasatagwụ cɛnjɛ cɛnjɛ-ta-tugwama, aa jɛmɛ ụshɛrɛya te tini cɛŋ, ee leshiji unu-tishilo, ee kepi izeci unu,

³⁴ee 'wericinji ukpahiŋ ulwa, ee benengeni utokwobi na lacɛmɛ. A 'yajɛ ya ukpahiŋ tedure no tulwogogo, a 'yajɛ ikɛnyi nu ujasa, aa lasụ asaza cɛnjɛ ti nya.

³⁵Eyikwo leshiji atwa aba na 'wi tedure nɛ tihiɛ. Atwa oko 'wi ni ijibi shekwute, ta a lacɛ maa e meme leshiji, iwɛ maa tuba e teni nɛ tihiɛ tu na ti tekweci.

³⁶Ụbaụta wa atwa oko ụ shɛ na asada, ni ikwuci, iih, o to aŋ ashɛnjɛ, ee kepi aŋ nu umwono-tishi.

³⁷E tegeni aŋ atayɛ, ee vweri aŋ nụ ụshɛmbɛrɛ-bishebi, ee menji aŋ,[52] aa kwụnɛ aŋ nu utokwobi. E rinji ni i'wɛbɛ ya agwụdụ, ti i'wɛbɛ iyweywe, aa shɛ okofwo, e hieci ụbaụta, tedure nu umungwuta na aa nda aŋ.

³⁸Unyizo ga lanɛ shɛ na atwa ata o. E rinji na ashɛka, tu nshama, ta amɛ apangwụ, ta amɛ a'ibwa unyizo ga.

³⁹E le kaa atwa ga hwɛɛ tiseyida iwɛ rishe ra aba tɛtɛtana, e te leshiji shi kaa unu na Agwatana shileji aŋ o,

⁴⁰iwɛnɛ ta Agwatana kwụbwa iyi nɛ uhwuri inɛ ɛtɛ iwɛ tu cebe, maa atu ga zasaba, a ga zha shɛ o to tụ'ụrɛcɛnga ta aba o.