Read bassa EHIBRU 2 Bible Online

EHIBRU 2 - bassa bible

EHIBRU 2

¹Iwɛ inɛ gɛ i shɛ tilɛɛ maa tu na kaana ma abashɛ tụpana iwɛ iyi nɛ atụ hwụjɛ, iwɛ maa kede e tu zucinji o.

²Yaa shɛ iwɛ nɛ atumwa-azuba jɛmɛ la shikeni dimi, ee peni kaa ebweji-undwa keeni atwa na hwụjɛ shɛ unu ulwapɛ na teni cɛŋ,

³asha gana naa ɛti zhɛ tu ma banangana ti yaa shɛ otu mo jinoko ubino ga ụ'wụtụ 'wụtụụ? Ubwa shɛ unaa na Agwangwama jɛmɛ iwɛ ubwa hiiŋ, nazhɛ atwa na hwụjɛ-unu ubwa iti shikicingeni uŋ dimi.

⁴Agwatana du kaa le aŋ tiseyida tedure ni iyi tudama keeni iyi arụhwajɛ keeni ugondu ukpahiŋ gɛnɛgɛnɛ, keeni Mpiala mi Tijilo mu na bee hweŋshi gana na kwụlanɛ bụ.

⁵Shɛ ụhwada wa atumwa-azuba Agwatana shileni unyizo na tee ci o, ubwa shɛ unaa na ata duma iwɛ ubwa.

⁶Ama bụtụ bu ko le tiseyida no ofwo oko, bɛɛ hiɛŋ, Imbe bụtụ shɛ, ee te teyinje buu? Kwo kaa yɛu bụtụ, abu ta ima bụ u'alaa?

⁷Gabụ kaa bɛ njɛ bụ[5] maa zwe aka fwalaa[6] maa kede bo to atumwa-azuba o; ụjɛrụma keeni tumuna, ibɛ shɛ udara na ebi peteni bu. Ebi tileneni kaa ụhwada ubwa iyi elele.[7]

⁸Iwɛ inɛ ɛtɛ kaa bee tileneni ụhwada ubwa iyi elele, i zasa iyi elele nɛ vwɛ bee tileneni shi ụhwada ubwa o. Ama tu ta kwụbɛ shɛ tuba hwuwayɛ maa ụhwada ubwa bee tileneni iyi elele o.

⁹Ama ti eri ta kwụba bụtụ na baa njɛ maa zwe aka fwalaa maa kede bo to atumwa-azuba o, ubwa shɛ ge Jisus, iwɛnɛ tu baa njɛ ụbaụta tu'wo. Ụjɛrụma keeni tumuna, ụ shɛ udara na ee peteni bu, iwɛ maa bo tono tu'wo iwɛ atwa kpaaŋ tedure no tulubo-ti-biye ta Agwatana.

¹⁰I teneni kaa Agwatana cɛŋ, ubwa na iyi elele namɛ iwɛ ubwa, ubwa kaa iyi elele namɛ tedure nu ukpahiŋ ubwa, gana na tu bee suje miaụŋ mu ufwugwo bee tileni nụ ụjɛrụma, maa ụrɛcɛnga bipeni-bu-ubino ba aba tedure nụ ụbaụta.

¹¹Iwɛnɛ po ta bụtụ na ba nda atwa tijilo, ta atwa na aa njɛ maa a shɛ atwa tijilo, hwɛɛ aba banɛ no olugwo Bishi bu ko. Iwɛbɛ po ezuye shɛ shɛ bụ maa bu na suyana aŋ maa miaụŋ-mo-bino mi.

¹²Bɛɛ hiɛŋ, N zhɛ ma anangana miaụŋ-mo-bino mi izeci bu. N zhɛ kaa ma bu zungangana azunga ashɛtwa na ashashɛ tụ'ụlwatagwụ.

¹³Bɛɛ hiɛŋ sasana, N zhɛ ma tɛtana bu rishe. Bɛɛ hiɛŋ sasana, Hioko ma, Gamba na, medenji miaụŋ mu na Agwatana m peni.

¹⁴Iwɛnɛ po gana na ta miaụŋ ma ata mɛ 'yajɛ tu'waba keeni mehieŋ, gobwonu du baa 'yajɛ ya tu'waba keeni mehieŋ, gana na tu baa twa-ikpɛngwu na aba, iwɛ maa nda Ibiri ɛtɛ 'yajɛ ukpahiŋ tu'wo ufwu tedure no tu'wo tu bwa,

¹⁵iwɛ maa u tufwurinje atwa elele na ge zweni na tijama tutu tu'wo ta aba, iwɛnɛ ti inyɛsɛ tu'wo ga shɛ aŋ.

¹⁶Iwɛ-tɛkana, ge Jisus zhajɛ, shɛ iwɛ maa mbiyono atumwa-azuba o, semi maa mbiyono ajalalo Abraham.

¹⁷Iwɛbɛ po yaa shɛ tilɛɛ maa a njɛ bụ gana miaụŋ-mo-bino mu bwa ni iyi elele, iwɛ maa sha bunongbo bụ 'wụtụ bɛ tɛcara, na bo hioko inyɛmɛnyɛmɛ iyi ya Agwatana, iwɛ maa u tono orogwu atwa iwɛ iwɛwɛ ya aba.[8]

¹⁸Iwɛnɛ po gana na ti ge Jisus njɛ ụbaụta ni ikɛnyi ibwɛ na aka na te e menji bu, gobwonu du bee eri bo mbiyono atwa elele na aa manga.