Read bassa EHIBRU 3 Bible Online

EHIBRU 3 - bassa bible

EHIBRU 3

¹Iwɛbɛ po a-miaụŋ-mo-bino mi mi tijilo, ahiɛba na hiɛ hwụjɛ ụhiɛŋshɛ wa azuba, shiyono ma shihaŋsa shi hiŋ no ofwo Jisus na shɛ butumwa keeni uhiu wo onongbo, na ata ananga iwɛ ubwa.

²Ubwa shɛ bụtụ na namanɛ Agwatana na teri bu cara, gana na tu go Moses namanɛ la du atwa ihwɛ ibwɛ hwɛɛ[9] cara.

³A rɛcɛ kaa Jisus maa bu lanɛ nụ ụjɛrụma na uhwuri una Moses, gana na to bumo bi ihwɛ 'yajɛ ụjɛrụma uhwuri ihwɛ ɛtɛ.

⁴Ihwɛ ye elele kaa 'yajɛ bụtụ na mo iŋ, ama Agwatana tuba mo iyi elele kpaaŋ.

⁵Go Moses namanɛ la ihwɛ ibwɛ cara, gana yɛu-ugondu, iwɛ maa la tiseyida ti iyi nɛ ɛɛ tɛ zhɛ a duma iwɛ ibɛ geri-be-eshe.

⁶Ama ga Krast namɛ cara gana na tu baa shɛ Yɛu nɛ 'yajɛ ụhwada ihwɛ ya Agwatana, atuba tɛ shɛ ihwɛ ibwɛ, ti yaa shɛ ata untangana eshe-hwoo keeni tubusa ta ashɛlatụ tu dimi tutu uce.[10]

⁷Gana na tu Mpiala mi Tijilo mi hiɛŋ, Yaa shɛ ahia hwuga rụhwŋụ ru bwa hwayɛ ga,

⁸ta ta ma ya tɛshɛshɛpana gana na atwa oko njɛ la tigezhe na aka na tumakana ti zhaganɛ aŋ la nu ụshɛka o.

⁹Apata eshi hiŋ e m menji la ee m mekeni la, aa kwụbɛ ugondu mu shiywa buhanda.

¹⁰Iwɛbɛ po Ngaa njɛ isɛbwɛ nu uwaŋnɛ ata, Ngɛɛ hiɛŋ, Shɛmɛ sha aba sha inzhɛnga aŋ tutu; ibɛ po ee mepi shi ihwɛŋnɛ mi.

¹¹Gana na tu Ngoo momo to ni isɛbwɛ mi, Ngɛɛ hiɛŋ, A zha shɛ o tono nụ ụhinjanụ mu o.

¹²A-miaụŋ-mo-bino mi na amɛ Krast, na nda ma du pece, shibwonu ahaŋsa awɛ a na zhɛ a laka maa hiɛ tɛtana-rishe zhɛ a nama na amɛ bụtụ be elele, maa hi genji Agwatana na shɛ Buumwa.

¹³Ama no momo kononu ma ikɛnyi iyi-heri iyi-heri. A duma iŋ hwayɛ ga, iwɛ maa kede bụtụ be elele shɛshɛpanɛ tedure na tuhalakaka ti iwɛwɛ o.

¹⁴Hwuwayɛ go, tɛ shɛwa ya atwa na a twa-ikpɛngwu na Krast, ti yaa shɛ ata untangana ohwulu tu oko a na ati 'yajɛ taa nu umozhigo dimi tutu uce.

¹⁵Aka na Iwɛ ya Agwatana hiɛŋ: Yaa shɛ ahia hwuga rụhwụŋ ra Agwatana hwayɛ ga, ta ta ma ya tɛshɛshɛpana, gana na atwa oko njɛ la tigezhe na aka na aa lacɛ unu ubwa tuhwuga o.

¹⁶Atwa naa kwuŋ lacɛ la unu ata tuhwuga na aka na ta a hwụjɛɛ? Shɛ hwɛ hwɛɛ aba na go Moses bɛcinjɛ la ni Ijipti suu?

¹⁷Ama na atwa naa tuba Agwatana njɛ la isɛbwɛ na aba shiywa buhandaa? Shɛ na atwa ata njɛ la iwɛwɛ, a na n'wo ma aba mi tileni nụ ụshɛka suu?

¹⁸Atwa naa tuba Agwatana momo to maa a zha shɛ o tono nụ ụhinjanụ ubwaa? Aba shɛ atwa ata lacɛ la unu ubwa tuhwuga.[11]

¹⁹Ibɛ po atụ kwụbɛ ga maa e eri shi o tono na cɛnjɛ ta ata tụ ụhinjanụ o, iwɛnɛ ta a lacɛ la rishe-tɛtɛtana.