Read bassa EHIBRU 4 Bible Online

EHIBRU 4 - bassa bible

EHIBRU 4

¹Ibɛ po gana na te e ti shileni-unu maa to tono nụ ụhinjanụ wa Agwatana, asha tu na nda ma inyɛsɛ, shibwonu nekeshi bụtụ hiŋ bu ko bo kwu hwuŋ no tutono tu bwa.

²Iwɛ-tɛkana, o tu onongwonuo Anabarɛ Ebiye ata, gana na te e enengeni aŋ la du, ama n-ndumwa mu unabarɛ ata mu zasana aŋ ule o, iwɛnɛ tu mo hiŋtotongwu su ne rishe-tɛtɛtana na shɛmɛ[12] sha atwa na hwụjɛ mụ.[13]

³Hwuwayɛ go, atuba na ti tɛtanɛ-rishe, ti zhɛ to tono nụ ụhinjanụ ata; gana na ta Agwatana jɛmɛ, bɛɛ hiɛŋ, Gana na tu Ngoo momo to ni isɛbwɛ mi, Ngɛɛ hiɛŋ, A zha shɛ o tono nụ ụhinjanụ mu o. Agwatana jɛmɛ iwɛ gɛ, okwo tu ugondu ubwa ulwa taa na aka na tu baa njɛ unyizo.

⁴Gana na ti Iwɛ ya Agwatana jɛmɛ no ofwo oko, yɛɛ hiɛŋ, Agwatana to ụhinjanụ nụ ụjita ucenje nu ugondu we elele na baa njɛ.

⁵Baa jɛmɛ epe sasana, bɛɛ hiɛŋ, A zha shɛ o tono na cɛnjɛ tụ ụhinjanụ mu kwukwuŋ.

⁶Ama gana na ti yaa vwɛ cwɛŋ maa atwa oko teni nụ ụhinjanụ ata, ama atwa na ee enengeni la Anabarɛ ata Ebiye, o kwu, e teni shi cɛnjɛ ta ata tụ ụhinjanụ o, iwɛnɛ ta a hwụjɛ shɛ la unu.

⁷Nazhɛ Agwatana dweeneni ụjita unya, bɛɛ hiɛŋ, bi jwe ụjita unya sasana, tedure na shɛzunga shɛ na aa zunganganɛ Agwangwama, na aka na dụlụmɛ, bɛɛ hiɛŋ, Hwayɛ ga, gana na tu baa ga dumwa cebe, bɛɛ hiɛŋ, Yaa shɛ ahia hwuga rụhwụŋ ra Agwatana, ta ta ma ya tɛshɛshɛpana o.

⁸Yaa shɛ go Joshua[14] go pwonuo aŋ la ụhinjanụ, Agwatana ga zha shɛ[15] a dumanana iwɛ ụjita unya o.

⁹Iwɛ ecilo ata, asha Ụjita-ụhinjanụ uko u ta vwɛ ba iwɛ atwa Agwatana.

¹⁰Bụtụ be elele na kaa teni nụ ụhinjanụ ata wa Agwatana, asha bụtụ ata ni ikɛnyi ibwɛ to du ụhinjanụ nu ugondu ubwa, gana na ta Agwatana to la ụhinjanụ nu ugondu ubwa.

¹¹Iwɛ ecilo ata, tɛ njɛ ma gana na eti eri maa ti teni ma nụ ụhinjanụ ata; iwɛ maa kede bụtụ be elele kwu, gana na ta atwa ata kwu la iwɛnɛ ta a hwụjɛ shɛ iwɛ o.

¹²N-ndumwa ma Agwatana mɛ shɛ buumwa, maa nda kaa ugondu, maa lacɛmɛ kaa uhwuri utokwobi na lacɛmɛ apada hweehwe. Ma iba iyi tutu tudwotwogonu to ohwulu keeni mpiala, tutu tusotulongonu ti itwɛ keeni manɛbɛ mo o'umpwo. Mi eri ma mapa shihaŋsa, keeni iyi nɛ kwụlanɛ ahaŋsa bụtụ tɛnda.

¹³I zasa iyi nɛ Agwatana karɛ, nɛ swakanɛ bu o; ama iyi elele namanɛ bu mohondo. Yaa kapɛshɛngwa kaa ne eshe ubwa na ɛti zhɛ te swegeni hwuŋ iwɛ tu.

¹⁴Ibɛ po gana na ati 'yajɛ uhiu wo onongbo ụ'wụtụ 'wụtụ, na duri azuba,[16] ubwa shɛ ge Jisus Yɛu ya Agwatana. Tu na untangana ma unu na etu sweji dimi.

¹⁵Uhiu tu wo onongbo, shɛ shɛ bụtụ na eri shi ba hwuga tulwogogo tu tu o, ama e menji bu ni iyi elele gana tu, ama bɛ njɛ shɛ kaa iwɛwɛ o.

¹⁶Ibɛ po tu no dongonu ma idwɛtwɛ tulubo-ti-biye, no ohwulu tu oko, maa Agwatana hieci inyɛmɛnyɛmɛ tu, iwɛ maa to gwushigo tulubo-ti-biye tu na ti zhɛ tu mo tu mbiyono hwuŋ na aka na tu ukekeshi tu to.