Read bassa EHIBRU 6 Bible Online

EHIBRU 6 - bassa bible

EHIBRU 6

¹Iwɛ ecilo ata ti genji ma ya umozhigo mi imbisegeni iwɛ Krast, maa tu to ma tuhwulo no tugborofwu tisha. Kede tu kwuneneni ma ukoshilo tishilo iwɛ ahaŋsa-tɛjɛshɛrɛjɛ, ti iwɛ ugondu na 'wi[21] tɛganga, ti iwɛ rishe ru na atɛ tɛtanɛ Agwatana o,

²ti iwɛ ubaptizim timbisogono,[22] ti iwɛ i'ɛlɛ tupatangana,[23] ti iwɛ tihiɛ ta atwa na 'wi, ti iwɛ ụshɛrɛya unyizo-nom tụdụma o.

³Mizha tu to ma ya tuhwulo geri-be-eshe, ti yaa shɛ Agwatana iti leneni.[24]

⁴Atwa elele na kwụbwa la uhioko-uhwaŋna aka oko, a na ka hungwanua la upwaŋ ata wa azuba, a na loshigwo la urobwo ata Mpiala mi Tijilo,

⁵a na hungwanua la n-ndumwa ma Agwatana mi biye, keeni ugondu ukpahiŋ aka ye tee ci.

⁶Yaa shɛ ee leyi, i zasa bụtụ na te eri be gwuricinje aŋ maa a jɛshɛrɛjɛ-ahaŋsa sasana o, iwɛnɛ ta a tagana sasana Yɛu ya Agwatana nrɛ nụ ụ'wụ'wụ-ubatanɛ tuta tu ufwo iwɛ ikɛnyi aba ne eshe atwa kpaaŋ maa a njɛ bụ ụpụrụsa.

⁷Iwɛnɛ po cɛnjɛ tu na tu swowo meni me eshilo na baa shana bo ngbo na tuba ɛgbɛɛ, ta matanga kaa afwashɛ na a hwaŋ itimɛ na tuba iyimɛyɛ nɛ 'yaganɛ aŋ ule, Agwatana kaa a pana iŋ uwebiye.

⁸Ama yaa shɛ tɛ ɛ unshɛ ya esepi keeni okolokwu-shɛngala, asha e menji tu maa tɛ zhɛshɛ ya o, asha tu gwumwongonu ya maa e keleni tu unu. Tukwunanga ta tuba tɛ shɛ tuhwoŋzhingo nu ulwa.

⁹Ama ahiɛba atwa tulubo, ohwulu tu namɛ oko iwɛ hiŋ, okwo ata duma iwɛ gana ga, ama iyi ibiye nɛ zhɛmɛ uhwuri inɛ ɛtɛ i ta namba, ibɛ shɛ iyi nɛ zhagajɛ nu ubino.

¹⁰Agwatana shɛ shɛ bụtụ bo orugwusu, maa isɛbwɛ ugondu hiŋ keeni tulubo tu na ehi lubi atwa iwɛ izeci ibwɛ i 'wi bu o, gana na ta ahi ndwanua atwa tijilo Agwatana iyi, keeni tɛnda tu na ahi ta ndana aŋ.

¹¹Ta jala maa bụtụ bụtụ na ashashɛ hiŋ na shana ikɛnyi ne egiri-tula gana ata, maa shihaŋsa shi hiŋ shi nama kpeke iwɛ ashɛlatụ tutu uce.

¹²Ta sha ma aruna o, ama sha ma atwa na a shata atwa ne rishe-tɛtɛtana keeni isɛbwɛ-ti'ima, maa hi leshiji urobwo iyi nɛ Agwatana ihi shileni-unu ibɛ.

¹³Gana na ta Agwatana zasa bụtụ na hwuri bu maa ta, na aka na tu boo shilono la Abraham unu, ibɛ po boo momo to,

¹⁴bɛɛ hiɛŋ, N zhɛ mu na bu pana uwebiye, Ngɛɛ zhɛ mu na kaana ajalalo bu ufwugwo.

¹⁵Gana ata ga kaa, aka na ga Abraham[25] 'imɛ-isɛbwɛ tebiye, nazhɛ bee leshiji unu ata Agwatana ge shileni bu.

¹⁶Atwa elele na a ta iyi nɛ uhwuri aŋ ni ikɛnyi aba, tuta ta ata aa ta iyi nɛ ya nda maa iyi shikono dimi, ya kwunangana aŋ ashamanjɛ elele.

¹⁷Iwɛbɛ po yaa kwụlanɛ Agwatana maa mbisono atwa na zhɛ a lashɛga iyi nɛ bee shileni aŋ unu caakwụ, maa iyi nɛ baa haŋsa sheyinji shi kwukwuŋ. Ibɛ po bee shikicinji unu ata tishilo na ashashɛ ubwa na aba.

¹⁸Agwatana njɛ ijɛ iyebi, nɛ zasa tisheyingo, inɛɛ nɛ Agwatana na eri shi a dwa-ụzagwụ shilwo-unu ibɛ. Bɛ njɛ iwɛ maa atuba na tu gwushiji ofwo tuswaka na amɛ ubwa maa ta 'yaga u'waba-tihia ụ'wụtụ, maa ta untangana ashɛlatụ ata bee ti shikicingeni.

¹⁹Ashɛlatụ ga ati 'yajɛ e shikeni kpeke ta 'yajɛ ikɛnyi dimi, a na eri a untangana shihwulu shi tu gana ụshɛmbɛrɛ ụ'wụtụ na oo shikicingo ụhaŋtụ, maa kede shɛ njɛ bulama o. E teni kaa taa na amɛ Ohwolu ata Tijilo me Tijilo a na ibɛgɛlɛ ɛtɛ tugwuno[26] nɛ ee kepi odubo udulo ata jɛlanɛ.

²⁰Apata ge Jisus na hwuri umbe teni la iwɛ tu, ubwa shɛ ya uhiu wo onongbo unyizo-nom, gana na gɛ Mɛlkizɛdɛk[27] shɛ la.