Read bassa EHIBRU 8 Bible Online

EHIBRU 8 - bassa bible

EHIBRU 8

¹Ecilo iyi nɛ ata duma na: ti 'yajɛ uhiu wo onongbo gana ga, na jɛjɛ nu u'ala ubiye idwɛtwɛ[30] igɛhi i'wɛtwɛ na azuba.

²Ubwa shɛ bɛnjɛ-bi-iyi bo Ohwolu Tijilo[31] udulo tugom, na Agwangwama shikicinji, shɛ butugwumwa o.

³Gana na te ehiu onongbo elele a na ee teri a 'yajɛ la iyi nɛ maa a na shɛkana apwaŋ, maa kaa a na ta ụrụpɛ. Iwɛbɛ po yaa shɛ iyi tilɛɛ maa bụtụ ga 'yaga du iyi nɛ maa ba shɛkana nụ ụrụpɛ tuta.

⁴Iwɛ-tɛkana, yaa shɛ baa ga namɛ nu unyizo, bu ga zha shɛ ba sha uhiu wo onongbo kwukwuŋ, iwɛnɛ to onongbo namba a na a shɛkana apwaŋ gana na tu Undwa hiɛŋ.

⁵Iyi nɛ atwa ga a nda no ohwolu ata tijilo, i shɛ ụsụbwa keeni uzhizhi iyi ya azuba. Gana na ta Agwatana eshicigeni la Moses, na aka na ti bɛɛ zhɛ bo shikicingo umwono ata tugwuno. Bɛɛ hiɛŋ bụ, Shiyono eshe maa kwụbɛ maa bɛ njɛ iyi elele te teni cɛŋ ne bimenji ga Ngee bi mbiseni ni ishɛmɛ gɛ.

⁶Ama hwuwayɛ, ga Krast 'yajɛ[32] ohwolu na zhɛmɛ uhwuri a na ata, gana na du tu baa shɛ bụtụ ba ashashɛ bu unu-tutwa na zhɛmɛ uhwuri una ata, unaa na ee shikicinji dimi tedure nu unu-tishilo na zhɛmɛ uhwuri una ala.

⁷Yaa shɛ unu-tutwa ala uhiiŋ ga zasa unu-tusapa, asha a ga zha shɛ a jalakaka ya ohwolu iwɛ una uyebi o.

⁸Ama gana na ta Agwatana kwụbɛtanɛ atwa ubwa utugbolo, ibɛ po bɛɛ hiɛŋ. Gamba Agwangwama, N hiɛŋ, Hioko ma, aka e ci ba, ti Ngɛɛ zhɛ mo shikicingo unu ufwo tutwa, iwɛ ihwɛ Isrɛl keeni iwɛ ihwɛ Juda du.

⁹Shɛ gana na Ngaa twa la unu ne eshi aba, nụ ụjuta ata Ngaa untanganɛ aŋ u'ala, maa Mɛ bɛcinjɛ aŋ na cɛnjɛ ti Ijipti o. Iwɛnɛ ta a namanɛ shɛ la unu mu tutwa na tɛcara, ibɛ po iwɛ aba n tatụlanụ sụ ya.

¹⁰Iwɛ inɛ gɛ, ibɛ Agwangwama hiɛŋ, Inɛ gɛ ibɛ i shɛ unu na Ngɛɛ zhɛ ma twa na atwa ihwɛ Isrɛl na aba ụjita ata. N zhɛ ma 'nyata uŋ du na shɛmɛ sha aba, Ngɛɛ zhɛ ma sha Agwatana aba, ɛɛ zhɛ a sha atwa mi.

¹¹Bụtụ bụtụ zha shɛ bo mbisogono ya uyebi ubwa, kwo kaa yɛu-bino bwa, maa, Mapa Agwangwama o; iwɛnɛ tɛ ɛ zhɛ ma m mapa hwɛɛ aba, te kwuni na bụtụ na 'nyanɛ umɛwɛɛ, tutu bụtụ bụ 'wụtụ, na uhwuri atwa vwɛ hwɛɛ na ashashɛ aba.

¹²N zhɛ mo hioko inyɛmɛnyɛmɛ ya aba iwɛ orogwusu aba, N zha shɛ me teyinje ya iwɛwɛ ya aba kwukwuŋ.

¹³Aka na Agwatana hiɛŋ, Unu Ufwo Tutwa, asha bɛ njɛ una ala uhiiŋ iyi ụngwụshɛ, asha una ata ụngwụshɛ, zhɛ mama ima ya maa u ishɛjɛ.