Read bassa EHIBRU 9 Bible Online

EHIBRU 9 - bassa bible

EHIBRU 9

¹Okwo unu-tutwa ala uhiiŋ, u 'yajɛ la andwa ubwa iwɛ tɛzhɛba, keeni ofwo tijilo nu unyizo ga.

²Iwɛbɛ po yaa 'yajɛ la udulo na aa imanjɛ. Nu una u tupohondo, apata uteburu-ụsụtụla shi, nu uteburu ata, ibɛ ibrɛd tijilo[33] ya patangana. Ɛ hiɛŋ apata, Ofwo Tijilo.

³Una wa amɛ na amɛ namba ibɛgɛlɛ tugwuno jilanɛ, ubwa ɛɛ hiɛŋ, Ofwo Tijilo me Tijilo.

⁴Na amɛ una ata, ibɛ utukwu-ụrụpɛ iturɛre na aa njɛ na azhɛnarɛya namɛ keeni ikpɛtɛ unu-tutwa nɛ ee ubeni azhɛnarɛya hwɛ hwɛɛ, apata du ikwɛshɛ ɛtɛ oo mo na azhɛnarɛya[34] no okwuto Aron na o sumbo keeni atayɛ tụpatakwụ patakwụ a na ee 'nyeci unu-tutwa.

⁵Iyi-uumwaa ụjɛrụma nɛ 'yajɛ apiambɛ patanganɛ na azuba ikpɛtɛ ɛtɛ, anaa na jilanɛ ajɛjɛ inyɛmɛnyɛmɛ[35] gana uzhizhi. Ti te eri shi te sweji iwɛ ijɛ inɛ inɛ hwɛɛ o.

⁶Aka na te e hwuwi ijɛ ɛtɛ ti'imanga gana ata hwɛɛ, nazhɛ onongbo o tono ya nu una ata uhiiŋ aka elele, maa a na nda ugondu wa aba.

⁷Ama uhiu wo onongbo kiri wo tono nu una ata uyebi kpalụ ko gba uywa uywa. Bi teni shi kaa du uzawa mehieŋ tu'waŋna maa ta ụrụpɛ iwɛ ikɛnyi ibwɛ, keeni iwɛ iwɛwɛ nɛ atwa njɛ nu umepiteshi o.

⁸Tedure ni inɛ gɛ, ibɛ Mpiala mi Tijilo mo mbisono ya caakwụ maa uhwaŋna na zhɛ no Ofwo Tijilo me Tijilo, u ta kapɛshɛngwa sụ o, iwɛnɛ tu udulo ata uhiiŋ te shikeni apata.

⁹Inɛ gɛ kaa i shɛ ụsụbwa iwɛ aka ga hwuwayɛ, inɛɛ nɛ imɛ apwaŋ keeni arụpɛ na aa ta, a na kaa eri shi a ụrɛcɛnga bimbisegeni-ba-amɛ ba bụtụ ata ba zhɛba Agwatana.

¹⁰Inɛ gɛ shɛ kwakwa iwɛ nɛ imɛ iyimɛyɛ, ni iyi tuswa keeni inyɛshɛnjɛ gɛnɛgɛnɛ, inɛɛ nɛ shɛ andwa tishiriri iwɛ tupohondo ta tu'waba, inɛɛ nɛ ee tileneni atwa, uuwa i ci aka na ɛɛ zhɛ e shikicingo inɛ ifwo nɛ teni cɛŋ.

¹¹Ama ga Krast ubwa shɛ Uhiu wo onongbo iwɛ iyi ibiye nɛ tee ci,[36] bee duri udulo na gembi, na kaa zhɛmɛ du uhwuri una ga namɛ epe. Una ata shɛ shɛ unaa na i'ɛlɛ bụtụ njɛ o, ụ shɛ shɛ kaa du tɛkarɛ ti iyi unyizo ga o.

¹²Shɛ ne mehieŋ mi iyweywe keeni mehieŋ mu miaụŋ mi inɛ bee teni Ohwolu ata Tijilo me Tijilo, semi ne mehieŋ mu bwa mi ikɛnyi ibwɛ, bee teni kpalụ ko gba, gana na tu baa 'yajɛ tugwube tu unyizo-nom.

¹³Yaa shɛ mehieŋ mi iyweywe keeni mu na mi inɛ-ye-eyi, keeni ma'alụ mu unasa buna mu na oo zhizhongo atwa na hashɛganụ, mu ga nda aŋ tijilo, iwɛ maa a ndanɛ tu'waba ta aba to tupohondo iyi te teni cɛŋ nu undwa tishɛshɛshɛ.

¹⁴Asha kpalụ umba tuba mehieŋ mu Krast mu na mu zasa unu-tusapa, ubwa na kaa mama shɛkanɛ Agwatana tedure nu Mpiala mu unyizo-nom, mi zhɛ ma nda ugondu na 'wi keeni bimbisegeni-ba-shɛmɛ shi tu[37] shɛshɛshɛ maa tu ndanɛ ma Agwatana uumwa iyii?

¹⁵Iwɛ ecilo ga, ga Krast shɛ bụtụ-ba-ashashɛ bu unu ufwo tutwa, iwɛ maa atwa na Agwatana suyanɛ leshiji iyi-yo-ogwu unyizo-nom nɛ bee shiri-unu. Iwɛbɛ po ga Krast 'wi iwɛ maa bicingo aŋ nu undwa tubwada unu-tutwa[38] ala uhiiŋ.

¹⁶Ofwo elele na unu-tutwa namɛ, asha i shɛ tilɛɛ maa a jɛmɛ iwɛ tu'wo ta bụtụ ata twa-unu ata.

¹⁷Tu'wo, tuba ta nda maa unu-tutwa 'yaga ụhwada, unu-tutwa eri shi wa 'yaga ụhwada we elele na aka na ta bụtụ na twa uŋ ta shɛ buumwa o.

¹⁸Iwɛbɛ po okwo unu-tutwa ata uhiiŋ, a twa sụ uŋ nu uzawa mehieŋ o.

¹⁹Iwɛbɛ po aka na tu go Moses mbishi atwa kpaaŋ iyi elele nɛ unu-tupana Undwa jɛmɛ, nazhɛ bee suji mehieŋ mu miaụŋ-mi-inɛ, na mu na mi iyweywe,[39] ne meni, ne tihiŋzhe ta agwụdụ eshenje keeni iyi nɛ ɛɛ hiɛŋ usopi, bee zhizhenji utakada ata gom keeni atwa ata hwɛɛ.

²⁰Bɛɛ hiɛŋ, Inɛ gɛ i shɛ mehieŋ mu unu-tutwa na Agwatana ihi peni-unu.

²¹Gana ata du bee zhizhenji mehieŋ nu udulo ata, ti iyi-uhwugwa ye elele nɛ aa nda uhwugwa ni ibɛ na tɛzhɛba.

²²Iwɛ-tɛkana, i vwɛ cwɛŋ maa go Moses njɛ iyi elele shɛshɛshɛ ne mehieŋ ma ata te teni cɛŋ gana na tu Undwa jɛmɛ. Yaa shɛ kaa mehieŋ mu 'waŋ sụ, asha iwɛwɛ tugangana zha shɛ ya nama o.

²³Iwɛbɛ po yaa shɛ tilɛɛ maa a njɛ ụsụbwa iyi nɛ namɛ na azuba shɛshɛshɛ tedure na arụpɛ ga, ama ukekeshi to iyi ya azuba ni ikɛnyi ibɛ maa a njɛ iŋ shɛshɛshɛ tedure na arụpɛ na uhwuri a na ga.

²⁴Shɛ no ofwo tijilo na butugwumwa njɛ ni i'ɛlɛ, a na shɛ ụsụbwa ofwo tijilo tugom, ga Krast teni la o, ama bi teni taa na azuba ni ikɛnyi aba, iwɛ maa banɛ upeje hwuwayɛ na agba Agwatana iwɛ tu.

²⁵Ga Krast teni shi azuba maa bu na mama shɛkana ɛgbɛ ɛgbɛ, gana na tu uhiu wo onongbo wo tono la no Ofwo ata Tijilo me Tijilo uywa uywa ne mehieŋ mu na mɛ shɛ shɛ kaa mu na bwa o.

²⁶Shibwonu i gɛ zhɛ ya shana Krast i tilɛɛ maa bu na nda ụbaụta ɛgbɛ ɛgbɛ taa na aka na ta a karɛ la unyizo. Ama bu banɛ upeje nu ukwunanga wa aka ga ɛmɛwɛɛ kpalụ ko gba, maa sugo iwɛwɛ, tedure nụ ụrụpɛ na bee meme shepi boo to.

²⁷Gana na te e shileni atwa kpaaŋ maa e 'wi kpalụ ko gba, na aba ibɛ nazhɛ ɛɛ zhɛ a duma ụshɛrɛya wa aba.

²⁸Gobwonu du ga Krast mama shɛkanɛ kpalụ ko gba tedure nụ ụrụpɛ na boo to, maa 'waŋna iwɛwɛ ya atwa ofwugwo. Bi tɛ zhɛ ba banɛ upeje na aka yebi, ama shɛ iwɛ iwɛwɛ tusugo ya o, semi iwɛ maa bicingo[40] atwa na a 'yaka bụ.