Read bassa JEMIS 1 Bible Online

JEMIS 1 - bassa bible

JEMIS 1

¹Ge Jemis na shɛ yɛu-ugondu ya Agwatana keeni inɛ ya Agwangwama tu Jisus Krast. No ofwo alamụ umpwa-na-ba-eyebi a na garatagwụ,[1] Okwu ma yoo.

²A-miaụŋ-mo-bino mi na amɛ Krast, aka elele tumakakana gɛnɛgɛnɛ ti hi vwuteni, ga ti hi shanɛ iyi unyasa hwɛɛ.

³Gana na te ehi mepi maa tumakana tu na aa makana rishe ri hiŋ tɛtɛtana tu ma hi ndana ugondu isɛbwɛ-ti'ima.

⁴Gɛ isɛbwɛ-ti'ima na ụrɛcɛnga ugondu ibɛ tutu uce, iwɛ maa hi ulwa, maa kede iyi elele ihi 'nyananɛ o.

⁵Ama yaa shɛ ti'inta ti 'nayananɛ bụtụ be elele na ashashɛ hiŋ, ga lụpa Agwatana, na ba pana atwa kpaaŋ iyi kwakwa, uzawa n-ndumwa timbisogo, bi zhɛ ba pana bụ.

⁶Ama ga lụpa ne rishe-tɛtɛtana, maa kede nda oruwo. Bụtụ be elele na ba nda oruwo, bɛ shɛ gana adanga itekwu a na mpiala ma 'wananga, moo zhingoto.

⁷Kede bụtụ gana ata heŋshi maa bi zhɛ ba lashɛga iyi elele no olugwo Agwangwama o,

⁸iwɛnɛ tu baa 'yajɛ ahaŋsa eyeyebi, na kaa shikeni shi dimi ni iyi elele nɛ baa nda hwɛɛ.

⁹Gɛ yɛu-bino nɛ shɛ bukofwo na busa no tumungicingo tu na Agwatana zhɛ o mungicingo bu.

¹⁰Ama gɛ yɛu-bino nɛ shɛ bɛzhɛgba, na busa ne tuzucinje tu na Agwatana zhɛ e zucinje bu, iwɛnɛ ti bɛ zhɛ ba kashɛka gana tusumbo ta ambɛ.

¹¹Iwɛnɛ po uwaŋna wa banɛ waa 'waŋnɛ oholobwo a'wụtụ, waa hwacɛnga ambɛ, tusumbo ta aba ta 'waŋ ya, tụpilanụ ta tuba ta gbazhɛgwa. Gobwonu du bɛzhɛgba zhɛ ba kashɛka tu ugondu we elele na baa nda.

¹²Bụtụ na ba ima-isɛbwɛ na aka na ti iyi ike ya makana bụ gwoje. Aka elele na baa lasụ tumakana ta ata, bi zhɛ ba lashɛga udara uraiŋ[2] ata Agwangwama shileni atwa na lubi bu unu.

¹³Kede bụtụ be elele na tumanga ta manga, hiɛŋ maa, Agwatana a manga bu o. Iwɛnɛ ti iyi iwɛ eri shi ya manga Agwatana, ubwa ni ikɛnyi ibwɛ du kaa menji shi bụtụ be elele o.

¹⁴Ama ukwedeyi ụwɛ ụ bụtụ bụtụ ubwa wa manga bụ, waa mba bụ, waa inzhɛnga bụ.

¹⁵Aka na tu ukwedeyi ụwɛ shini amɛ bụtụ, wa ana bu iwɛwɛ tɛnda; aka na ti iwɛwɛ ɛtɛ ụrɛcɛnjɛ ugondu ibɛ hwɛɛ, ya zarɛga bụ ya no tu'wo.

¹⁶A-miaụŋ-mo-bino mi mu tulubo, kede a hi inzhɛnjɛ o.

¹⁷Upwaŋ ubiye we elele, nu upwaŋ we elele na ulwa, banɛ na azuba, no olugwo Bishi na njɛ ohioko-uhwaŋna wa azuba[3] waa banɛ wee kezhe. Ubwa ni ikɛnyi ibwɛ sheyinji shi gana uzhizhi na wa jɛsharaga[4] kwukwuŋ.

¹⁸Ukwulana ubwa ụ shɛ maa ma tu mata nu n-ndumwa mu tɛkana,[5] iwɛ maa ta sha tumata ti hiiŋ ti iyi nɛ baa karɛ.

¹⁹A-miaụŋ-mo-bino mi mu tulubo, mapa ma inɛ gɛ, maa bụtụ bụtụ ga bu na nda kakayɛ na twuhwulaga, ama ta nda izɛlɛgwu iwɛ tụdụma o, ta nda kaa izɛlɛgwu ni isɛbwɛ tɛnda o.

²⁰Iwɛnɛ ti isɛbwɛ butugwumwa njɛ shɛ tiririri tu na Agwatana a jala.

²¹Iwɛbɛ po 'waŋ ma iyi tiri, keeni amiaụŋ na shini shɛmɛ shi hiŋ, a hialatagwụ hwɛɛ. Meme-zucinje ma maa hi na lashɛga n-ndumwa ma ata aa bila na shɛmɛ shi hiŋ, mu na kaa mi eri mo hi bicingo.

²²Ama na nda ma gana na tu n-ndumwa ma ata mɛ jɛmɛ, ta na hwuga ma kiri, maa hi na mama halakaka o.

²³Bụtụ be elele na ba hwuga n-ndumwa ma ata, baa njɛ shɛ gana na tu maa jɛmɛ, asha bɛ shɛ gana bụtụ na mama kwụbɛ ni irɛtɛ gana na tu baa shɛ.

²⁴Ama aka na tu baa ishɛjɛ apata, gunu ata isɛbwɛ yo 'wo bu ya gana na tu baa ga shɛ.

²⁵Ama bụtụ na bo shiyono undwa tumama 'yaga na ulwa eshe, na kaa ba uranga uŋ, ubwa shɛ shɛ bụhwụjɛ na isɛbwɛ yo 'wo, semi bɛnjɛ na ba nda ugondu baa shɛ. Bụtụ gana ata ubwa zhɛ be gwoje na tɛnda ta ata baa nda.

²⁶Bụtụ be elele na ba haŋsa maa ba ndana bụtụ na baa zhɛba iyi, yaa shɛ baa 'imɛ shɛ unu ubwa gbamụ, asha bu mama halakaka, asha iyi nɛ bụtụ ata ba ndana bụtụ na baa zhɛba i shɛ iyi tɛgadaga.

²⁷Iyi tɛndana bụtụ na aba zhɛba, nɛ namɛ shɛshɛshɛ, nɛ kaa namɛ rụmbɛɛ, ne eshe Agwatana na shɛ Bishi na; ibɛ i shɛ e'weteji keeni olulo timbiyono nụ ụbaụta wa aba, keeni maa bu na mama intana maa kede iyi unyizo ga na tagana bu o.