Read bassa 1 PITA HIIŊ 2 Bible Online

1 PITA HIIŊ 2 - bassa bible

1 PITA HIIŊ 2

¹Ibɛ po na 'waŋ ma iyi iwɛ hwɛɛ, ta tuhalakaka hwɛɛ, ta tɛnda-te-eshe, ti isɛbwɛngwɛ keeni n-ndumwa mụ wɛ tụdụma hwɛɛ.

²Sha ma gana miaụŋ mi ishenje, maa hi na 'yaga ukwedeyi mosubo mu mpiala mu na mu namɛ rụmbɛɛ, mu naa na mi teni cɛŋ, iwɛ maa hi waŋnɛ hi ci ubino tedure na muba.

³Gana na to hi towo ugbe maa Agwangwama mepi iwɛ.

⁴Hi zhajɛ pi Jisus na shɛ utayɛ uumwa, na atwa jineci. Ama Agwatana tuba teri uŋ, iwɛnɛ waa shanɛ bụ utayɛ wo ogwumishi.

⁵Gobwonu du ahiɛ shɛ gana atayɛ uumwa, a hi ma maa hiɛ shɛ umwono mpiala, maa hiɛ njɛ tunongbo ti tijilo, maa hi na ta ụrụpɛ mpiala na wa kwulana Agwatana tɛlashɛga tedure ne Jisus Krast.

⁶Iwɛnɛ te e 'nyeci ni Iwɛ ya Agwatana, ɛɛ hiɛŋ, Hioko ma, N zhɛ ma patana utayɛ na ee teri nu Zayon, ubwa shɛ utayɛ usugwulumi wo ogwumishi, bụtụ na kaa tɛtanɛ bu rishe, ezuye zha shɛ a sha bu o.

⁷Iwɛnɛ po ogwumishi ubwa tisha i shɛ no ofwo hiŋ na tɛtanɛ-rishe, ama yaa shɛ no ofwo atwa na hwụjɛ shɛ unu, asha utayɛ na omo-tuma jineci gana uzhobu waa shɛ. Ubwa kaa shɛwa ya utayɛ uhiu usugwulumi,[8]

⁸Keeni utayɛ udukwutwa keeni uparatayɛ na wa gwumana atwa. A twa udukwutwa, iwɛnɛ aa hwụjɛ shɛ unu n-ndumwa ma ata ee ge shileni aŋ.

⁹Ama ahiɛba hiɛ shɛ udenji na Agwatana teri, maa hiɛ njɛ ugondu tunongbo ta tugwama, hiɛ shɛ udenji tijilo, atwa na baa 'yajɛ ni i'ɛlɛ ibwɛ,[9] iwɛ maa hi shepi izeci ɛtɛ ibiye, hi enenji hwɛ hwɛɛ. Ubwa ihi suyanɛ maa hi banɛ ne tishi, maa hi teni uhioko-uhwaŋna ubwa ụrụhwajɛ.

¹⁰Ahiɛba na hiɛ shɛ shɛ la atwa, ama hiɛ shɛ ya atwa Agwatana hwuwayɛ, ahiɛba na ee hieci shi la inyɛmɛnyɛmɛ hiŋ, ama e hieci ya inyɛmɛnyɛmɛ hiŋ hwuwayɛ.

¹¹Ahiɛba atwa tulubo, Ma hi tabwa, gana na ahiɛ shɛ erinji keeni alashɛ unyizo, maa kede hi timengeni ukwedeyi u tu'waba, na wa jasa ujasa no ohwulu bụtụ o.

¹²Ga masha mi hiŋ mu na sha mu na mi biye na ashashɛ atwa na tɛtanɛ shɛ rishe, iwɛ maa okwo aa jɛmɛ iwɛ hiŋ iwɛ, gana maa hiɛ shɛ anjɛ iyi iwɛ, iwɛ maa tuba ugondu hiŋ na aa kwụba, na ana aŋ Agwatana ụjɛrụma tụpana nụ Ụjita u tugwure tu bwa.

¹³No momo tulonono ma ụhwada we elele na bụtụ karɛ;[10] iwɛ Agwangwama, okwo agwuma, iwɛnɛ ti bee hi hwuri.

¹⁴Okwo egwominetu, a na baa tumwanɛ iwɛ maa a tụpanɛ anjɛ iyi iwɛ, iwɛ iyi iwɛ nɛ aa nda, maa tuba a dumanga anjɛ iyi ibiye.

¹⁵Iyi nɛ i shɛ ukwulana wa Agwatana na, maa hiɛ njɛ tugbodu ta shɛlagwụ maa tɛ 'imɛ ilɛmɛ tedure ni iyi ibiye hiŋ tɛnda.

¹⁶Sha ma gana atwa na mama-'yajɛ, ama ta nda ma tuba tumama-'yaga ti hiŋ ohwolu na maa hi na nda iyi iwɛ o, ama ga i shɛ gana na ta ahiɛ shɛ ajama Agwatana.

¹⁷Na pana ma atwa kpaaŋ ụjɛrụma. No lubo ma miaụŋ-mo-bino. Na sụma ma Agwatana inyɛsɛ. Na muna ma agwuma ụjɛrụma.

¹⁸Ahiɛba miaụŋ-mu-ugondu, no momo tulonono ma ụhwada shɛgwuma-shɛ-nhwaŋ mi hiŋ ni inyɛsɛ kpaaŋ, shɛ no ofwo atwa biye keeni atwa na mepi-iwɛ kiri o, to ofwo atwa na 'yajɛ shimiaụŋ du.

¹⁹Yaa shɛ aa pana bụtụ be elele ụbaụta na teni shi cɛŋ, baa 'imɛ-isɛbwɛ na amɛ-tụhaŋtụ ata iwɛ bimbisegeni-ba-amɛ ubwa no ofwo Agwatana, asha tulubo-ti-biye tu ta.

²⁰Imbe i shɛ ụjɛrụma ibɛɛ, ti yaa shɛ ahia nda iwɛwɛ, nazhɛ oo hi kwuto, ahia ima-isɛbwɛɛ? Ama yaa shɛ ahia nda iyi ibiye, nazhɛ ahia kwụba ụbaụta, ahia ima-isɛbwɛ, inɛ ɛtɛ ibɛ Agwatana zhɛ ma hi pana uwebiye ibɛ.

²¹Iwɛ inɛ ɛtɛ du aa ga hi suyanɛ; iwɛnɛ ga Krast njɛ du ụbaụta iwɛ tu, bee hi gengeni tusakana ta ata maa hi 'wa ụpapụ ubwa.

²²Ga Krast njɛ shɛ iwɛwɛ kwukwuŋ o, tuhalakaka kaa tu zasaba nu unu ubwa o.

²³Okwo aka na aa twagajɛ bụ, bu tụpanɛ shɛ aŋ o, okwo aka na tu boo hioko ụbaụta, bu zweni shi aŋ inyɛsɛ o, ama bi meme peni bụtụ ata ba duma ụshɛrɛya u tishiriri.

²⁴Ubwa ni ikɛnyi ibwɛ 'waŋnɛ iwɛwɛ tu na tu'waba tu bwa nụ ụ'wụ'wụ ata,[11] iwɛ maa to 'wono iwɛwɛ, maa tuba ta shana tiririri buumwa. Tedure na tugwudaraga tu na aa gwudarajɛ bụ, ibɛ po ahiɛ zhɛmananɛ.

²⁵Hiɛ shɛ la gana agwụdụ na 'inɛ, ama hwuwayɛ hi gwure ya pa bi'iywa-ba-agwụdụ keeni bishiyeni-be-eshe bo shihwulu shi hiŋ.