Read bassa 1 PITA HIIŊ 5 Bible Online

1 PITA HIIŊ 5 - bassa bible

1 PITA HIIŊ 5

¹Gamba ni ikɛnyi mi na n shɛ iyɛri du, N shɛ kaa useyida ụbaụta Krast, Ngɛɛ zhɛ kaa du ma la hwuŋ urobwo ụjɛrụma ata ɛɛ zhɛ a kapɛshɛnga. Ma kaana n-nyarɛ[17] mu na mu namɛ na ashashɛ hiŋ ikɛnyi.

²Na nda ma u'iywa unyama wa Agwatana ata namɛ na ashashɛ hiŋ, no shiyono aŋ ma eshe. Kede i shɛ ni iji ɛɛ zhɛ ma hi nda nazhɛ hiɛ njɛ uŋ o, semi ga shɛ na tukwulana ti hiŋ.[18] Kede kaa i shɛ iwɛ tụtụpa tu ukwuribi o, ama ga shɛ na ahaŋsa na mama-'imɛ.

³Kede i shɛ gana maa na tuhakakana ahia ngbaraka aŋ o, ama sha ma atwa na unyama ata eri na shata.

⁴Aka na tu uhiu wa a'iywa-agwụdụ banɛ hwuŋ caakwụ, hi zhɛ hia lashɛga udara ụjɛrụma na lụmbɛ shɛ.

⁵Gobwonu du ahiɛba esemberi, no momo tulonono ma ụhwada n-nyarɛ. Ama no momo tulonono ma anya hiŋ kpaaŋ hiŋ. Urugono ma timeme-zucinje gana utogwo, iwɛnɛ ta Agwatana a sukakana anjɛ-unyanga, ama ba mapana tuba atwa na meme-zucinje iwɛ.

⁶Ibɛ po meme-zucinje ma tuta tu u'ala wa Agwatana na 'yajɛ ukpahiŋ ụ'wụtụ, iwɛ maa mo hi gombicingo hwuŋ na aka na teni cɛŋ.

⁷Na 'wanga bu ma shihwulu shi hiŋ tuhoroko hwɛɛ, iwɛnɛ ti yaa shɛ ubwa ma hi ngbaraka.

⁸Ge eshe hiŋ nama ndaụ, ne shiyono ma eshe, iwɛnɛ ta busukakanɛ ata hiŋ na shɛ gana bizeci, bo ngwulo, boo rungo, baa dwalakaka bụtụ na maa twala.

⁹Shikono ma dimi ne rishe-tɛtɛtana, maa hiɛ sukakanɛ bụ, gana na te ehi mepi maa miaụŋ-mo-bino hiŋ mu na mu namɛ nu unyizo mo hioko ụbaụta gana ga du.

¹⁰Ama na aba na ehi hieci ụbaụta na aka fwalaa, nazhɛ Agwatana tulubo-ti-biye kpaaŋ, na ihi suyanɛ maa hi teni nụ ụjɛrụma ubwa unyizo-nom tedure Krast Jisus, zhɛ ma hi ụrɛcɛnga ni ikɛnyi ibwɛ. Ubwa zhɛ mo hi shikicingo dimi, bi zhɛ ma hi pana ikɛnyi, bɛɛ zhɛ ma hi patana nu ukoshilo ubiye.[19]

¹¹Ga ụjɛrụma keeni ukpahiŋ ụ shɛ una ubwa tutu unyizo-nom. Ami.

¹²N hi 'nyatanɛ utakada ga ticwɛŋ, tedure ni i'ɛlɛ yɛu-bino tu tɛcara, ge Silvanos,[20] gana na ti Ngee heŋshi, maa ma hi kaana-ikɛnyi, maa du Ma la tiseyida maa inɛ gɛ i shɛ tulubo-ti-biye tu tugom. Shikono ma dimi na amɛ tuba.

¹³Tusotulonu tu na ee teri gana hiŋ, tu na tu namɛ nu Babulon, ta hi 'walụ, yɛu mi ga Mak, ma hi 'walụ du.

¹⁴Na mama 'walanụ ma na turuwanɛ te tijilo. Ga amɛ-olom nama ne hiŋ ahiɛba na hi namɛ na amɛ Krast Jisus kpaaŋ. Ami.