Read bassa 1 JON HIIŊ 4 Bible Online

1 JON HIIŊ 4 - bassa bible

1 JON HIIŊ 4

¹Ahiɛba atwa tulubo, ta na tɛtana ma mpiala mpiala rishe o, ama na yalaga ma mpiala, maa hi mepi okwo mu na ma Agwatana maa shɛ, iwɛnɛ te egesere tukata ofwugwo namɛ nu unyizo hwuwayɛ.

²Ni inɛ gɛ ehi eri hia mapa Mpiala ma Agwatana. Mpiala me elele na ma la tiseyida maa ge Jisus Krast zhajɛ na tu'waba ta butugwumwa, asha mu na ata mu banɛ no olugwo Agwatana.

³Mpiala me elele na kaa mi le shi Jisus Krast tiseyida maa bu zhajɛ na tu'waba ta butugwumwa, asha shɛ no olugwo Agwatana mu na ata mu banɛ o, mu na mu busukakanɛ Krast ta, mu gata ahiɛ hwụjɛ maa me ci ba, mu namwawaŋ ya nu unyizo cebe.

⁴A-miaụŋ mi mi, inee hiŋ shɛ atwa Agwatana ahiɛ shɛ, ibɛ po ahi lasụ mụ, iwɛnɛ ta bụtụ ata namɛ na shɛmɛ shi hiŋ[20] uhwuri bụtụ ata namɛ nu unyizo.[21]

⁵Atwa unyizo aa shɛ, ibɛ po aa duma iwɛ unyizo, unyizo kaa wa hwulagana aŋ.

⁶Inee tu shɛ atwa Agwatana atɛ shɛ. Bụtụ na mepi Agwatana, ubwa ba shɛlaga iwɛ tu; ama bụtụ na shɛ shɛ bụtụ ba Agwatana, bɛ shɛlajɛ shɛ iwɛ tu o. Tedure ni inɛ ɛtɛ, ibɛ ata mapa Mpiala mu tɛkana,[22] ata mapa kaa du mu na mi ti'ina.

⁷Ahiɛba atwa tulubo, tu no momo lubonu ma, iwɛnɛ to tulubo tu banɛ no olugwo Agwatana. Bụtụ be elele na bo lubo, asha ubwa Agwatana meci, bee mepi kaa du Agwatana.

⁸Bụtụ na lubi shi, asha bi mepi shi Agwatana o, iwɛnɛ ta Agwatana shɛ tulubo.

⁹Tedure ni inɛ gɛ, ibɛ Agwatana ti mbiseni tulubo tu bwa caakwụ, maa bu tumwanɛ Yɛu ibwɛ mokondo[23] utumwa nu unyizo, iwɛ maa ta 'yaga uraiŋ tedure nu bwa.

¹⁰Inɛ gɛ ibɛ i shɛ tulubo, i shɛ shɛ maa atuba tu lubi Agwatana o, ama ubwa tu lubi. Baa tumwanɛ kaa Yɛu ibwɛ maa sha iyi ụrụpɛ iwɛ maa ma tu gangana iwɛwɛ tu.[24]

¹¹Ahiɛba atwa tulubo, yaa shɛ Agwatana tu lubi i ci gana ata, asha tɛ shɛ tu momo lubonu du tilɛɛ.

¹²I zasa bụtụ na kwụbwa Agwatana kwukwuŋ, ama yaa shɛ otu momo lubonu, asha tulubo ta Agwatana tu namɛ na amɛ tu, asha tulubo ta ata tu bwa kaa tu ulwa na amɛ tu.

¹³Tedure ni inɛ gɛ, ibɛ eti mepi maa tu namɛ na amɛ Agwatana, baa namɛ kaa du na amɛ tu, iwɛnɛ bee ti peni Mpiala mu bwa.

¹⁴Tu kwụbwa, ata la kaa tiseyida maa Bishi tumwanɛ Yɛu ibwɛ nu unyizo, maa sha Bibicinji bu unyizo.

¹⁵Bụtụ be elele na ba la tiseyida maa ge Jisus shɛ Yɛu ya Agwatana, asha Agwatana namɛ na amɛ bụtụ ata, baa namɛ kaa du na amɛ Agwatana.

¹⁶Ti mepi, atɛ tɛtanɛ kaa rishe maa Agwatana tu lubi. Agwatana ubwa shɛ tulubo; bụtụ na 'yajɛ tulubo, asha bu namɛ du na amɛ Agwatana, Agwatana kaa du namɛ na amɛ bụtụ ata.

¹⁷Tedure ni inɛ gɛ, ibɛ tulubo tu ulwa no ofwo tu, iwɛ maa ta 'yaga hwuŋ eshe-hwoo nụ ụjita ụshɛrɛya, maa gana na tu ga Krast shɛ, maa ta sha du gana ata nu unyizo.

¹⁸Inyɛsɛ zasaba no tulubo, ama tulubo tu na tu ulwa ta bacɛnga inyɛsɛ; iwɛnɛ ti inyɛsɛ i shɛ iwɛ bụtụ na ɛɛ zhɛ a pana ulwapɛ. Bụtụ na kaa ba nda inyɛsɛ, asha a ta ụrɛcɛnjɛ shɛ tulubo na amɛ ubwa o.

¹⁹To lubo, iwɛnɛ ta Agwatana utu lubi hiiŋ.

²⁰Yaa shɛ bụtụ be elele hiɛŋ, Mo lubo Agwatana, boo imo kaa yɛu-bino bwa, asha bɛ shɛ bijwe-bụ-ụzagwụ. Bụtụ be elele na lubi shi yɛu-bino bwa nɛ baa kwụbɛ, asha bi eri shi[25] bo lubo Agwatana na baa kwụbɛ shɛ o.

²¹Agwatana ubwa ti peni-unu ata, maa bụtụ na bo lubo Agwatana, asha go lubo du yɛu-bino bwa.