Read bassa 1 JON HIIŊ 5 Bible Online

1 JON HIIŊ 5 - bassa bible

1 JON HIIŊ 5

¹Bụtụ be elele na tɛtanɛ-rishe maa ge Jisus ubwa shɛ ga Krast, asha ubwa shɛ yɛu ya Agwatana, bụtụ be elele na kaa bo lubo Bishi, asha bo lubo du yɛu ɛtɛ ibwɛ.

²Tedure ni inɛ gɛ, eti mepi maa to lubo miaụŋ ma Agwatana, ibɛ shɛ aka na oto lubo Agwatana, ata untangana kaa unu ubwa tụpana.

³Iyi nɛ i shɛ Agwatana tulubo na, ibɛ shɛ maa ga tu na untangana unu ubwa tụpana. Unu ubwa tụpana kaa shɛ shɛ i'wɛŋnɛ nɛ zhineni o.

⁴Iyi elele nɛ kaa Agwatana meci, ya lasụ unyizo. Tulasụ tu na atu lasụ unyizo na, ibɛ shɛ rishe ru tu tɛtɛtana.

⁵Gaaba shɛ bụtụ ata ba lasụ unyizoo, ti yaa shɛ shɛ bụtụ na tɛtanɛ-rishe maa ge Jisus ubwa shɛ Yɛu ya Agwatanaa?

⁶Ge Jisus Krast ubwa shɛ bụtụ na zhajɛ ne meni keeni mehieŋ,[26] shɛ ne meni kiri o, ama ne meni keeni mehieŋ du, Mpiala tuba ubwa ba la tiseyida, iwɛnɛ Mpiala mɛ shɛ iwɛ-tɛkana.

⁷Eseyida ga atatụ aba a la tiseyida.[27]

⁸Eseyida atatụ namba a na a la tiseyida: Mpiala, ne meni keeni mehieŋ. Tiseyida tu na eseyida ga atatụ a la tɛ shɛ tiseyida tu ko.

⁹Yaa shɛ ata tɛtana tiseyida tu na atwa a la rishe, asha tiseyida tu na Agwatana a la tuba tu hwuri ma tu ta atwa. Tiseyid ta Agwatana na, maa ubwa le Yɛu ibwɛ tiseyida.

¹⁰Bụtụ be elele na tɛtanɛ Yɛu ya Agwatana rishe, asha bi 'yajɛ tiseyida ta ata na amɛ ubwa. Ama bụtụ na tɛtanɛ shɛ Agwatana rishe, asha bɛ njɛ Agwatana bijwe-bụ-ụzagwụ, iwɛnɛ tu baa tɛtanɛ shɛ tiseyida tu na Agwatana le Yɛu ibwɛ rishe.

¹¹Iyi nɛ i shɛ tiseyida ta ata na, maa Agwatana iti peni uraiŋ unyizo-nom. Uraiŋ ata kaa banɛ no olugwo Yɛu ibwɛ.

¹²Bụtụ be elele na 'yajɛ yɛu ɛtɛ, asha bi 'yajɛ uraiŋ; ama bụtụ na zasa Yɛu ya Agwatana, asha bu zasa uraiŋ ata o.

¹³N hi 'nyatanɛ ijɛ ahiɛba na hiɛ tɛtanɛ Yɛu ya Agwatana rishe, maa hi mepi maa hi 'yajɛ uraiŋ unyizo-nom.

¹⁴Eshe-hwoo na ati 'yajɛ no ofwo Agwatana na, maa yaa shɛ ata lụpa bu iyi elele te teneni bu cɛŋ, asha bi zhɛ ba hwuga iwɛ tu.

¹⁵Yaa shɛ kaa eti mepi maa Agwatana a hwuga iwɛ tu, asha iyi elele nɛ atụ lụpɛ bụ, asha ti mepi maa bi zhɛ ma tu pana ijɛ ɛtɛ atụ lụpɛ bụ.

¹⁶Yaa shɛ bụtụ be elele kwụbɛ ti yɛu-bino bwa ya nda iwɛwɛ nɛ i shɛ shɛ inɛ tu'wo, ga lụpa Agwatana, nazhɛ Agwatana zhɛ a pana bu[28] uraiŋ, shɛ iwɛ atwa na a nda iwɛwɛ nɛ i shɛ inɛ tu'wo. Iwɛwɛ ike namba i shɛ inɛ tu'wo, shɛ iwɛ inɛ gɛnɛ ɛtɛ Ngɛɛ hiɛŋ ga na lụpa Agwatana iwɛ ibɛ o.

¹⁷Iyi elele nɛ zasa ririri i shɛ iwɛwɛ. Iwɛwɛ ike namba i shɛ shɛ inɛ tu'wo.

¹⁸Ti mepi maa bụtụ be elele na Agwatana meci, uranjɛ shɛ iwɛwɛ tɛnda o, ama Yɛu ya Agwatana yo shiyono bụtụ na Agwatana meci eshe, bụtụ ata bụ wɛ kaa eri shi bo tumongono bu o.

¹⁹Ti mepi maa tɛ shɛ atwa Agwatana, ama unyizo hwɛɛ tuba wetiteni ukpahiŋ ụ bụtụ ata bụ wɛ.

²⁰Ama ti mepi maa Yɛu ya Agwatana zhogwo; bee ti peni kaa ti'eshicigo maa ta mapa Agwatana na shɛ bụtụ ata bu tɛkana. Tu namɛ kaa na amɛ bụtụ ata bu tɛkana, ibɛ shɛ na amɛ Yɛu ibwɛ ge Jisus Krast, na shɛ Agwatana tɛkana, ubwa kaa shɛ uraiŋ ata unyizo-nom.

²¹A-miaụŋ mi mi, no momo shiyono ma eshe, iwɛ maa kede i'ɛlɛ hiŋ nama na tuwa tɛnda o.