Read bassa AJƐMƐ-ỤSHƐRƐYA 10 Bible Online

AJƐMƐ-ỤSHƐRƐYA 10 - bassa bible

AJƐMƐ-ỤSHƐRƐYA 10

¹Na aba na tu ga Abimɛlɛk 'wi, go Tola yɛu Pua, bụjalụ Dodo na shɛ bụtụ bụ ụlamụ Isaka ishijɛ maa lashaga atwa Isrɛl. Bɛ jɛjɛ la ni Shemi na namɛ na cɛnjɛ ti ishɛmɛ Ifrem.

²Bɛ 'yagajɛ atwa Isrɛl shiywa woshi-na-shɛba-shɛ-tatụ, nazhɛ bee 'wi, ee ni bu ni Shemi ata.

³Bụtụ na 'wa Tola i shɛ ge Jei, na banɛ ni Giliad, baa 'yagajɛ atwa Isrɛl shiywa woshi-na-shɛba-shi-yebi.

⁴Bi meci miaụŋ talacɛ, mu na ma suka du nzhinyacɛ talacɛ, a 'yajɛ kaa du ashɛpwụ talacɛ, anaa na oo po izeci maa, Ashɛpwu Jei taa hwayɛ. A namɛ na cɛnjɛ ti Giliad.

⁵Aka na ge Jei 'wi, ee ni bu ni Kemon.

⁶Atwa Isrɛl ndaananɛ AGWANGWAMA iwɛwɛ, na tɛzhɛba tu na aa zhɛba tuwa ti Beal keeni Ashtarot, tu na tɛ shɛ tuwa ta Asiriya, na Asaidụn, na Amoab, na A'amon keeni Afilistia, ee jineci AGWANGWAMA tɛzhɛba.

⁷AGWANGWAMA njɛ isɛbwɛ na atwa Isrɛl, bee sengeni aŋ Afilistia keeni A'amon.

⁸Atwa ata njɛ atwa Isrɛl umungwuta shiywa umpwa-na-shɛba-shɛ-tụndatụ. Atwa ata pɛpɛtanɛ atwa Isrɛl elele a na namɛ hileniye Urefu Jodan, na cɛnjɛ ta A'amon tu na tu namɛ ni Giliad.

⁹A'amon keshi Jodan maa a sukakanɛ ụlamụ Juda, nu una Bɛnjamin keeni una Ifrem nu ujasa. Gabata atwa Isrɛl namɛ ne tiriri tụ 'wụtụ.

¹⁰Ibɛ po atwa Isrɛl ugananɛ AGWANGWAMA, ɛɛ hiɛŋ bụ, Tụ bụ njɛ iwɛwɛ, iwɛnɛ eti bi jineci gabụ Agwatana tu, ata zhɛba tuwa ti Beal.

¹¹Ibɛ po AGWANGWAMA hiɛŋ atwa Isrɛl, Shɛ Gamba suu N hi lɛshijɛ na atwa Ijipti keeni A'amo keeni A'amon keeni Afilistia,

¹²ta Asaidụn, ta Amalɛk, keeni Ameon, a na ihiɛ njɛ la umungwuta? Nazhɛ ehi n keri ụhiɛŋshɛ, Ngɛɛ hi lɛshijɛ ni i'ɛlɛ ya aba.

¹³Ama hi te me jineci waa, ahia zhɛba tuwa, iwɛbɛ po Ngaa zha shɛ ma hi lashɛga ya.

¹⁴Zhaga ma maa hi ugananɛ tuwa ta ata ehi meme teleji maa ti hi leshiji ne tiriri ti hiŋ.

¹⁵Ama atwa Isrɛl jishijɛ AGWANGWAMA, ɛɛ hiɛŋ, Tɛ njɛ iwɛwɛ. Ɛtɛ njɛ gana na ụbụ kwụlanɛ, ama kaa ta bụ tabwa maa iti leshiji hwayɛ ga.

¹⁶Nazhɛ aa 'wɛŋ ga tuwa ta ata aa ga 'yajɛ na ashashɛ aba, aa zhɛba ya AGWANGWAMA. Nazhɛ amɛ AGWANGWAMA hashɛganụ iwɛ tiriri ta atwa Isrɛl.

¹⁷Ibɛ po A'amon mama imanụ, ee jwe ugba wa aba ni Giliad. Atwa Isrɛl tuba jwe ugba wa aba oo sotulonu ni Mizpa.

¹⁸Nazhɛ atwa na shɛ ehwurembe Giliad mama hiaŋnụ, Gaaba zhɛ bo hwulo umbe maa kwuno A'amon tusukakana hiiiŋ? Bụtụ ata ubwa zhɛ ba sha hwuŋ uhiu wa atwa elele na jɛjɛ ni Giliad kpaaŋ.