Read bassa AJƐMƐ-ỤSHƐRƐYA 16 Bible Online

AJƐMƐ-ỤSHƐRƐYA 16 - bassa bible

AJƐMƐ-ỤSHƐRƐYA 16

¹Jitoo ko ga Samson zhe nụ ụshɛpwụ ụ'wụtụ wa Afilistia uko na ɛɛ hiɛŋ Gaza, baa kwụbɛ buwɛle bu ko apata, bee weci nu bwa.

²Ee mbishi atwa Gaza maa, Ga Samson zhajɛ epe, ee hweri bu apata oo rungwutwonu, ee gwubeji bu swɛɛ no odubo ụshɛpwụ ata tutu uvwungwa. Ɛɛ hiɛŋ, Mizha ti 'yaka bụ ma epe uuwa gu uvwungwa, maa tụ kwụnɛ bụ ma.

³Ama ga Samson weci uuwa ụjita dwonu, nazhɛ bɛɛ ishijɛ bee mushenji ogbogolo ata ee kepi odubo uba, ta atukpa ubwa eyebi, ti imbele ɛtɛ aa kapa aŋ hwɛɛ, baa 'waŋnɛ iŋ no otutu ubwa bee zhe ni ihiŋhiŋ bikpekwu ata namɛ geri bi Hibron.

⁴Na aba inɛ gɛ, ga Samson kwuni biyikwo bu ko na namɛ nu ulomu Sorik tulubo, ɛ hiɛŋ izeci biyikwo ata ge Dilila.

⁵Shɛgwuma sha Afilistia shɛ ta shi zhajɛ pe biyikwo ata, ɛɛ hiɛŋ bụ, Insa Samson maa mo bu mbiso ofwo na ukpahiŋ ata ubwa namɛ, maa ta mapa gana na maa ta ala bụ, maa to umpo bu. Bụtụ bụtụ tu zhɛ ma bụ pana azụrụfa arinya akpakwụ-a-ta-ni-dipi-yebi (1,100).

⁶Jitoo ko, ge Dilila hiɛŋ Samson, Gana naa kwuuŋ abɛ njɛ abu 'yajɛ ukpahiŋ ga bụ ụ'wụtụ 'wụtụụ? Gana naa atwa eri a nda maa e bi eri tu'umpoo?

⁷Ga Samson hiɛŋ bụ, Yaa shɛ ee n umpi ni i'wɛbɛ itɛ ifwo icenje nɛ te hweteni shi, asha N zhɛ mo lwogo, ma sha ya gana bụtụ bo ohondo.

⁸Nazhɛ Shɛgwuma sha Afilistia shi sugeni Dilila i'wɛbɛ ebe itɛ ifwo icenje nɛ te hweteni shi, bee umpi bu ni ibɛ.

⁹Tobwolo biyikwo ata intwanua etwenyi oko na amɛ umwono ubwa. Bɛɛ hiɛŋ, A-Samson, Afilistia ye e ci o! Ama ga Samson dwetweji i'wɛbɛ ɛtɛ itɛ gana bumasa bu uhwohwo bizhe na ulwa hwoŋzhinji. Taa hwayɛ e te mepi shi waa ofwo na ukpahiŋ ubwa namɛ o.

¹⁰Ge Dilila hiɛŋ Samson, Kwụba ta abu ma nda ilɛgwu, abu ma dwatwagana cibɛ, sukwu m mbishi gana na e eri mo bu umpo.

¹¹Ga Samson hiɛŋ bụ, Yaa shɛ ee n umpi ni ihwehwe ifwo nɛ aa ta njɛ shɛ iyi ni ibɛ kwukwuŋ, asha N zhɛ mo lwogo ma sha ya gana bụtụ be elele.

¹²Ge Dilila suje ga ihwehwe ebe ifwo bee umpi bu ni ibɛ, bɛɛ hiɛŋ bụ, A-Samson, Afilistia ye e ci o! Etwenyi ebe biyikwo ata ge sweci na amɛ umwono ubwa ta kaa ta namɛ. Ama bi jejeji ihwehwe ɛtɛ ni i'ɛlɛ gana maa bumasa bu uhwohwo bizhe.

¹³Ge Dilila hiɛŋ Samson, Bu ta ma halakaka, abu ta ma dwatwagana cibɛ, taa hwayɛ. M mbishi de gana na e eri mo bu umpo. Ga Samson hiɛŋ bụ, Yaa shɛ ebi pieci tihiŋzhe ti mi ti cenje obu to tu bulokwo, maa to tu igbɛlu nụ ụ'wụ'wụ ata aa na tugwuno dimi, nazhɛ Ngɛɛ zhɛ mo lwogo Ma sha ya gana atwa vwɛ.

¹⁴Aka na tu ga Samson bo woto malabụ, ge Dilila suji ga tihiŋzhe tu bwa ti cenje boo to bulokwo, boo to tu igbɛlu nụ ụ'wụ'wụ ata aa na tugwuno dimi.[41] Bɛɛ hiɛŋ bụ, A-Samson, Afilistia ye e ci o! Ama aka na bɛɛ zhinjɛ, bee mushinji ti igbɛlu ɛtɛ, to bulokwo ata bụ ụ'wụ'wụ tugwuno, ti ihwehwe ɛtɛ ee ge zweni tugwuno ta ata.

¹⁵Biyikwo ata hiɛŋ bụ, Gana naa ebi eri bɛ hiɛŋ maa bu mo lubo, tobwolo ahaŋsa bu kaa zasaba ne mii? Karɛ tatụ na ebi n helekeci ya. Bi m mbishi shi kaa gana na abɛ njɛ abụ 'yajɛ ukpahiŋ ga bụ o.

¹⁶Ama gana na tu baa zuga bụ nu n-ndumwa ma ata iyi-heri, i shɛ maa tu'wo ti debegeni bu ya uhwuri tu'uranga tu na biyikwo ata uranjɛ bụ.

¹⁷Ga Samson mbishi ya biyikwo ata iyi elele nɛ namɛ na amɛ ubwa hwɛɛ. Bɛɛ hiɛŋ bụ, Igwuzhi u'nyanga te timengeni shi uhiuhiu mu kwukwuŋ, iwɛnɛ ti Ngee meme shileni Agwatana swooŋ taa na amɛ bino mi. Yaa shɛ aa n 'nyanjɛ, asha N zha shɛ ma 'yaga ya ukpahiŋ o, N zhɛ mo lwogo ma sha ya gana bụtụ be elele du.

¹⁸Aka na ti ge Dilila kwụbɛ ya maa bi kepishingeni bu amɛ ubwa hwɛɛ. Baa tumwanɛ Shɛgwuma she ebe sha Afilistia, bɛɛ hiɛŋ aŋ, Munje ma ya kpalụ ko gba, iwɛnɛ po bi m mbishi ya iyi nɛ namɛ na amɛ ubwa hwɛɛ. Nazhɛ Shɛgwuma sha Afilistia shi munje pu bwa, aa 'waŋnanɛ bụ du ukwuribi ata.

¹⁹Nazhɛ biyikwo ata peteni uhiuhiu Samson no unto mu bwa, ga Samson leyi malabụ. Ge Dilila suyanɛ bụtụ bu ko, maa ga 'nyanga Samson tihiŋzhe ta ata tu bwa ti cenje ti pieci.[42] Nazhɛ bee kwuni ya Samson ụbaụta tụpana, tobwolo ukpahiŋ Samson gongwo bu.

²⁰Ge Dilila suyanɛ bụ, bɛɛ hiɛŋ, A-Samson, Afilistia ye e ce o! Ga Samson zhinjɛ malabụ, bee heŋshi, bɛɛ hiɛŋ, N zhɛ ma bana gana na Ama shana Ama nda, maa M momo zhingotono, maa mo hwulo. Ama bi mepi shi maa AGWANGWAMA gongwo bu o.

²¹Afilistia 'imɛ bụ ee hwuceci eshe ubwa, ee shepi bu ee zucinji nu Gaza, ee umpi bu ne shigbo shɛ ɛtumburɛ. Apata baa naka ya inɛkɛ ni izhɛrɛ umwono-tishi.

²²Ama tihiŋzhe tu bwa tu kwuneneni tusabɛ, iwɛnɛ ta a 'nyanjɛ bụ la.

²³Na aka ga ibɛ Shɛgwuma sha Afilistia shɛ ụlwatagwụ maa o to ụrụpɛ uko ụ'wụtụ na tuwa ta aba tu na ɛɛ hiɛŋ, Dagon, maa e bweji du unyasa, iwɛnɛ tɛ ɛ hiɛŋ, Tuwa tu tu ti ti imɛnjɛ bụtụ tu bi i'ime ga Samson.

²⁴Aka na ta atwa ata kwụbɛ Samson, aa shɛtangana tuwa ta aba, ɛɛ hiɛŋ, Tuwa tu tu ti ti imɛnjɛ bụtụ tu bi i'ime, na ga nda cɛnjɛ tu tu ufwu. Bi ge tu hwuwi tụkwụna.

²⁵Aka na tu u'waba hiɛ aŋ ya kpaaŋ, ɛɛ hiɛŋ, Suyanɛ ma Samson maa ma tu ndana tụlagwụ. A suyanɛ ga Samson, baa banɛ nu umwono-tishi, baa ndanɛ aŋ ga tụlagwụ ne eshe aba. Ee shikicinji bu na ashashɛ atukpa eyebi.

²⁶Ga Samson hiɛŋ yɛu-ye-eyi nɛ untanganɛ bụ u'ala, Me ci ba de mo tumongono atukpa ga untanganɛ umwono ga, maa Ma layitana aŋ.

²⁷Atwa kaa shini nu umwono ata, te etwenyi te eyikwo. Shɛgwuma sha Afilistia kpaaŋ kaa shi namba apata. Atwa na kaa patanganɛ tu ukogo umwono ata, a na ngbarakacɛ Samson tu baa nda tụlagwụ, a shɛ gana atwa ugbaa-na-akpakwụ-a-ta, (3,000), te etwenyi te eyikwo.

²⁸Nazhɛ ga Samson suyanɛ AGWANGWAMA, bɛɛ hiɛŋ, Oo AGWANGWAMA, Ma bụ tabwa maa n teyinje, Oo Agwatana ma bụ tabwa n gwuricingeni ukpahiŋ mu, na aka ga oko gba, iwɛ maa Ma nda itɛpwɛ no ofwo Afilistia iwɛ eshe mi eyebi a na ee hwuceci.

²⁹Ga Samson 'imɛ atukpa ata eyebi anaa na 'waŋnɛ umwono ata, bee leyiteni aŋ tu uzhinono ubwa hwɛɛ. Baa untanganɛ una uko nu u'ala ubwa ubiye, baa untanganɛ una uyebi nu u'ala ubwa ugwulwo.

³⁰Ga Samson hiɛŋ, Go mo 'wo medenji Afilistia! Bee shishingeni aŋ gana elele na tu ukpahiŋ ubwa namɛ hwɛɛ. Ibɛ po umwono ata hwuŋzwo, waa 'imɛ Shɛgwuma sha ata, medenji atwa elele na ge zweni nu bwa. Atwa na ga Samson kwụnɛ jita ata bee 'wi e hwuri atwa na baa kwụnɛ la tu baa ta ya uraiŋ.

³¹Nazhɛ miaụŋ-mo-bino mu bwa, ta atwa umwamwa ubwa zwe ee shepi ru'wo ru bwa ee munji, ee ni bu na ashashɛ Zora ni Ishtaol nu u'uye bishi bwa ga Manoa. Bi 'yagajɛ atwa Isrɛl shiywa woshi.