Read bassa AJƐMƐ-ỤSHƐRƐYA 17 Bible Online

AJƐMƐ-ỤSHƐRƐYA 17 - bassa bible

AJƐMƐ-ỤSHƐRƐYA 17

¹Bụtụ bu ko namba la ne bikpekwu ba cɛnjɛ ti Ifrem, ɛɛ hiɛŋ izeci ibwɛ ga Maika.

²Bɛɛ hiɛŋ bino bwa, Azụrụfa ata bụ akpakwụ-a-ta-ni-dipi-yebi (1,100) ee zunji la, agata ebi zhe la tuwa ta aba, Ngaa hwụjɛ du na acɛbɛ mi. Gamba la N suji aŋ, a namba pi mi. Bino bwa hiɛŋ bụ, Ɛ-yɛu mi, ga AGWANGWAMA ibi peni-uwebiye.

³Ibɛ bee gwuricingeni bino bwa azụrụfa ata akpakwụ-a-ta-ni-dipi-yebi. Bino bwa hiɛŋ bụ, N ngo shilwonuo la AGWANGWAMA azụrụfa ata swooŋ iwɛ maa yɛu mi njɛ itɛtɛnuwɛŋ i tɛshaba keeni inɛ tuma na aba. Yaa shɛ gana ata asha N zhɛ me bu gwuricingeni aŋ, iwɛ maa tuba kede unu-tukalana ata ụbụ 'imɛ o.

⁴Ga Maika gwuricingeni bino bwa azụrụfa ata. Nazhɛ bino bwa suji azụrụfa ata kpakwụ (200) bee peni bụlụma ba azụrụfa baa njɛ itɛtɛnuwɛŋ i tɛshaba keeni inɛ tuma, bee suji mu bee tileni nu umwono Maika.

⁵Ga Maika ga kaa 'yajɛ ofwo ubwa tɛzhɛba, baa ndanjɛ tuwa bee tilegeni apata keeni efod.[43] Bee teri yɛu ibwɛ ye eyi ike, baa shɛ bunongbo bwa.

⁶Agwuma elele zasaba la ni Isrɛl na aka ata o, ibɛ po bụtụ bụtụ ba nda iyi nɛ kwụlanɛ bụ ne eshe ubwa.

⁷Usemberi uko na shɛ Bulivai sụmɛ la ni Bɛtlɛhɛm Juda na aka ata, ubwa kaa du namɛ nu umwamwa Juda.

⁸Ibɛ bụtụ ata gɛnjɛ Bɛtlɛhɛm Juda, maa gwushigo ofwo oko na bee eri ba nama. Gana na tu baa zha tahaŋnụ tu bwa, bee ci cɛnjɛ te bikpekwu bi Ifrem bu umwono Maika.

⁹Ga Maika heŋteni bu, bɛɛ hiɛŋ, Cee abu banɛɛ? Bɛɛ jishijɛ bụ, bɛɛ hiɛŋ, N shɛ Bulivai na banɛ ni Bɛtlɛhɛm Juda. Ibɛ po Omo rungo maa Ma kwụba ofwo na maa Ma nama.

¹⁰Ga Maika hiɛŋ bụ, Asha gɛga pi mi, maa shɛ ya bishi mi, maa shɛ du bunongbo mi. N zhɛ tuba mu na bụ tụpa azụrụfa umpwa uywa uywa. N zhɛ du mu na bụ pana i'wɛŋnɛ bu tu'urugono, ti iyimɛyɛ bụ.[44]

¹¹Bulivai ata leni maa gɛga nu bwa. Ibɛ usemberi ata shɛ ya gana yɛu ibwɛ ike.

¹²Ga Maika teri Bulivai ata baa shɛ ya bunongbo bwa, baa jɛjɛ ya ni ihwɛ Maika.

¹³Nazhɛ ga Maika hiɛŋ, M mepi ya hwuwayɛ go maa AGWANGWAMA zhɛ a nda maa iyi elele i n zhɛmanɛ, iwɛnɛ ta Bulivai shɛ bunongbo mi.