Read bassa AJƐMƐ-ỤSHƐRƐYA 19 Bible Online

AJƐMƐ-ỤSHƐRƐYA 19 - bassa bible

AJƐMƐ-ỤSHƐRƐYA 19

¹Na aka na ta agwuma ta zasaba la ni Isrɛl, ibɛ Bulivai bu ko na jɛjɛ taa dụlụ ne bikpekwu ba cɛnjɛ ti Ifrem, shepi yɛu-yo-o ike Bɛtlɛhɛm Juda, baa njɛ bụ biyikwo bwa bu magɛgashɛ.

²Ibɛ biyikwo ata njɛ isɛbwɛ nu bwa, bee genji bu bee hwuri baa jɛjɛ ni ihwɛ bishi bwa ni Bɛtlɛhɛm Juda, baa namɛ apata ipiɛnɛ ineshi.

³Nazhɛ bwolo bwa ishijɛ, abana na bujama bwa bu ko keeni nzhinyacɛ mi yebi, baa 'wa bụ maa lomicingo bu amɛ, maa jiye. Bee zhe bee ci ihwɛ biyikwo ata.[49] Aka na te bishi biyikwo ata kwụbɛ bụ, bɛɛ tɛjɛ bụ uhwaŋna, boo to bu amuraba nu unyasa.

⁴Binua ata bwa na shɛ bishi biyikwo ebe, gɛgɛcɛnjɛ bụ, baa namɛ apata nu bwa ijitɛ itɛtu, boo zokwu apata, baa ya iyi, baa swa, boo woto apata.

⁵Ama nụ ụjita uneshi, baa gbatụ ti'ishijɛ nu uvwungwa, baa mama imanjɛ maa hwulo. Ama bishi bi yɛu ɛtɛ yo o hiɛŋ binua ata bwa, Ya tugwo iyimɛyɛ maa 'yaga ikɛnyi nazhɛ hwuri ujiyo.

⁶Ibɛ po etwenyi ata eyebi yɛ iyimɛyɛ, ee swe iyi tuswa. Bishi bi yɛu ɛtɛ yo o hiɛŋ bụtụ ata, Ga amɛ bụ lemi maa woto epe nụ ụrụmɛ go, maa njɛ unyasa.

⁷Aka na ta bụtụ ata ishijɛ maa hwulo, binua bwa uranjɛ bụ maa gɛga, uuwa bee weteneni ga apata.

⁸Baa gbatụ ti'ishijɛ nu uvwungwa nụ ụjita utana maa hwulo. Binua ata bwa hiɛŋ bụ, Sukwu, gɛga tugwo maa yɛ iyi maa 'yaga ikɛnyi tutu uwaŋna ụrụmɛ. Ibɛ atwa ata eyebi yɛ iyi.

⁹Aka na ta bụtụ ata ishijɛ, te biyikwo bwa keeni bujama bwa maa e hwuri ya. Binua bwa hiɛŋ bụ, Ụrụmɛ shɛ ya iyi rimeni ga, ma bụ tabwa maa woto iyi heri, maa amɛ bụ gwuriseni. Beyi ga ba gbatụ ya tahaŋnụ tụ bụ ti'ishɛga nu uvwungwa maa hwuri ujiyo.

¹⁰Ama bụtụ ata jeri shi maa woto ya apata nụ ụrụmɛ ata o. Bɛɛ ishijɛ, te biyikwo bwa, tu nzhinyacɛ mu bwa mi yebi, mu na ee petengeni efuridi, aa sala Jɛbus, (ubwa gatata shɛ Jɛrusalɛm).

¹¹Aka na to o gwumwonu ni Jɛbus, ụjita kaa gwumwonu tisho. Bujama bwa hiɛŋ bụ, Hwure tụ vwụrɛ ma nụ ụshɛpwụ ga wɛ Ɛjɛbus maa tu woto ma maa iyi heri.

¹²Ama agwuma-ihwɛ ibwɛ hiɛŋ bụ, Kede tụ vwụrɛ ma nụ ụshɛpwụ na shɛ shɛ una wa atwa Isrɛl o, ama ti zhɛ ta kashɛka ta zha Gibia.

¹³Bɛɛ hiɛn bujama bwa, Hwure ti keeni ma izhɛ ti ci ma Gibia kwo kaa Rama maa tu woto ma apata.

¹⁴Ee keshici ga ee hwuri. Ama uwaŋna teneni aŋ to o gwumwonu ni Gibia na shɛ una Bɛnjamin.

¹⁵Aa vwụrɛ ni Gibia ata maa o woto apata nụ ụjita ata. Bee teni na amɛ ụshɛpwụ ata, baa jɛjɛ nu ukpekiti ụshɛpwụ ata, iwɛnɛ ti yaa zasa bụtụ be elele na leshiji aŋ maa o woto ni ihwɛ ibwɛ.

¹⁶Aa kwụbɛ ti iyɛri ike ye ci ujiyo ehilo ubwa ụrụmɛ. Bụtụ ata banɛ na cɛnjɛ te bikpekwu bi Ifrem, bɛɛ sumɛ ni Gibia. (Ama etwenyi na namɛ apata tuba a shɛ atwa ụlamụ Bɛnjamin.)

¹⁷Iyɛri ɛtɛ shepi eshe baa kwụbɛ aŋ taa jɛjɛ taa dụlụ nu ukpekiti ụshɛpwụ ata. Bee heŋteni bu, bɛɛ hiɛŋ, Ce abu banɛɛ? Ce tuba ɛbi zhɛɛ?

¹⁸Bɛɛ jishijɛ bụ, bɛɛ hiɛŋ, Ti ge zhe Bɛtlɛhɛm Juda, ɛti zhɛ ya ujiyo na cɛnjɛ te bikpekwu bi Ifrem, apata shɛ ihwɛ mi.[50] I zasa kaa bụtụ be elele n leshiji maa Mo woto ni ihwɛ ibwɛ nụ ụrụmɛ go.

¹⁹Ti ga 'yajɛ yibwa ambɛ keeni iyimɛyɛ iwɛ nzhinyacɛ mu tu, ti 'yajɛ du iyimɛyɛ keeni meni ma afwafwa iwɛ mi, ti iwɛ biyikwo ga mi keeni iwɛ usemberi ga zhagajɛ no tu. I ga zasa iyi elele i ti 'nyananɛ o.

²⁰Iyɛri ɛtɛ hiɛŋ bụ, Ga amɛ bu lemi, hwure ma ni ihwɛ mi, N zhɛ ma hi 'ima u'ala, ama to woto ma tuba nu ukpekiti ga nụ ụjita go.

²¹Bee suji aŋ ga, bee tecinji aŋ ni ihwɛ ibwɛ, bee peni nzhinyacɛ iyimɛyɛ. Agaiŋ ata ubwa fwoci shivwɛvwɛjɛ sha aba, nazhɛ aa yɛ iyimɛyɛ, ee swe meni.

²²Gana na ta shɛmɛ sha aba shi gwuriseni suu, aa kwụbɛ te etwenyi oko ụshɛpwụ ata a na shɛ ogworozwo rungwutwonu umwono ata, oo dubo ukpa. Ɛɛ hiɛŋ iyɛri ɛtɛ i shɛ agwuma-ihwɛ ɛtɛ, Bɛcinjɛ butubwenyi ga teni ni ihwɛ gɛ bu, maa to woto nu bwa.

²³Agwuma-ihwɛ ɛtɛ beni bee zhe no ofwo aba no tupohondo, bɛɛ hiɛŋ aŋ, Ahiɛba eyejilo mi, ta nda ma iyi iwɛ i ci gana ga o! Bụtụ ga shɛ bugaiŋ mi na kaa twonuo nu umwono mu.

²⁴Kwụba ma yɛu mi yo o nɛ te mepi shi butubwenyi namba keeni biyikwo bu magɛgashɛ ba bụtụ ga, me ci ba ma hiɛ bacɛnganɛ aŋ hwuwayɛ go maa hiɛ njɛ aŋ gana elele na ihiɛ kwụlanɛ. Ama ta nda ma tupwaŋ ne butubwenyi ga o!

²⁵Ama etwenyi ata shiri shi acɛbɛ nu n-ndumwa mu bwa o. Ibɛ po Bulivai ata bacɛnganɛ aŋ biyikwo ebe bwa bu magɛgashɛ, ee kwuci bu ne buweci uuwa gi iyi yo holo. Ama gana na ti iyi kwuni tusuje, ee keri bu bee hwuri.

²⁶Ama gana na te biyikwo ata zhajɛ bee leyi no odubo umwono wa agwuma-ihwɛ ɛtɛ nɛ bwolo bwa namɛ. Baa namɛ apata uuwa iyi suji kpataa.

²⁷Aka na ti iyi heri ya, bwolo bwa ishijɛ bee kepishinji odubo umwono ata, tu baa banɛ maa hwulo ya tahaŋnụ tu bwa. Baa kwụbɛ te biyikwo ebe bwa weci no odubo umwono ata; bee petengeni i'ɛlɛ ibwɛ ni idwɛtwɛ ɛtɛ yo odubo.

²⁸Bwolo bwa hiɛŋ bụ, Ishijɛ, tu hwuri ma. Ama bɛ jɛshɛjɛ shɛ bu o. Bee shepi ru'wo ru bwa bee betiteni na aba izhinyɛci ibwɛ, bee hwuri ujiyo ni ihwɛ ibwɛ.

²⁹Aka na ti bee ci ihwɛ, bee shepi igwuzhi bee seshenji biyikwo ebe bwa bu magɛgashɛ orubwo umpwa-na-ba-eyebi, baa tumwanganɛ tụ ne ekpekpe Isrɛl hwɛɛ.

³⁰Atwa elele na kwụbɛ iŋ, ɛ hiɛŋ, Iyi gɛnɛ gɛ ta njɛ shɛ la kwukwuŋ, a ta kwụbɛ shɛ la kaa du iyi gɛnɛ gɛ okwo te kwuni aka na ta atwa Isrɛl banɛ na cɛnjɛ ti Ijipti tutu i ci aka ga o. Haŋsa ma iwɛ ibɛ! Nda ma ushaura ibɛ! Imbe ɛti zhɛ ta nda iwɛ ibɛɛ!