Read bassa AJƐMƐ-ỤSHƐRƐYA 20 Bible Online

AJƐMƐ-ỤSHƐRƐYA 20 - bassa bible

AJƐMƐ-ỤSHƐRƐYA 20

¹Ibɛ po atwa Isrɛl kpaaŋ banɛ nu Dan, ee zhe Biɛshiba, medenji atwa cɛnjɛ ti Giliad, aa ụlwatagwụ na agba AGWANGWAMA ni Mizpa hwɛɛ aba gana maa bụtụ bu ko.

²Nazhɛ ehwurembe alamụ atwa Isrɛl kpaaŋ ụlwatagwụ no tusotulonu ta ata ta atwa Agwatana. Asaza na 'waŋnɛ otokwobi a na zhe ni ivwunɛ namɛ atwa igbɛɛ-akpakwụ-eyebi (400,000).

³Aka na ta atwa ụlamụ Bɛnjamin hwụjɛ maa bwonu atwa Isrɛl oko zhe Mizpa. Ibɛ po atwa ata Isrɛl hiɛŋ aŋ, Iti mbishi ma de gana na ijɛ ɛtɛ tugworozwo njɛ yee teni.

⁴Ibɛ po Bulivai ata na shɛ bwolo biyikwo ata aa kwụnɛ jishijɛ aŋ, bɛɛ hiɛŋ, Gamba ne biyikwo mi bu magɛgashɛ, ti zhajɛ eti ci Gibia ata namɛ ni Bɛnjamin, maa to woto apata nụ ụrụmɛ ata.

⁵Nazhɛ etwenyi Gibia zhajɛ, oo rungwutwonu umwono ata, aa n sukakanɛ nụ ụjita ata. E heŋshi maa ga a n kwụnɛ, aa njɛ biyikwo mi ufwu hwɛ hwɛɛ, ibɛ po bee 'wi.

⁶Ngee shepi ru'wo re biyikwo ata mi, Ngee seshenji ru, Ngaa tumwanganɛ tusashanga ta ata tu ko tu ko no ofwo elele na cɛnjɛ ta alamụ Isrɛl ti teje kpaaŋ. Iwɛnɛ po atwa ata njɛ tupwaŋ keeni iyi i ci'nyɛ ni Isrɛl.

⁷Ahiɛba atwa Isrɛl hwɛɛ, imbe ɛti zhɛ ta nda iwɛ ibɛɛ?

⁸Nazhɛ atwa ata ishijɛ hwɛɛ aba gana ta bụtụ bu ko, ɛɛ hiɛŋ, Kede bụtụ tu be elele ji ni ihwɛ ibwɛ o, kede bụtụ tu be elele du kaa teni nu umwono ubwa o.

⁹Ama iyi nɛ ɛti zhɛ ta nda na; ti zhɛ ta 'waŋ icɛcɛ maa ta zha ta sukakana Gibia nu gana na icɛcɛ ɛtɛ iti hiɛŋ.

¹⁰Ti zhɛ ta bwa atwa umpwa na amɛ atwa dipi-yebi na alamụ Isrɛl kpaaŋ, ti zhɛ ta bwa atwa dipi-yebi (100) na amɛ atwa akpakwụ-a-ta, ti zhɛ ta bwa atwa akpakwụ-a-ta (1,000) na amɛ atwa igbɛɛ-itɛ, (10,000) maa tuba a dwalakakanɛ ejeshi ga iyi tiya, iwɛ maa a zhajɛ a tụpanɛ atwa Gibia na namɛ ni Bɛnjamin te teni cɛŋ ni iyi i ci'nyɛ nɛ aa njɛ na cɛnjɛ ti Isrɛl kpaaŋ.

¹¹Gabata etwenyi Isrɛl momo togotogwu ga kpaaŋ aba aa ụlwatagwụ nụ ụshɛpwụ ata gana ta bụtụ bu ko gba.

¹²Ibɛ po alamụ Isrɛl kpaaŋ tumwanɛ atwa no ofwo elele na ụlamụ Bɛnjamin namɛ hwɛɛ, ɛɛ hiɛŋ aŋ, Iwembe po ahiɛ njɛ iyi tugworozwo gana gaa?

¹³Utu bacɛnganɛ ma atwa ata awɛ a na namɛ ni Gibia, maa ta kwụna aŋ, maa ta bacɛnga iyi iwɛ ni Isrɛl. Ama atwa Bɛnjamin shiri shi acɛbɛ nu n-ndumwa ma atwa vwɛ aba a na shɛ atwa Isrɛl o.

¹⁴Ibɛ po atwa Bɛnjamin bananjɛ na ashɛpwụ aba hwɛɛ, oo sotulonu ni Gibia maa a sukakanɛ atwa Isrɛl nu ujasa.

¹⁵Nazhɛ atwa Bɛnjamin togotogwu atwa ashɛpwụ aba a na shɛ asaza igbɛɛ-umpwa-ni-bɛ-tɛtu (26,000) jita ata. A na ata namɛ swooŋ na atwa akpakwụ-atatụ-ni-dipi-yebi (700) a na jɛjɛ ni Gibia anaa na ee zenji.

¹⁶Atwa ata akpakwụ-atatụ-ni-dipi-yebi ee zenji,[51] a shɛ n-ngwulo hwɛɛ aba. Ama bụtụ bụtụ aba eri ba kala utayɛ ikwele maa ta okwo bihiŋzhe bu ko gba, bi zha shɛ kaa ba 'wanga bu o.

¹⁷Oo togotogwu asaza atwa Isrɛl a na seshi ujasa tɛnda, kpaaŋ aba namɛ atwa igbɛɛ-akpakwụ-eyebi (400,000). A namɛ kaa swooŋ na atwa Bɛnjamin.

¹⁸Atwa Isrɛl a na vwɛ zhe Bɛtɛl,[52] ee heŋteni Agwatana, ɛɛ hiɛŋ, Gaaba zhɛ bo mungo maa ba sukakanɛ atwa Bɛnjamin nu ujasa hiiŋ na ashashɛ tuu? AGWANGWAMA jishijɛ aŋ, bɛɛ hiɛŋ, Ga shɛ go Juda zhe hiiŋ.

¹⁹Nazhɛ atwa Isrɛl ishijɛ nu uvwungwa, ee jwe ugba wa aba to dongonu Gibia.

²⁰Ee zhe maa a sukakanɛ ejeshi atwa Bɛnjamin nu ujasa. Atwa Isrɛl keleni aŋ bụkpagwụ bu ujasa maa a sukakanɛ aŋ ni Gibia.

²¹Atwa Bɛnjamin banɛ tuba ni Gibia, aa kwụnɛ ejeshi atwa Isrɛl igbɛɛ-umpwa-nu-boo-ko (22,000) jita ata.

²²Ama atwa Isrɛl a na ta vwɛ a ta shanɛ waa ikɛnyi, ee keleneni bụkpagwụ bu ujasa no ofwo ebe ee keri bu na bi hiiŋ nụ ụjita ata.

²³Ibɛ po atwa Isrɛl munji ni Bɛtɛl, aa twanɛ AGWANGWAMA u'wo tutu ụrụmɛ. Ee zhe ee heŋteni AGWANGWAMA, ɛɛ hiɛŋ, Ta kaana suu atwa Bɛnjamin a na shɛ miaụŋ-mo-bino tu tusukakana nu ujasa? AGWANGWAMA hiɛŋ aŋ, Iiŋ, zhaga sukakana aŋ ma.

²⁴Ibɛ po atwa Isrɛl keeni izhɛ maa a sukakanɛ atwa Bɛnjamin nụ ụjita uyebi.

²⁵Nazhɛ atwa Bɛnjamin banɛ ni Gibia nụ ụjita uyebi ee zhe aa sukakanɛ atwa Isrɛl, aa kwụnɛ asaza atwa Isrɛl igbɛɛ-icinjishi (18,000) anaa na kaa 'waŋnɛ otokwobi hwɛɛ aba.

²⁶Nazhɛ atwa Isrɛl kpaaŋ aba zhe Bɛtɛl, aa cwɛ-u'wo apata. Aa jɛjɛ na agba AGWANGWAMA, aa njɛ ezumi jita ata uuwa gụ ụrụmɛ. Oo to ụrụpɛ tuhwoŋzhingo keeni ụrụpɛ wa amɛ-olom na agba AGWANGWAMA.

²⁷Ikpɛtɛ Unu-tutwa ya AGWANGWAMA kaa namba ni Bɛtɛl. Ge Finihas yɛu Ɛleaza na shɛ bụjalụ Aron, ubwa ba ngbaraka iŋ na aka ata.

²⁸Ibɛ po atwa Isrɛl heŋteni AGWANGWAMA, ɛɛ hiɛŋ bụ, Ta bana suu maa ta sukakana miaụŋ-mo-bino tu a na shɛ atwa Bɛnjamin nu ujasa sasana, okwo ta ganga ya? AGWANGWAMA jishijɛ aŋ, bɛɛ hiɛŋ, Zhaga sukakana aŋ ma. Beyi ga N zhɛ mo hi utogono aŋ maa hi lasụ aŋ.

²⁹Na aka ga ibɛ atwa Isrɛl hweri Gibia oo rungwutwonu uŋ ne tusweci.

³⁰Ti yaa namɛ ijitɛ itɛtu, ibɛ atwa Isrɛl munji maa a sukakanɛ atwa Bɛnjamin, ee keleni Gibia bụkpagwụ gana ala ihiiŋ.

³¹Atwa Bɛnjamin beni du maa a sukakanɛ atwa Isrɛl, ibɛ atwa Isrɛl mbɛ aŋ nu usumwa, ɛɛ bɛcinjɛ aŋ nụ ụshɛpwụ. Ee kwuni atwa Isrɛl oko tụkwụna gana la ihiiŋ ni ihwɛŋnɛ ɛtɛ i'wɛtwɛ nɛ munji i zhe Bɛtɛl, uko zhe Gibia, ne ehilo ata, aa kwụnɛ atwa Isrɛl gana atwa talacɛ.

³²Atwa Bɛnjamin hiɛŋ, Tu kwuni aŋ tụkwụna gana ala ihiiŋ. Ama atwa Isrɛl hiɛŋ, Mizha ti gezhiji ma tu mbo aŋ ma maa e beni na amɛ ụshɛpwụ maa e zhe ni ihwɛŋnɛ ɛtɛ i'wɛtwɛ.

³³Atwa Isrɛl tuba gɛnjɛ ofwo ata aa ga namanjɛ kpaaŋ aba, ee zhe ee keri bụkpagwụ ni Beal-tama. Nazhɛ atwa Isrɛl a na ge hweri ụshɛpwụ ata bananjɛ kakayɛ no olugwo na aa ga swakacɛ geri bu uwaŋna-twonuo[53] bi Gibia.[54]

³⁴Nazhɛ atwa ebe Isrɛl igbɛɛ-itɛ, ee ge zenji bananjɛ kpaaŋ aba aa sukakanɛ Gibia. Ujasa ata kaa vwi eshe jita ata, ama atwa Bɛnjamin tuba mepi shi maa ti'ilono ta aba tu gwumwonu o.

³⁵AGWANGWAMA kaa peni atwa Isrɛl ukpahiŋ maa a lasụ atwa Bɛnjamin. Ee iricinji asaza aba a na 'waŋnɛ otokwobi atwa igbɛɛ-umpwa-ni-bɛyebi-na-akpakwụ-a-ta-ni-dipi-yebi (25,100).

³⁶Nazhɛ atwa Bɛnjamin kwụbɛ ya maa atwa Isrɛl e eri aŋ. Ama atwa Isrɛl a munananɛ i'ɛlɛ na atwa Bɛnjamin, iwɛnɛ ta a tɛtanɛ atwa na ee ge shikicinji maa e hweri Gibia rishe.

³⁷Nazhɛ atwa ata ga njɛ tuhweri njɛ kakayɛ ee teneni Gibia ni izɛlɛgwu, oo mburusonu nụ ụshɛpwụ ata, aa kwụnɛ atwa elele na namɛ nụ ụshɛpwụ ata no otokwobi.

³⁸Atwa Isrɛl twa-unu maa aka na ta atwa vwɛ aba kwụbɛ tu nshikwo mụ ụshɛpwụ ata mu munji na azuba tuu,

³⁹nazhɛ ga atwa vwɛ aba tuba bitirije maa e gezhigeni ujasa. Na amɛ inɛ ɛtɛ ibɛ atwa Bɛnjamin kwuni atwa Isrɛl tụkwụna gana atwa talacɛ. Atwa Bɛnjamin hiɛŋ, Ti zhɛ ta kwụnanana aŋ hwayɛ ga, gana ujasa ala uhiiŋ.

⁴⁰Ama aka na tu nshikwo mụ ụshɛpwụ ata mu kwuni tumwe, moo mungo na azuba tututu. Nazhɛ atwa Bɛnjamin mbiyanɛ ekwunyi aba, aa kwụbɛ tu nshikwo mụ ụshɛpwụ wa aba mo mungo na azuba tututu.

⁴¹Na aka ata nazhɛ atwa Isrɛl bitirije mabaaba ee gwure nu ujasa. Ibɛ po shihwulu shi horukono atwa Bɛnjamin, iwɛnɛ ta a kwụbɛ ya maa ti'ilono ta aba ti ci.

⁴²Iwɛbɛ po ee gezhigeni atwa Isrɛl, oo to geri bụ ụshɛka. Ama e eri shi a banagana kaa ujasa ata o. Nazhɛ atwa Isrɛl a na banɛ nụ ụshɛpwụ[55] ata iricinji aŋ apata.

⁴³Gana atwa Isrɛl hweri atwa Bɛnjamin, ee urigeni aŋ, ee rikeci aŋ tutu geri bu uwaŋna-banụ[56] bi Gibia ta.

⁴⁴Atwa Isrɛl kwụnɛ asaza atwa Bɛnjamin a na beni urishi ni ikɛnyi, atwa igbɛɛ-icinjishi (18,000).

⁴⁵Atwa Bɛnjamin bitirije, ee gezhiji oo to geri bụ ụshɛka maa e zhe geri bu uparatayɛ Rimon. Atwa Isrɛl kwunananɛ atwa aba igbɛɛ-iyebi-na-akpakwụ-a-ta (5,000) nu uhwaŋna ata. Atwa Isrɛl uranjɛ aŋ tu'urugono tutu Gidom, aa kwụnɛ atwa aba ugbaa-uko (2,000) apata.

⁴⁶Asaza atwa Bɛnjamin a na aa kwụnɛ jita ata, kpaaŋ aba namɛ igbɛɛ-umpwa-ni-bɛyebi-na-akpakwụ-a-ta (25,000). Hwɛɛ aba kaa shɛ etwenyi na beni urishi ne teleyi tɛnda nu ujasa.

⁴⁷Ama atwa aba akpakwụ-atatụ (600) benengeni ee gezhiji, oo to geri bụ ụshɛka, ee zhe nu uparatayɛ Rimon, aa namɛ apata ipiɛnɛ ineshi.

⁴⁸Atwa Isrɛl tuba bitirije ne ekwunyi, aa sukakanɛ atwa Bɛnjamin a na ta vwɛ. Aa kwụnɛ aŋ, te eyikwo, te etwenyi, ta miaụŋ, ti iyimabiga ya aba hwɛɛ. Nazhɛ ee sepi ashɛpwụ aba elele na oo to ugbe ulwa.