Read bassa AJƐMƐ-ỤSHƐRƐYA 21 Bible Online

AJƐMƐ-ỤSHƐRƐYA 21 - bassa bible

AJƐMƐ-ỤSHƐRƐYA 21

¹Na aka ga ibɛ atwa Isrɛl keri-unu ni Mizpa, ɛɛ hiɛŋ, I zasa bụtụ be elele na zhɛ ba pana atwa Bɛnjamin yɛu ibwɛ yo o maa e zeni o.

²Nazhɛ atwa Isrɛl zhajɛ ni Bɛtɛl na aka ata, aa jɛjɛ apata na agba Agwatana uuwa gụ ụrụmɛ. Ee suji rụhwụŋ ra aba na azuba aa cwɛ-u'wo gboo.

³Ɛɛ hiɛŋ, Oo AGWANGWAMA na shɛ Agwatana Isrɛl, iwembe po ijɛ teni ni Isrɛl gana gaa? Iwembe po ụlamụ uko mudu 'inɛ ni Isrɛl hwayɛ gaa?

⁴Aka na ti iyi heri, ibɛ atwa ata gbatụ ti'ishijɛ, oo mo utukwu-ụrụpɛ. Oo to ụrụpɛ tuhwoŋzhingo keeni ụrụpɛ wa amɛ-olom.

⁵Atwa Isrɛl hiɛŋ, I 'yajɛ suu ụlamụ na zasaba na alamụ Isrɛl hwɛ hwɛɛ aka na te e zhe maa o sotulonu na agba AGWANGWAMA ni Mizpa? Iwɛnɛ po o go shilwo-unu ụ'wụtụ, ɛɛ hiɛŋ, Bụtụ be elele na zhe shi maa sotulonu na atwa vwɛ ni Mizpa, ga kwụnɛ bụ.

⁶Shɛmɛ sha atwa Isrɛl shɛ hashɛganụ jita ata iwɛ miaụŋ-mo-bino aba a na shɛ atwa Bɛnjamin, ɛɛ hiɛŋ, Ụlamụ uko mudu kaa zasaba na atwa Isrɛl hwayɛ ga o.

⁷Gana naa ɛti zhɛ ta nda maa atwa aba a na ta vwɛ a 'yaga eyikwoo? Tu towo la kaa AGWANGWAMA, maa ti zha shɛ ta pana aŋ miaụŋ mu tu mo o me elele maa e zeni o.

⁸Ɛɛ hiɛŋ, Ụlamụ naa munji shi la maa o sotulonu na atwa vwɛ ni Mizpa na agba AGWANGWAMAA? Nazhɛ oo to ugbe maa i zasa bụtụ okwo bu ko na banɛ la ni Jabɛsh-giliad na zhe no tusotulonu ta ata o.

⁹Aka na ta a rɛcɛ atwa na namba hwɛɛ, oo to ugbe maa, i zasa bụtụ okwo bu ko na atwa na jɛjɛ ni Jabɛsh-giliad namba apata o.

¹⁰Nazhɛ tu'ulwa ta ata kpaaŋ tu tumwanɛ etwenyi igbɛɛ-icihiŋ (12,000) a na beni urishi ni ikɛnyi ujasa uhwuri atwa vwɛ kpaaŋ. Ee peni aŋ unu, ɛɛ hiɛŋ, Zhaga kwunɛ ma atwa elele na jɛjɛ ni Jabɛsh-giliad no otokwobi, te eyikwo ta miaụŋ du.

¹¹Ɛɛ hiɛŋ aŋ, Atwa na ɛhi zhɛ hia kwụna na: ga shɛ etwenyi keeni biyikwo be elele mwopwo butubwenyi.

¹²Na amɛ ibɛ ee gwushije miaụŋ-mo-o ma atwa Jabɛsh-giliad mu na mu ta shɛ asapa akpakwụ-eyebi (400). Ee suji mu nu ugba u tu'ulwa ni Shailo, na namɛ na cɛnjɛ ti Kenan.

¹³Nazhɛ atwa tu'ulwa ta ata hwɛ hwɛɛ tumwanɛ atwa maa e mbishe atwa Bɛnjamin a na namɛ nu uparatayɛ Rimon, maa ujasa hwuwowu ya oo.

¹⁴Na aka ata nazhɛ atwa Bɛnjamin gwure, nazhɛ atwa vwɛ aba Isrɛl peni aŋ eyikwo ebe aa ga kwụnɛ shɛ, ee suje ni Jabɛsh-giliad. Ama o botogwu su aŋ kaa o.

¹⁵Amɛ atwa ata hashɛganụ iwɛ atwa Bɛnjamin, iwɛnɛ ta AGWANGWAMA bweji tutogwu ta alamụ Isrɛl.

¹⁶Ibɛ po n-nyarɛ mu tu'ulwa ta ata kpaaŋ mi hiɛŋ, Gana naa ɛti zhɛ ta nda maa atwa ga ta vwɛ a 'yaga eyikwoo? Iwɛnɛ po eyikwo ụlamụ Bɛnjamin kaa ilwonuo hwɛɛ.

¹⁷Ɛɛ hiɛŋ, I shɛ tilɛɛ maa ga atwa ụlamụ Bɛnjamin a na benengeni a 'yaga iyi-yo-ogwu ya aba, iwɛ maa kede ụlamụ uko 'inɛ ni Isrɛl hwɛɛ o.

¹⁸Okwo ti yaa shɛ gana ata, ti eri shi kaa ta pana atwa ụlamụ Bɛnjamin miaụŋ mu tu mo o maa e zeni ya o. Iwɛnɛ po tu go shilwo la unu, ɛti hiɛŋ, Go unu-tukalana 'imɛ bụtụ be elele na peni atwa Bɛnjamin yɛu ibwɛ yo o maa zana.

¹⁹Ɛɛ hiɛŋ, Isene ya AGWANGWAMA ya nama ni Shailo uywa uywa, (Shailo) ata kaa namɛ tuzuba ti Bɛtɛl, nu uwaŋna-twonuo uhwaŋna ata ụ'wụtụ banɛ ni Bɛtɛl munji Shɛkɛm, tuta ti Lɛbona.

²⁰Ee peni atwa Bɛnjamin unu, ɛɛ hiɛŋ aŋ, Zhaga swakaka ma nu ntuma ma ata ma shifwafwa,

²¹ngbaraka ma, yaa shɛ miaụŋ-mo-o mu Shailo mu banɛ hwayɛ maa mɛ hiɛbɛ tɛhiɛba na tụlagwụ ta ata ti isene, bananjɛ ma tuba maa bụtụ bụtụ ima biyikwo bwa na miaụŋ ma ata mu Shailo ni iji, maa hi hwuri na cɛnjɛ ti Bɛnjamin.

²²Aka na te eshi aba keeni nkwonyi ma aba mu tu zhaganɛ nụ ụgagwụ, ti zhɛ tɛ hiɛŋ aŋ, Iti peni aŋ ma upwaŋ tulubo-ti-biye, iwɛnɛ eti gwushigeni shi aŋ la eyikwo na aka bu ujasa. N-ndumwa kaa mɛ hiɛ zhɛmɛ iwɛnɛ ti yaa shɛ shɛ ahiɛba hi peni aŋ miaụŋ mi hiŋ mo o.

²³Atwa Bɛnjamin njɛ ga gana ata, aa 'imɛ eyikwo aba no olugwo ata aa hiɛba tɛhiɛba, nu gana na tu ufwugwo wa aba namɛ. Nazhɛ ee gwuri na cɛnjɛ ta aba. Nazhɛ ee meeneni ashɛpwụ aba, aa jɛjɛ ya na aba.

²⁴Atwa Isrɛl a na vwɛ tuba beni apata na aka ata, bụtụ bụtụ gwuri nụ ụlamụ ubwa, keeni umwamwa ubwa, no ofwo cɛnjɛ to ogwu ubwa.

²⁵Agwuma elele zasaba la ni Isrɛl na aka ata o, ibɛ po bụtụ bụtụ ba nda iyi elele nɛ kwụlanɛ bụ ne eshe ubwa.