Read bassa AJƐMƐ-ỤSHƐRƐYA 5 Bible Online

AJƐMƐ-ỤSHƐRƐYA 5 - bassa bible

AJƐMƐ-ỤSHƐRƐYA 5

¹Nazhɛ ge Debora keeni Barak yɛu Abinoam zụnjɛ azunga ga jita ata, ɛɛ hiɛŋ:

²Zhemonjino ma AGWANGWAMA![12] Iwɛnɛ te ehiu Isrɛl hwuri umbe, atwa kaa meme peni maa a njɛ ujasa na tukwulangana!

³Ahiɛba shɛgwuma, shɛlaga ma! Ahiɛba miaụŋ mu tugwama, shilo ma acɛbɛ! N zhɛ ma zungangana AGWANGWAMA na shɛ Agwatana Isrɛl azunga urondwo.

⁴AGWANGWAMA, aka na ebi beni ni Ishɛmɛ Sɛi, aka na ebi genji cɛnjɛ ti Idụm, cɛnjɛ ti zhingotu, eshilo banɛ na tụla. Gobwonu du meni me ngbenji no odomu tụla.

⁵Nshama mu zhingotu nu umbe AGWANGWAMA na namɛ nu Sainai, nu umbe AGWANGWAMA na shɛ Agwatana Isrɛl.

⁶Ekpekiti 'wegeni na aka Shamga yɛu Enat keeni aka Jeɛl, ibɛ po atwa tahaŋnụ o dulo ya ipɛlu ihwɛŋnɛ.

⁷Gabụ ge Debora, e jineci ashɛpwụ Isrɛl, aa namɛ bohondo tutu i ci aka na abụ zhajɛ[13] maa shɛ gana bino ba atwa Isrɛl.

⁸Aka na ta atwa Isrɛl teri tuwa tu ufwo tɛzhɛba, nazhɛ ujasa namɛ ya no odubo tutono tụ ụshɛpwụ ata. A ta kwụbɛ suu avwula ujasa kwo kaa isɛnu na ashashɛ atwa igbɛɛ-woshi (400,000) ni Isrɛl?

⁹Amɛ mi namɛ ne eberezhe ejeshi Isrɛl, a na meme peni na tukwulangana na ashashɛ atwa ata. Zhemonjino ma AGWANGWAMA!

¹⁰Duma iŋ ma, ahiɛba na hia suka nzhinyacɛ mɛ cɛnjɛ, ta ahiɛba na hiɛ jɛjɛ no tugwuno ta azhɛgba tu tuputuu, ta ahiɛba na hia zha tahaŋnụ ni ihwɛŋnɛ ye elele nɛ ehi to.

¹¹No ofwo atwa na 'yajɛ rụhwụŋ ra azunga a na namɛ no ofwo na oo zwogono meni, apata aa kwabɛlagana tụlasatagwụ ta AGWANGWAMA, ibɛ shɛ tụlasatagwụ ta atwa Isrɛl! Nazhɛ atwa AGWANGWAMA zhe tahaŋnụ ee zwi no odubo tutono tụ ụshɛpwụ ata.

¹²Gabụ ge Debora, zhinjɛ, zhinjɛ, zhinjɛ, zhinjɛ, maa jwɛ azunga! Gabụ ga Barak yɛu Abinoam, ishijɛ maa suji ajama bụ a na ɛbi imɛ maa hwuri!

¹³Nazhɛ atwa vwɛ zhe tahaŋnụ, ee zhe no ofwo atwa aba ụjɛrụma,[14] ibɛ po atwa AGWANGWAMA zhe pu bwa aa mama 'imɛ ee zwi maa a njɛ ujasa na atwa ikɛnyi.

¹⁴A banɛ ni Ifrem,[15] Eberezhe banɛ nu Maki ee zwi, atwa shihwolu banɛ nu Zɛbulon. Ee teni nu ulomu,[16] aa 'wa ụlamụ Bɛnjamin keeni atwa ubwa ne ekwunyi.

¹⁵Miaụŋ mi shɛgwuma mi Isaka mi zhagajɛ ne Debora; Iiŋ, ge Isaka zhagajɛ du na Barak, ee suri kakayɛ ee teni nu ulomu. Ama tihikokono ta amɛ tụ 'wụtụ tu ta namba na ashashɛ udenji Rubɛn.

¹⁶Iwembe po ɛbi lɛ ekwunyi abu namɛ no ofwo a'iywa-agwụdụụ? Maa shɛlaga suu ubi na a'iywa-agwụdụ o hwulogono agwụdụ? Iiŋ, tihikokono ta amɛ tụ 'wụtụ tu ta namba na ashashɛ udenji Rubɛn.

¹⁷Ge Giliad jɛjɛ hileniye Jodan, Iwembe tuba ga Dan ta vwɛ ni ihɛŋtu ɛtɛ i tinyakpa nyakpaa? Ga Ashɛ jɛjɛ nu ukwoswo itekwu; a ta vwɛ ba na apalanụ ubwa.

¹⁸Ụlamụ Zɛbulon njeri araiŋ aba no tu'wo, gobwonu du atwa Naftali a shɛ no ohwulu ujasa.

¹⁹Shɛgwuma shɛ zhajɛ sha twa ifwelu; shɛgwuma shi Kenan shi twa ifwelu ni Teanak nụ ụpalanụ uwapa Migido, ama e suji shi kaa azụrụfa na ujasa yɛ o.

²⁰Mkpasu ma tụla mu twa ifwelu, mu banɛ ni ihwɛŋnɛ muba i tuswoswoswo ma twa ifwelu ne Sisɛra.

²¹Tɛzhagajɛ tu Urefu Kishon tu suji aŋ te hwuri, ibɛ shɛ usumwa na Urefu ata wo gozhigo. Ohwulu mi, na zhaga tahaŋnụ tụ bụ nu ukpahiŋ tutuu!

²²Nazhɛ ogwogwozwo idɛkwɛ kwuni e'inji tɛnda, iwɛ usumwa tụlagwụ na idɛkwɛ ɛtɛ yo gozhigo nu ukpahiŋ wa aba hwɛɛ.

²³Butumwa ba AGWANGWAMA ba azuba hiɛŋ, Kalana ma Meroz unu, Kalana ma atwa na jɛjɛ nu bwa unu taawụụ; iwɛnɛ ee zhe shi maa e mbiyeni AGWANGWAMA, e zhe shi maa e mbiyeni AGWANGWAMA maa a sukakanɛ atwa ikɛnyi o.

²⁴Ge e peni Jeɛl biyikwo Hibɛ, Bikin ata uwebiye uhwuri eyikwo vwɛ hwɛɛ, ge e peni bu uwebiye uhwuri eyikwo elele na jɛjɛ no shimwono sha aba.

²⁵Ge Sisɛra lụpɛ biyikwo ata meni, bee peni bu ya mosubo mi inɛ, biyikwo ata shapɛrɛganɛ bụ manɛbɛ mu mosubo mi inɛ na atasa na pilanụ tebiye.

²⁶Biyikwo ata shepi igbɛlu umwono ubwa nu u'ala uko, bee shepi ụshamụ bụlụma nu u'ala ubiye, bee cimbeni Sisɛra nu ungalacɛbɛ, boo po iŋ ụshamụ, bee bweji ukokolo-uhiuhiu ubwa.

²⁷Bee zwi wɛɛ, bee leyi, bee weci saiiŋ nu ukaka biyikwo ata. Nu ukaka biyikwo ata bee zwi wɛɛ bee leyi; ofwo ata bee zwi wɛɛ, apata du bee leyi bee 'wi.

²⁸Bino Sisɛra ba mbiyangana tupohondo no tuhwolu ta agbahwụ, baa uganɛ no tuhwolu ta agbahwụ ata, bɛɛ hiɛŋ, Iwembe po ụhaŋtụ ujasa gbatụ sụ ujiyoo? Iwembe po e'inji ogwogwozwo idɛkwɛ ibwɛ njɛ ti'insu nu ujiyoo?

²⁹Ana vwɛ ubwa eyikwo a na incɛ uhwuri atwa vwɛ hwɛɛ, jishijɛ bụ, bɛɛ mɛmɛ jishijɛ du, bɛɛ hiɛŋ,

³⁰Shɛ afwa ujasa suu fweye oo to ugbe oo dwotwogonu? Maa busaza be elele 'yaga yɛu-yo-o ike kwo kaa mi yebi. Otogwo na ee shiyeni ushi, ee zweni irikwi ni i'ilu a shɛ iwɛ Sisɛra, otogwo ufwa ujasa a na ee shiyeni ushi, ee zweni irikwi ni i'ilu tebiye, a shɛ shɛ iwɛ i'ilu mi suu?[17]

³¹Oo AGWANGWAMA, iricingo atwa i'ime bu hwɛɛ! Ama ge eyejilo bu, na ta raawụụ, gana uwaŋna na wa ta na tụla! Nazhɛ cɛnjɛ ta ata ti 'yajɛ amɛ-olom shiywa buhanda.