Read bassa AJƐMƐ-ỤSHƐRƐYA 6 Bible Online

AJƐMƐ-ỤSHƐRƐYA 6 - bassa bible

AJƐMƐ-ỤSHƐRƐYA 6

¹Atwa Isrɛl ndaananɛ AGWANGWAMA iwɛwɛ, ibɛ po bee zweni aŋ ni i'ɛlɛ ya Amidian shiywa shi cenje.

²Ukpahiŋ wa Amidian uhwuri una wa atwa Isrɛl, ibɛ po aa mama intangana na a'ibwa keeni apangwụ nshama, keeni ikepi nɛ 'yajɛ ikɛnyi.

³Aka elele na ta atwa Isrɛl bɛrɛ iyi, Amidian, na Amalɛk keeni atwa na namɛ geri bu uwaŋna-banụ a zhajɛ a sukakana aŋ.

⁴A zhajɛ a hwala aŋ, ee iricinji iyimɛyɛ ye elele nɛ aa ga bilwa na cɛnjɛ ta ata tutu anya aba a na rungwutwonu Gaza. E gengeni shi aŋ iyi elele ni Isrɛl, ta agwụdụ, ti inɛ, tu nzhinyacɛ, maa a 'yaga o.

⁵A zhajɛ ti iyimabiga ya aba, to shimwono sha aba tu nruhondo ma aba. Ufwugwo wa aba ụ shɛ gana ovworo, i zasa bụtụ eri ba rɛta aŋ o. E teni cɛnjɛ ta ata aa njɛ tụ ufwu.

⁶Atwa Isrɛl kaa njɛ tiriri tebiye iwɛ Amidian, ibɛ po ee keri AGWANGWAMA ụhiɛŋshɛ maa lashɛga aŋ.

⁷Aka na ta atwa Isrɛl ugananɛ AGWANGWAMA iwɛ iyi nɛ Amidian a nda aŋ,

⁸Baa tumwananɛ aŋ bigesere, bɛɛ hiɛŋ, AGWANGWAMA na shɛ Agwatana Isrɛl hiɛŋ, Gamba N hi bɛcinjɛ la ni Ijipti, Ngɛɛ hi bɛcinjɛ nu umwono tijama.

⁹Ngɛɛ hi lɛshijɛ kaa ni i'ɛlɛ ya atwa Ijipti keeni i'ɛlɛ ya atwa elele na ga hi nda la umungwuta na cɛnjɛ tu ga. Ngee hi unzenji aŋ, Ngee hi peni cɛnjɛ ta aba.

¹⁰Ngɛɛ hi hiɛŋ, Gamba AGWANGWAMA na shɛ Agwatana hiŋ na. Ta nda ma inyɛsɛ tuwa ta A'amo a na ahiɛ jɛjɛ na cɛnjɛ tu ga ta aba o. Ama hiɛ shɛlajɛ shɛ iwɛ mi o.

¹¹Ibɛ po butumwa ba AGWANGWAMA ba azuba zhajɛ nụ ụshɛpwụ ata ɛɛ hiɛŋ, Ofra, baa jɛjɛ nu ucilo ukpekpeshi Joash, bụtụ bu Abiɛzɛ. Yɛu ibwɛ ge Gidion tuba bo nuso ohiu nu ugbogolo na oo pilo meni mụ tụ'walụ ta afwafwa iwɛ maa swaka iwɛ Amidian.

¹²Ibɛ butumwa ata ba AGWANGWAMA ba azuba bananɛ bụ apata, bɛɛ hiɛŋ bụ, AGWANGWAMA namɛ na bụ, gabụ bụtụ ga bu ukpahiŋ, na kaa beni urishi!

¹³Ge Gidion hiɛŋ bụ, Iyɛri, ma bụ tabwa, Yaa shɛ AGWANGWAMA namɛ no tu, asha iwembe po tuba ijɛ iti vwutengeni kpaaaŋ? Cee tuba iyi ya arụhwajɛ nɛ baa njɛ, inɛɛ nɛ eshi tu utu swegeni la namɛ yaa? Igɛ tɛ ɛɛ hiɛŋ, Shɛ AGWANGWAMA suu iti bɛcinjɛ ni Ijipti? Ama AGWANGWAMA kaa iti jineci ya, bee tu zweni ni i'ɛlɛ ya Amidian.

¹⁴AGWANGWAMA mbiyanɛ bụ, bɛɛ hiɛŋ, Zhaga nu ukpahiŋ ga bụ ụ'wụtụ maa leshiji atwa Isrɛl ni i'ɛlɛ ya Amidian. Shɛ Gamba suu M bu tumwanɛ?

¹⁵Ge Gidion hiɛŋ bụ, AGWANGWAMA, ma bụ tabwa, gana naa Ngee eri mɛ lɛshijɛ atwa Isrɛl bwaa? Kwụba, udenji mu lwegeji wee hwuri atwa elele nụ ụlamụ Manasɛ, Gamba kaa n 'nyanɛ hwɛ hwɛɛ nu umwamwa bishi mi.

¹⁶AGWANGWAMA jishijɛ bụ, bɛɛ hiɛŋ, N zhɛ ma nama na bụ nazhɛ ɛbi zhɛ ba kwụna Amidian gana ta bụtụ na ba kwụna bụtụ mokondo.

¹⁷Ge Gidion jishijɛ bụ, bɛɛ hiɛŋ, Yaa shɛ iwe mi ubu kwụlanɛ, asha m mbiseni useyida na maa Ma mapa gom maa gabụ ba njɛ ne mi.

¹⁸Ma bụ tabwa maa kede ishɛjɛ epe semi aka na Ngaa bụ 'waŋnanɛ hwayɛ upwaŋ mu ugaiŋ ti'ima maa Mo bu shono uŋ nu ukaka bụ. AGWANGWAMA hiɛŋ bụ, N zhɛ ma gɛga uuwa i ci aka na ebu gwure.

¹⁹Ge Gidion sanɛ bee teni ga nu umwono ubwa, bee shiteji yɛu biywoywo, bee seri mihiuŋ no okolo, baa njɛ akara na zasa Ifucingɛ. Bee zweni usunda ata ni igwumi, bee zweni urombwo ni ikwɛshɛ, bee shepirigeni bu iŋ nu ucilo ukpekpeshi ata, bee peni bu.

²⁰Butumwa ata ba Agwatana ba azuba hiɛŋ bụ, Shapa usunda keeni akara ga zasa Ifucingɛ, patana iŋ nu uparatayɛ ga, maa dudugeni urombwo na azuba ubwa. Ge Gidion njɛ ga gana ata.

²¹Nazhɛ butumwa ata ba AGWANGWAMA ba azuba mbo ihiŋhiŋ bukwuto na baa 'waŋnɛ, bee timengeni usunda ata keeni akara ata. Nazhɛ ulwa mwe nu uparatayɛ ata, wee hwoŋzhinji usunda ata, ta akara ata. Nazhɛ butumwa ata inanjɛ bụ ya.

²²Nazhɛ ge Gidion eshiciji ya maa butumwa ba AGWANGWAMA ba azuba ta. Bɛɛ hiɛŋ, Adooyi, AGWANGWAMA Mokondo! N twa eshe na butumwa bụ ba azuba.

²³Ama AGWANGWAMA jishijɛ bụ, bɛɛ hiɛŋ, Ga amɛ bụ lemi, ta nda inyɛsɛ o; bi zha shɛ bo 'wo.

²⁴Nazhɛ ge Gidion meni AGWANGWAMA utukwu-ụrụpɛ apata. Boo po uŋ izeci, bɛɛ hiɛŋ, AGWANGWAMA ubwa shɛ amɛ-olom. U te shikeni ba taa hwayɛ nu Ofra ata shɛ una Abiɛzɛ.

²⁵AGWANGWAMA hiɛŋ bụ gụnụ ụrụmɛ ata, Shapa buna ata be eyi bi yebi ge shibi 'yajɛ,[18] bu gata namɛ shiywa shi cenje te e meci bu, maa hwuŋzetenji du utukwu-ụrụpɛ Beal ata ge shibi 'yajɛ, maa jeji du itɛtɛnuwɛŋ ɛtɛ Ashɛra i swanɛ uŋ.

²⁶Mana AGWANGWAMA na shɛ Agwatana bụ utukwu-ụrụpɛ u tandụ ni ihiŋhiŋ tukapa ta ata, na atayɛ ata ee shemeni. Nazhɛ shepi buna ata be eyi bi yebi maa to ụrụpɛ tuhwoŋzhingo. Sugo i'wɛ'wɛ itɛtɛnuwɛŋ ɛtɛ Ashɛra ebi jeji maa i shɛ i'wɛ'wɛ ulwa ụrụpɛ.

²⁷Ge Gidion suji miaụŋ mu bwa mu ugondu umpwa, baa njɛ ga gana na ta AGWANGWAMA mbishi bu. Ama nụ ụjita baa njɛ iŋ, iwɛnɛ tu baa nda inyɛsɛ ya atwa ihwɛ ibwɛ keeni inyɛsɛ ya atwa ụshɛpwụ ata, ibɛ po baa njɛ shɛ iŋ nu uwaŋna.

²⁸Aka na te etwenyi ụshɛpwụ ata ishijɛ nu uvwungwa dididi, aa kwụbɛ tu utukwu-ụrụpɛ tuwa ti Beal hwuŋzwotongwu, ee jeji du itɛtɛnuwɛŋ ɛtɛ i swanɛ uŋ, oo towo kaa du ụrụpɛ na buna ata bi yebi ni ihiŋhiŋ utukwu ata boo mo.

²⁹Aa mama hiaŋnụ, Gaaba njɛ ijɛɛ? Aka na te e dwelekeci iwɛ ibɛ, oo to ugbe maa ge Gidion yɛu Joash ubwa njɛ iŋ.

³⁰Nazhɛ etwenyi ụshɛpwụ ata hiɛŋ Joash, Bɛcinjɛ yɛu gɛ bu maa ta kwụna bụ, iwɛnɛ ti bee hwuŋzhi utukwu-ụrụpɛ Beal, bee jeji du kaa itɛtɛnuwɛŋ Ashɛra ɛtɛ ga swanɛ uŋ.

³¹Ama go Joash jishijɛ atwa elele na zhajɛ maa a sukakanɛ bụ, bɛɛ hiɛŋ aŋ, Ahiɛba suu hi zhɛ hia twagwụ Beal ifelu? Ahiɛba suu hi zhɛ hio bicingo tu? Bụtụ be elele na ba twagwụ tụ ifelu, ga kwụnɛ bụ tobwolo uwaŋna go te beni shi o. Yaa shɛ Beal shɛ tuwa gom, asha ga tu mama twagwụ ifelu, iwɛnɛ te e hwuŋzhi utukwu tuba.

³²Ibɛ po oo po Gidion izeci ti gɛ Jɛrubeal[19] te kwuni nụ ụjita ata, ɛɛ hiɛŋ, Ge Beal sukakanɛ bụ ni ifelu, iwɛnɛ bee hwuŋzhi utukwu tuba.

³³Nazhɛ Amidian, na Amalɛk keeni atwa na namɛ geri bu uwaŋna-banụ hwɛɛ momo togotogwu, ɛɛ kɛshɛ Urefu Jodan, aa zhajɛ ee jwe ugba wa aba nu Ulomu Jɛzrɛl.

³⁴Nazhɛ Mpiala ma AGWANGWAMA mi zhajɛ me ubi Gidion, bee 'nyemeni utiitidi, baa suyanɛ atwa udenji Abiɛzɛ, aa 'wa bụ.

³⁵Baa tumwanɛ atumwa no ofwo ụlamụ Manasɛ hwɛɛ, aa banɛ du aa 'wa bụ. Baa tumwanɛ atumwa no ofwo ụlamụ Ashɛ, nu una Zɛbulon keeni una Naftali, ee zhe aa twa nu bwa.

³⁶Ge Gidion hiɛŋ Agwatana, Yaa shɛ ɛbi zhɛ bɛ lɛshijɛ atwa Isrɛl tedure ne mi gom gana na ebi shiri-unu,

³⁷asha ga shɛ u'waba ga ụgwụdụ Ngɛɛ zhɛ mo shilo na akpakpata ga kiri zhɛ wa 'wala cime. Ama ga cɛnjɛ tụ vwɛ tu hweteni hwɛɛ. Nazhɛ Ngɛɛ zhɛ ma mapa maa bi zhɛ ga bo bicingo atwa Isrɛl tedure ne mi, gana na abɛ jɛmɛ.

³⁸Gabata ga kaa yaa shɛ. Aka na ti iyi heri, bɛɛ ishijɛ nu uvwungwa dididi, bee zhe, boo kwudulonu tihiŋzhe ta ata, bee piri tu, cime tu na tu banɛ na tuba ti shini ikele ike.

³⁹Ge Gidion hiɛŋ Agwatana, Ta nda isɛbwɛ ne mi o. Lono maa ma dumanana iwɛ kpalụ ko gba ya. Ma bụ tabwa, lono maa ma manga tihiŋzhe tu ga kpalụ ko gba, maa ga shɛ tihiŋzhe tu ga kiri tu hweteni ya maa ga cɛnjɛ tụ vwɛ kpaaŋ tu 'weri cime.

⁴⁰Gabata ga kaa Agwatana njɛ iŋ nụ ụjita ata gbaa. Tihiŋzhe ta ata kiri tu hweteni, ama cɛnjɛ tụ vwɛ tu 'weri cime no ofwo elele hwɛɛ.