Read bassa AJƐMƐ-ỤSHƐRƐYA 7 Bible Online

AJƐMƐ-ỤSHƐRƐYA 7 - bassa bible

AJƐMƐ-ỤSHƐRƐYA 7

¹Nazhɛ gɛ Jɛrubeal (na shɛ ge Gidion) gbatụ ti'ishijɛ nu uvwungwa, medenji atwa elele na namɛ nu bwa. Ee jwe ugba wa aba nu ụpalanụ umɛzhinjɛ na ɛɛ hiɛŋ Harod. Amidian tuba jwe ugba wa aba tuzuba ta aba, nu ulomu we embi bikpekwu na ɛɛ hiɛŋ, Morɛ.

²AGWANGWAMA hiɛŋ Gidion, Atwa na abụ 'yajɛ hwuri ufwugwo maa Ma lasụ Amidian tedure na aba, iwɛ aka na atwa Isrɛl zhɛ no mo mbisogo ishɛkɛ, ɛ hiɛŋ, Ukpahiŋ tu iti lɛshinjɛ.

³Ananga hwuwayɛ go, maa atwa elele hwụjɛ, maa Bụtụ be elele na ba nda inyɛsɛ, go gwulo ni ihwɛ ibwɛ maa ganga Ishɛmɛ gɛ Giliad.[20] Ge Gidion menji aŋ, ibɛ atwa igbɛɛ-umpwa-nu-boo-ko (22,000) gwuri, ama igbɛɛ-itɛ (10,000) ta vwɛ.

⁴AGWANGWAMA hiɛŋ Gidion, Atwa ga te hwuri waa ufwugwo. Sugo aŋ maa zucinji ne meni, N zhɛ ma bu mangana aŋ apata. Bụtụ na Ngɛɛ bi hiɛŋ, Ga zha na bụ, ga shɛ ubwa zhe na bụ. Bụtụ be elele na Ngɛɛ bi hiɛŋ, Kede zha na bụ o, kede bụtụ ata zhe na bụ o.

⁵Ge Gidion zucinji aŋ ga ne meni ma ata, AGWANGWAMA hiɛŋ Gidion, Bụtụ be elele na bo songo hwayɛ meni na bụratụ gana uwɛwɛ, gɛgɛcɛnga bụ swooŋ na atwa elele na kwuzhi no shilulo sha aba a swa meni.

⁶Ufwugwo wa atwa na a sala meni ni i'ɛlɛ ya aba o kwutongo nu unu wa aba namɛ kpakwụ-ni-dipi-yebi (300). Ama atwa vwɛ kwuzenji hwɛɛ aba nazhɛ ee swe meni.

⁷Nazhɛ AGWANGWAMA hiɛŋ Gidion, Tedure na atwa ga kpakwụ-ni-dipi-yebi, a na seri meni ni i'ɛlɛ ya aba nazhɛ ee swe, Ngɛɛ zhɛ mo hi bicingo maa Ma hi lasagwụ Amidian. Ga atwa vwɛ kpaaŋ gwuri, bụtụ bụtụ go jiyo ni ihwɛ ibwɛ.

⁸Ibɛ po ge Gidion lesheji i'wɛŋnɛ nɛ ee ge peni aŋ,[21] ta akakacɛ aba, bee jicinji atwa Isrɛl a na vwɛ kpaaŋ, bụtụ bụtụ gwuri nu umwono ubwa. Ama bu untanganɛ atwa ata kpakwụ-ni-dipi-yebi. Ama ugba wa Amidian namɛ tuta ta aba nu ulomu.

⁹AGWANGWAMA hiɛŋ Gidion nụ ụrụmɛ ata gbaa, Zhaga zwo maa sukakanɛ atwa ata namɛ nu ugba ata, N nduwa maa eri aŋ tụlasụ.

¹⁰Ama yaa shɛ kaa aba nda inyɛsɛ tuzwo apata maa sukakanɛ aŋ, asha zhaga ni yɛu-ugondu bu go Pura.

¹¹Bi zhɛ ba hwuga iyi nɛ aa dumanga, nazhɛ ɛbi zhɛ ba kaana ikɛnyi ti'yaga maa zhe maa sukakanɛ atwa ata namɛ nu ugba ata wa aba. Bee zwi ga ni yɛu-ugondu ubwa go Pura ni ipɛlu ugba ata, no ofwo na atwa na shɛ tụkpagwụ ta aba a na 'imɛ i'wɛŋnɛ ujasa namɛ.

¹²Ta Amidian, ta Amalɛk keeni atwa elele na banɛ geri bu uwaŋna-banụ tileni nu ulomu ata. Unyama wa aba ụ shɛ gana ovworo, nruhondo ma aba mu zasa tɛrɛta o, unyama wa aba ụ shɛ gana ahwayɛ na namɛ nụ ụpalanụ itekwu.

¹³Aka na ge Gidion ci apata, baa hwụjɛ ta bụtụ bu ko bo mbiso binya bwa ụwalabụ na bee wetegeni. Bɛɛ hiɛŋ bụ, N wetegeni hwayɛ ụwalabụ uko, Ngaa kwụbɛ tu ukara izɛgwu Bali uko layagajɛ nu ugba wa Amidian, wee leyiteni udulo wa aba, wee kelegeji uŋ maaracɛnjɛ, wee weci ya mɛkɛɛ.

¹⁴Binya bwa jishijɛ bụ, bɛɛ hiɛŋ, Inɛ go shɛ shɛ inyɛwɛŋ o, semi utokwobi Gidion yɛu Joash bụtụ ata bi Isrɛl, ubwa Agwatana leni maa lasụ Amidian keeni unyama ga kpaaŋ.

¹⁵Aka na ti ge Gidion hwụjɛ ta a jɛmɛ ụwalabụ ata keeni ecilo ubwa, bee kwuzhi baa zhɛbɛ Agwatana. Bee gwure nu ugba wa atwa Isrɛl, bɛɛ hiɛŋ aŋ, Ishijɛ ma, AGWANGWAMA nduwa maa ta lasụ unyama wa Amidian.

¹⁶Boo dwotwogonu atwa ata kpakwụ-ni-dipi-yebi orubwo atatụ. Bee utegeni bụtụ bụtụ ukakacɛ keeni nkwasha mu na shimwa shu ulwa shi zweni na amɛ muba.

¹⁷Ge Gidion hiɛŋ aŋ, Na ma ngbaraka ma, maa hi na nda gana na Ama nda. Aka na Ngee ci hwayɛ ipɛlu ugba ata, gana elele Ngaa njɛ, ga shɛ gana ata du ahiɛ njɛ.

¹⁸Aka na Ngee hwuri ukakacɛ medenji atwa na namɛ ne mi, nazhɛ hwulo ma du akakacɛ hiŋ nụ ụzalụ we elele na ahiɛ namanjɛ tutu rungwutwonu ugba ata. Ugana ma maa hi hiɛŋ, Iwɛ AGWANGWAMA keeni iwɛ Gidion.

¹⁹Ge Gidion na atwa dipi-yebi a na namɛ nu bwa zhe nu ukwunanga ugba ata, na aka tukwuno tu u'iywa ụjita tudwonu, gunu na te e suje a'iywa anya ofwo. Nazhɛ ee hwuri akakacɛ aba, ee bwereteji nkwasha me ebe aa 'wananjɛ.

²⁰Nazhɛ tudwonu ta ata tụ vwɛ ti yebi tu hwuri du akakacɛ aba, ee bwereteji nkwasha ma aba, aa untanganɛ shimwa shu ulwa ni i'ɛlɛ ya aba ugwulwo, aa 'waŋnɛ akakacɛ aba ni i'ɛlɛ ya aba ibiye maa o no hwulo. Aa uganɛ, ɛɛ hiɛŋ, Utokwobi wa AGWANGWAMA keeni una Gidion.

²¹Bụtụ bụtụ shikeni nu uluji ubwa tutu rungwutwonu ugba ata, ibɛ po ejeshi ata atwa i'ime gezhiji aa ugaga.

²²Aka na te e hwuri akakacɛ ata kpakwụ-ni-dipi-yebi hwɛɛ, nazhɛ AGWANGWAMA njɛ maa ga atwa i'ime ya aba momo sopogonu otokwobi aba hwɛɛ, ejeshi ata gezhiji tutu Bɛt-shita geri bu Zɛrɛra,[22] tutu ogwungwu Ebɛl-mɛhola, to dongonu Tabat.

²³Nazhɛ aa suyanɛ atwa Isrɛl elele a na banɛ nụ ụlamụ Naftali, tụ ụlamụ Ashɛ, keeni ụlamụ Manasɛ zalụ hweehwe, ee urigeni Amidian.

²⁴Ge Gidion tumwanɛ atumwa no ofwo elele na cɛnjɛ ti ishɛmɛ Ifrem, bɛɛ hiɛŋ, Zwe ma maa hi sukakanɛ Amidian, maa hiɛ jɛrɛ aŋ ofwo meni ma ata, tutu Bɛt-bara keeni Jodan du. Aa suyanɛ ụlamụ Ifrem, aa banɛ, aa jɛrɛ aŋ meni ma ata tutu Bɛt-bara keeni Urefu Jodan sasana.

²⁵Ibɛ po aa 'imɛ shɛgwuma sha Amidian shi yebi, go Orɛb keeni Zɛb. Aa kwụnɛ Orɛb nu uparatayɛ Orɛb, aa kwụnɛ Zɛb no onunu na oo pilo meni mụ tụ'walụ ta afwafwa. Ee shishingeni Amidian. Aa shapɛ uhiuhiu Orɛb keeni una Zɛb no ofwo Gidion hileniye Jodan.