Read bassa AJƐMƐ-ỤSHƐRƐYA 8 Bible Online

AJƐMƐ-ỤSHƐRƐYA 8 - bassa bible

AJƐMƐ-ỤSHƐRƐYA 8

¹Nazhɛ etwenyi Ifrem hiɛŋ Gidion, Imbe po abụ tụ suyanɛ shɛ tɛ ɛbi zhɛ ba nda ujasa na Amidiann? Ibɛ po ee 'weji nu bwa tebiye tebiye.

²Ama bi jishijɛ aŋ, bɛɛ hiɛŋ, Imbe kwuuŋ Ngaa nduwa i ci inee hiiŋ? Okwo tumwata ta afwafwa ta atwa Ifrem tɛ zhɛshɛ suu tee hwuri tụ'walụ ta afwafwa Abiɛzɛ tu na ee te cwi shi kwukwuŋ?

³Agwatana nduwa maa hi eri shɛgwuma sha Amidian, go Orɛb keeni Zɛb. Imbe Ngaa nduwa i shɛ aa manga ni inɛ ɛtɛ ahiɛ nduwaa? Aka na ti bee mbishi aŋ n-ndumwa mu ga, nazhɛ isɛbwɛ nɛ ge munje aŋ nu bwa kezhi.

⁴Ge Gidion na atwa kpakwụ-ni-dipi-yebi a na namɛ nu bwa, e ci Urefu Jodan, e lukwumenji. Ama e te uregeni kaa atwa aba i'ime nu usumwa tutuu.

⁵Aka na te e ci ụshɛpwụ ata ɛɛ hiɛŋ, Sukot, bɛɛ hiɛŋ atwa ụshɛpwụ ata, Ma hi tabwa maa hi peni atwa ga mi iyimɛyɛ, e lukwumenji. Gamba kaa N te urigeni Ziba keeni Zalmuna a na shɛ shɛgwuma sha Amidian.

⁶Ibɛ atwa shihwolu shi Sukot hiɛŋ bụ, Bu imwa suu Ziba keeni Zalmuna i shɛ maa ta pana ejeshi bu iyimɛyɛ?

⁷Ge Gidion jishijɛ aŋ, bɛɛ hiɛŋ, Aka elele na AGWANGWAMA leni maa ma ala Ziba keeni Zalmuna, N zhɛ ma hiɛ shɛlanga tuka keeni esepi ga namɛ nụ ụshɛka ga!

⁸Ge Gidion beni apata bee zhe nụ ụshɛpwụ uko ɛɛ hiɛŋ Pɛnuɛl,[23] bɛɛ hiɛŋ aŋ du iwɛ ebe ike ike. Atwa Pɛnuɛl peni bu du ajɛshɛgwa ebe atwa Sukot peni bu.

⁹Bɛɛ hiɛŋ atwa Pɛnuɛl, Aka na Ngee gwure na amɛ-olom, N zhɛ mo hwunzo ashɛkpa ga.

¹⁰Ge Ziba keeni Zalmuna namɛ no ofwo na ɛɛ hiɛŋ Kako ne ejeshi aba igbɛɛ-icenje-na-akpakwụ-a-ta (15,000) a na vwanɛ aŋ kpaaŋ, zalụ bu uwaŋna-banụ. Iwɛnɛ po ejeshi aba a na 'waŋnɛ otokwobi a na aa kwụnɛ namɛ igbɛɛ-dupu-ne-eshe-umpwa (120,000).

¹¹Ge Gidion to tuhwulo boo to uhwaŋna ata palanganɛ ụshɛka, geri bu uwaŋna-banụ bu Noba keeni Jogbɛha, baa sukakanɛ ejeshi ata eshigiri, ta a ta ụhinjanụ nu u'iywa wa aba.

¹²Ge Ziba na Zalmuna a na shɛ shɛgwuma sha Amidian shi yebi, shi gezhiji, ge Gidion urigeni aŋ nu usumwa baa 'imɛ aŋ, bee iricinji ejeshi ata hwɛɛ.

¹³Ge Gidion yɛu Joash banɛ nu ujasa bee dure uhwaŋna Hɛrɛs nu ugwulwo ubwa.

¹⁴Baa 'imɛ usemberi wa atwa Sukot uko, bee heŋteni bu iwɛ atwa aba. Ibɛ usemberi ata 'nyeteni bu nzeci me ehwurembe Sukot atwa dupu-nu-woshi-na-ba-ecenje (77).

¹⁵Ge Gidion zhe no ofwo atwa Sukot, bɛɛ hiɛŋ aŋ, Hioko ma Ziba na Zalmuna, ata ahiɛ n twagajɛ la iwɛ aba, ɛhi hiɛŋ, Bu imwa suu Ziba na Zalmuna i shɛ maa ta pana ejeshi bu a na lukwumenji iyimɛyɛ?

¹⁶Bee suji tuka keeni esepi na namɛ nụ ụshɛka ata bee peni ehwurembe Sukot ulwapɛ.

¹⁷Ge Gidion hwunzhi ashɛkpa Pɛnuɛl, baa kwụnɛ du etwenyi ụshɛpwụ ata.

¹⁸Ge Gidion heŋteni Ziba na Zalmuna, bɛɛ hiɛŋ aŋ, Gana na atwa ata ahiɛ kwụnɛ nu Tabo shɛɛ? Ɛɛ jishijɛ bụ, ɛɛ hiɛŋ, A shɛ gana bụ. Ohiuhiu ohiuhiu aba a shɛ gana miaụŋ ma agwuma.

¹⁹Ge Gidion jishijɛ aŋ, bɛɛ hiɛŋ, Miaụŋ-mo-bino mi aa shɛ, bino bu ko atu namɛ na aba. N hi teji AGWANGWAMA maa, yaa shɛ ahiɛ ga kwụnɛ shɛ aŋ la, N nga zha shɛ ma hi kwụna du o.

²⁰Bɛɛ hiɛŋ yɛu ibwɛ i'wɛtwɛ gɛ Jitɛ, Ishijɛ maa kwụnɛ aŋ! Ama yɛu ɛtɛ ya nda inyɛsɛ, bụ kwụnɛ shɛ aŋ o, iwɛnɛ tu baa ta gwumwa.

²¹Ge Ziba na Zalmuna hiɛŋ Gidion, Ishijɛ ụtụ kwụnɛ ni ikɛnyi bụ. Gana na te butubwenyi shɛ, gobwonu du ukpahiŋ ubwa namɛ. Ge Gidion ishijɛ baa kwụnɛ aŋ ga, bee suji iyi tisemberi nɛ nruhondo ma aba mu ga shananjɛ nu n'ilu ma aba.

²²Na aba inɛ gɛ, ibɛ atwa Isrɛl hiɛŋ Gidion, Sha agwuma tu, ti yɛu bụ keeni ajalụ bụ. Iwɛnɛ po gabụ bi ti lɛshijɛ ni i'ɛlɛ ya Amidian.

²³Ge Gidion jishijɛ aŋ, bɛɛ hiɛŋ, N zha shɛ ma sha agwuma hiŋ o, yɛu mi kaa du zha shɛ ya sha agwuma hiŋ o. Ga AGWANGWAMA shɛ agwuma hiŋ.

²⁴Bɛ hiɛŋ aŋ, N zhɛ ma hi lụpa iyi ike, bụtụ bụtụ hiŋ ga ma m panɛ shɛtakwụ sha ata sha azhɛnarɛya ehi suje nu ujasa. (Iwɛnɛ po o nyiwonowuŋ na shɛtakwụ sha azhɛnarɛya tishana, iwɛnɛ ta a shɛ ụlamụ Ishmɛl.)

²⁵Ɛɛ jishijɛ bụ, ɛɛ hiɛŋ, Ti zhɛ ta bụ pana na amɛ oko hwɛɛ. Ibɛ po ee berishiji utogwo uko, bụtụ bụtụ ba 'waŋ shɛtakwụ shɛ na bee ge suje nu ujasa ata na amɛ utogwo ata.

²⁶Shɛtakwụ sha ata sha azhɛnarɛya shɛ na baa lụpɛ, shɛ shɛ gana akpakwụ-atụndatụ-ni-dipi-yebi (16,100). Inɛ ɛtɛ kaa ta namɛ swooŋ ni i'wɛŋnɛ tisemberi, ti ishɛni-shɛni keeni otogwo aduhwa eshenje a na shɛgwuma sha Amidian shi go urogono. Yaa namɛ du kaa swooŋ ni iyi ti'nyeci tu tuswoswoswo nɛ nruhondo ma aba mu ga shana nu n'ilu ma aba.

²⁷Ge Gidion njɛ ɛfod azhɛnarɛya ni ibɛ, bee shiri iŋ no Ofra na shɛ ụshɛpwụ ubwa, ibɛ atwa Isrɛl hwɛɛ a zhɛba iŋ, ee jineci ya Agwatana aba. Ibɛ po yaa shɛ ya modugwulo mu na mɛ 'imɛ Gidion tu agwuma ubwa hwɛɛ.

²⁸Gana atwa Isrɛl lasụ Amidian, e eri shi e mwe ya kwukwuŋ ta. Cɛnjɛ ta ata kaa ti 'yajɛ amɛ-olom shiywa buhanda na aka Gidion.

²⁹Gɛ Jɛrubeal (na shɛ ge Gidion) yɛu Joash zhe baa jɛjɛ ni ihwɛ ibwɛ.

³⁰Bi meci miaụŋ-me-eyi dupu-nu-woshi (70), iwɛnɛ baa 'yajɛ eyikwo ofwugwo.

³¹Biyikwo bu magɛgashɛ na baa 'yajɛ ni Shɛkɛm metenji bu du yɛu-ye-eyi ike nɛ boo po izeci ti ga Abimɛlɛk.

³²Ge Gidion yɛu Joash yɛ urugbo duwa nazhɛ bee 'wi. Ee ni bu nu u'uye bishi bwa go Joash nu Ofra ata namɛ na Abiɛzɛ.

³³Na aba na ti ge Gidion 'wi fwalaa, ibɛ atwa Isrɛl jɛshɛrɛjɛ sasana aa zhɛba tuwa ti Beal gana maa Agwatana aba ta.

³⁴Atwa Isrɛl teyinji shi ya AGWANGWAMA na shɛ Agwatana aba na lashajɛ aŋ na atwa i'ime ya aba maa a na zhɛba bụ o.

³⁵Atwa Isrɛl mepeni shi ya Jɛrubeal (na shɛ ge Gidion) iwɛ tụlụkpashɛ ti iyi ibiye ye elele nɛ baa ndanɛ aŋ o.