Read bassa JON TATỤ 1 Bible Online

JON TATỤ 1 - bassa bible

JON TATỤ 1

¹Gamba iyɛri[1] ɛtɛ, no ofwo Gaiyos na Omo lubo na tɛkana.

²A-bụtụ bu tulubo, Ma nda adua maa ge iyi elele ibu zhɛmanɛ keeni maa nama du fwaaŋ, okwo gana na ta mpiala mụ bụ mu namɛ lapiya.

³Ma nda unyasa tebiye iwɛ tizhajɛ ta miaụŋ-mo-bino mu ko mu na mi le iwɛ-tɛkana bu tiseyida, gana na ta aba hwuga-unu na tɛkana.

⁴N zasa unyasa na uhwuri una ata o, ibɛ shɛ maa ga Ma hwuga maa miaụŋ[2] mi mi ma hwuga ba unu na tɛkana.

⁵A-bụtụ bu tulubo, bɛ shɛ bụtụ bɛ tɛcara, ni iyi elele nɛ aba ndana miaụŋ-mo-bino, okwo ta a shɛ agaiŋ.

⁶Aba mbishi tụ'ụlwa-tụ-ụhiɛŋshɛ-Agwangwama, iwɛ tulubo tụ bụ. Mbiyono aŋ ma na tahaŋnụ ta aba gana na lemicinji Agwatana amɛ, asha bɛ njɛ tebiye.

⁷Iwɛnɛ ti yaa shɛ iwɛ izeci ɛtɛ Krast ee beni aa sanɛ, e leshiji shi kaa timbiyono te elele ni i'ɛlɛ ya atwa na tɛtanɛ shɛ rishe[3] o.

⁸Iwɛbɛ po atɛ shɛ ta ima atwa gana ata ugaiŋ nu unyasa, iwɛ maa ta nda ugondu na aba iwɛ iwɛ-tɛkana.

⁹N 'nyatanɛ tụ'ụlwa-tụ-ụhiɛŋshɛ-Agwangwama utakada, ama ge Diotrɛfɛs na bo lubo ohwolu umbe-tuhwulo, bi ti leshiji shi o.

¹⁰Iwɛ ecilo ata, yaa shɛ Ngaa zhajɛ, N zhɛ me teyingeni bu ugondu ata ubwa baa nda. Ba tu dumangana n-ndumwa mụ wɛ na tuzwamɛ. Inɛ ɛtɛ ta twa sụ bu o, ubwa ni ikɛnyi ibwɛ kaa leshiji shi miaụŋ-mo-bino tu o. Atwa na kaa a jala yibwa maa e leshiji aŋ, ba lakana aŋ, baa bacɛnga aŋ na tụ'ụlwa-tụ-ụhiɛŋshɛ-Agwangwama.

¹¹A-bụtụ bu tulubo, ta na shata iyi iwɛ o, semi ga shɛ iyi ibiye. Bụtụ na ba nda iyi ibiye, asha bu na ba Agwatana baa shɛ. Ama bụtụ na ba nda iyi iwɛ, asha bu ta kwụbɛ shɛ Agwatana o.

¹²Atwa elele a la Demetrios tiseyida, gobwonu du iwɛ-tɛkana ni ikɛnyi ibɛ ya la bụ tiseyida. Atuba du ta la bụ tiseyida. Gabụ du bi mepi maa tiseyida tu na ata la tɛ shɛ tiseyida tɛ tɛkana.

¹³N nga ta 'yajɛ iyi ifwugwo maa ma bu 'nyatanɛ, ama N jeri shi maa ma bu 'nyatanɛ iŋ nu utakada keeni meni me ti'nyeci o.

¹⁴Ama i namɛ na amɛ mi maa Ma bụ kwụba kakayɛ, nazhɛ eshe tu zhɛ a twa, maa tu dumanjɛ n-ndumwa nu unu tu.

¹⁵Ga amɛ-olom nama na bụ. Eyejilo tu ma bụ 'walụ. 'Walụ eyejilo tu, ohiuhiu ohiuhiu aba.