Read bassa N-NDUMWA TƐKAPƐSHƐNGA 10 Bible Online

N-NDUMWA TƐKAPƐSHƐNGA 10 - bassa bible

N-NDUMWA TƐKAPƐSHƐNGA 10

¹Ngaa kwụbɛ butumwa-ba-azuba bi nya na 'yajɛ ikɛnyi duwa, tu baa banɛ na azuba bee zwe, bu urigeni udomu. Buhwa bacɛ nu uhiuhiu ubwa, ụpɛshɛka ubwa ụ shɛ gana uwaŋna, ɛvwɛvwɛjɛ ubwa a shɛ gana ulwa na shikeni wam gana atukpa.

²Baa untanganɛ utakada uko u tukwungwulo[25] u ticwɛŋ na kapɛshɛngwa nu u'ala ubwa. Bee shiyeji uvwɛvwɛjɛ ubwa u'ala ubiye ni itekwu, bee peteni uvwɛvwɛjɛ ubwa u'ala ugwulwo na cɛnjɛ tuhwoo.

³Baa uganɛ na rụhwụŋ rụ 'wụtụ gana bizeci na bo ngwulo. Aka na tu baa uganɛ, nazhɛ oto ecenje lashajɛ gbada gbada duwa duwa.

⁴Aka na to oto ata ecenje lashajɛ, Ngaa vwɛ cwɛŋ maa ma 'nyata. Ngaa hwụjɛ ta rụhwụŋ ru ko ru dumanɛ iwɛ na azuba, rɛɛ hiɛŋ, Swaka iyi nɛ oto ata ecenje lashajɛ; ta 'nyata iŋ o.

⁵Ngaa kwụbɛ ta butumwa-ba-azuba ebe shikeni ni itekwu keeni cɛnjɛ tuhwoo shepi u'ala ubwa ubiye na azuba,

⁶boo to bụtụ ata namɛ tutu unyizo-nom, na karɛ azuba hwɛɛ ti iyi nɛ namɛ na aba, na karɛ unyizo hwɛɛ ti iyi nɛ zweni nu bwa, na karɛ itekwu hwɛɛ ti iyi nɛ zweni ni ibɛ, bɛɛ hiɛŋ, Ti'insu ti zha shɛ ta nama ya o.

⁷Ama aka na ta butumwa-ba-azuba bi cenje hwulupeni ukakacɛ ubwa, nazhɛ Agwatana zhɛ a ụrɛcɛnga iyi ibwɛ i tusweci, gana na ti bee enengeni la egesere a na shɛ miaụŋ-mu-ugondu ubwa.

⁸Nazhɛ Ngaa hwụjɛ sasana ta rụhwụŋ ru dumanɛ iwɛ ne mi na azuba, rɛɛ hiɛŋ, Zhaga lashɛga utakada ata u ticwɛŋ na kapɛshɛngwa nu u'ala butumwa ata ba azuba shikeni ni itekwu keeni na cɛnjɛ tuhwoo.

⁹Nazhɛ Ngee zhe no ofwo butumwa ata ba azuba, Ngɛɛ hiɛŋ bụ, M panɛ utakada ga u ticwɛŋ. Bɛɛ hiɛŋ, Uma, ya uŋ. U zhɛ wa nda amɛ bu maa e sembi, wɛɛ zhɛ wa latuma nu unu bu gana iswɛ.

¹⁰Ngee leshiji ga utakada ata u ticwɛŋ nu u'ala butumwa ata ba azuba, Ngaa yɛ uŋ. U lacɛmɛ ga nu unu mu gana iswɛ, ama aka na tu Ngaa yɛ uŋ, amɛ mi sembi ga.

¹¹Nazhɛ ɛɛ n hiɛŋ, I shɛ tilɛɛ maa dumanganɛ atwa ofwugwo, ne edenji, na rɛjɛmɛ, keeni shɛgwuma shu ufwugwo tigesere sasana.