Read bassa N-NDUMWA TƐKAPƐSHƐNGA 11 Bible Online

N-NDUMWA TƐKAPƐSHƐNGA 11 - bassa bible

N-NDUMWA TƐKAPƐSHƐNGA 11

¹Nazhɛ ee m peni bininjidegbe na shɛ gana bukwuto be bimenji; ɛɛ hiɛŋ, Ishijɛ, menji umwono wa Agwatana, keeni utukwu-ụrụpɛ, keeni atwa na a zhɛba Agwatana na amɛ ubwa.

²Ganga ukpogwu ata namɛ no tupohondo tu umwono ata wa Agwatana, bacɛnga uŋ, ta manga uŋ o, iwɛnɛ to o pwonuo uŋ atwa na shɛ shɛ atwa Agwatana. Ɛ zhɛ a fwundaka ụshɛpwụ ata tijilo nɛ shivwɛvwɛjɛ sha aba ipiɛnɛ buhanda-ni-bɛ-iyebi.

³N zhɛ mo lonono eseyida mi eyebi a na uregeni tugwuno tu ụzhɛka.[26] Maa a na duma tigesere tutu ijitɛ akpakwụ-ecihiŋ-nu-dupu-ne-eshe-umpwa (1,260).

⁴Eseyida ata eyebi a shɛ i'wɛ'wɛ buta iyebi, keeni eteburu ata asụtụla eyebi, a na shikeni nu umbe Agwangwama na 'yajɛ unyizo.

⁵Yaa shɛ ya kwụlanɛ bụtụ be elele maa nda aŋ iyi iwɛ, ulwa zhɛ wa banɛ no onu aba wo hwoŋzhingo atwa aba i'ime kwunduu. Yaa shɛ kaa ya kwụlanɛ bụtụ be elele maa nda aŋ iyi iwɛ, gobwonu du kaa ɛɛ zhɛ a kwụna bụ.

⁶Eseyida ata 'yajɛ ukpahiŋ maa e kepi tụla maa kede eshilo ngbi na aka tigesere ta aba o. Aa 'yajɛ kaa ukpahiŋ maa a jɛshɛrɛjɛ meni maa mɛ shɛ mehieŋ, keeni maa e jibi unyizo ne tishikpe te elele gana na kwụlanɛ aŋ.

⁷Aka na ee hwuwi tigesere ta aba tụdụma, nazhɛ usunda-ehilo na banɛ nu u'ibwa ata zasa uce zhɛ waa jasa ujasa na aba, bɛɛ zhɛ ba lasụ aŋ, ba kwụna aŋ.

⁸N'wo ma aba mi zhɛ mo tulono ne rishe ru uhwaŋna ụshɛpwụ ata ụ'wụtụ, na shɛ iyi mpiala na shɛ ụsụbwa Sụdụm keeni Ijipti,[27] apata du ee tegeni la Agwangwama aba nrɛ nụ ụ'wụ'wụ-ubatanɛ.

⁹Atwa na bananjɛ na ashashɛ atwamwa, ta alamụ, ta rɛjɛmɛ re elele, te edenji, zhɛ a ngbaraka n'wo ma aba tutu ijitɛ itɛtu na ashashɛ, a zha shɛ o lono maa e ni n'wo ma aba o.

¹⁰Atwa na namɛ nu unyizo zhɛ a nda unyasa iwɛ aba, ɛ zhɛ a nanga tụlagwụ, ɛɛ zhɛ momo pononu apwaŋ, iwɛnɛ po egesere ata eyebi, aba peni la atwa unyizo ụbaụta duwa.

¹¹Ama na aba ijitɛ ɛtɛ itɛtu na ashashɛ, nazhɛ ihwungwɛ banɛ no olugwo Agwatana yee teni na shɛmɛ sha aba, aa ishajɛ ee shikekeni, nazhɛ inyɛsɛ i'wɛtwɛ i shɛ atwa na ga kwụnɛ aŋ la.

¹²Aa hwụjɛ ta rụhwụŋ ru ko rụ 'wụtụ ru dumanɛ iwɛ na azuba, rɛɛ hiɛŋ, Munje ma epe. Ee muji ga na azuba. Atwa-i'ime aba kwụbɛ aŋ to o mungo nu udomu.

¹³Na aka ata gbaa ibɛ cɛnjɛ ti zhingotu duwa duwa, ibɛ po upada u'umpwa ụshɛpwụ ata ụ'wụtụ hwuŋzwo. Atwa na cɛnjɛ ta ata tizhingotu kwụnɛ, namɛ igbɛɛ-itɛtu-na-akpakwụ-a-ta (7,000). Ibɛ po uriri 'imɛ atwa vwɛ, ee peni Agwatana azuba ụjɛrụma.

¹⁴Adangboo eyebi koshikwo ya. Hioko ma, adangboo ụtatụ te ci ba kakayɛ.

¹⁵Aka na ta butumwa-ba-azuba bi cenje hwulupeni ukakacɛ ubwa, nazhɛ rụhwụŋ ru ufwugwo ru dumanɛ iwɛ na azuba, rɛɛ hiɛŋ, Cɛnjɛ-ta-tugwama tu unyizo tɛ shɛ ma tu ta Agwangwama tu, keeni ma tu Krast bwa, ubwa kaa zhɛ ba ya tugwama tutu unyizo-nom.

¹⁶Nazhɛ n-nyarɛ ma ata woshi-na-muba-mi-neshi mu na mu gɛgajɛ nu n-ndwụtwụ ma aba nu umbe Agwatana, mu 'waŋ, mee ubi shishe sha aba na cɛnjɛ, aa zhɛbɛ Agwatana,

¹⁷ɛɛ hiɛŋ, Oo Agwangwama na shɛ Agwatana, na Hwuri Kpaaŋ, tɛ njɛ ugwoje bu, gabụ na bɛ shɛ buumwa, gabụ na bu namba la, gabụ bɛ yɛ tugwama nu ukpahiŋ bu ụ'wụtụ.

¹⁸Edenji njɛ isɛbwɛ, ibɛ po isɛbwɛ bu zhajɛ, keeni aka na maa a jɛmɛ ụshɛrɛya wa atwa na 'wi, ibɛ i shɛ aka na du i shɛ maa e peni egesere, keeni atwa tijilo Agwatana keeni atwa na a sụma izeci bu inyɛsɛ, a na du shɛ miaụŋ-mu-ugondu bu ule wa aba, ta atwa ticwɛŋ cwɛŋ, ta atwa na gembenji, na aka na kaa ɛɛ zhɛ e iricingo atwa na o iricingo unyizo hwɛɛ.

¹⁹Nazhɛ ee kepishinji umwono wa Agwatana na namɛ na azuba, aa kwụbɛ Ikpɛtɛ ibwɛ Unu-tutwa[28] nu umwono ata ubwa. Ɛbɛrɛ a nda, rundu ra nda, oto a kala, cɛnjɛ to zhingotu duwa duwa, atayɛ-eshilo a'wụtụ a 'waŋtatangwụ.