Read bassa N-NDUMWA TƐKAPƐSHƐNGA 13 Bible Online

N-NDUMWA TƐKAPƐSHƐNGA 13 - bassa bible

N-NDUMWA TƐKAPƐSHƐNGA 13

¹Nazhɛ Ngaa kwụbɛ tu usunda-ehilo uko banɛ ni itekwu, u 'yajɛ mahiuaŋ umpwa keeni ohiuhiu ecenje. Na mahiuaŋ ma ata mu bwa, akata tugwama patanganɛ, no ohiuhiu ata ubwa izeci nɛ ya twaga Agwatana namɛ.

²Usunda-ehilo ata Ngaa kwụbɛ sụbɛ ugebi, ɛvwɛvwɛjɛ ubwa sụbɛ a na ucwee, unu ubwa sụbɛ una bizeci. Ibɛ buduwo ata peni bu ukpahiŋ ubwa, ti idwɛtwɛ ibwɛ, keeni ụhwada ụ'wụtụ.

³Uhiuhiu ubwa uko ụ shɛ gana maa a gwụcɛngwa uŋ la wee lemi; ibɛ po aa nɛnjɛ undala ata u tu'wo waa zhɛmananɛ. Ibɛ po yaa dama atwa unyizo hwɛɛ, a 'wa ya usunda ata ehilo.

⁴Ibɛ po aa zhɛbɛ ya buduwo ata, iwɛnɛ ti bee peni usunda-ehilo ata ụhwada ubwa. Aa zhɛbɛ du usunda-ehilo ata, ɛɛ hiɛŋ, Gaaba shɛ gana usunda-ehilo gaa? Gaaba eri ba jasa ujasa nu bwaa?

⁵Nazhɛ ee peni usunda-ehilo ata unu maa bu na duma n-ndumwa mụ 'wụtụ, keeni Agwatana tutwagaga. Ee peni bu du ụhwada maa ta tuhwulo tu ụhwada ata ubwa ipiɛnɛ buhanda-ni-bɛ-iyebi.

⁶Bee kepishinji unu ubwa bee kwuni Agwatana tutwa, baa twaga du izeci ya Agwatana, keeni ofwo na Agwatana a nama, ta atwa na namɛ na azuba.

⁷E leneni bu maa jasa ujasa na atwa tijilo Agwatana, maa lasụ aŋ ga. Ee peni bu ụhwada wa atwa alamụ elele, ta atwa elele, ta rɛjɛmɛ re elele, tu udenji we elele keeni atwagwumwa elele.

⁸Atwa elele na namɛ nu unyizo zhɛ o kwuzono bu a zhɛba bụ, ibɛ shɛ bụtụ be elele na ee 'nyeci shi izeci ibwɛ nu utakada uraiŋ Yɛu-ụgwụdụ nɛ aa kwụnɛ taa na aka na ta a karɛ unyizo.[32]

⁹Yaa shɛ bụtụ be elele 'yajɛ acɛbɛ, asha ga bu na hwuga.

¹⁰Yaa shɛ ɛɛ zhɛ a shapa bụtụ be elele na ti'ima, asha bi zhɛ ga na ti'ima. Yaa shɛ kaa ɛɛ zhɛ a kwụna bụtụ be elele nu utokwobi, asha i shɛ tilɛɛ maa a kwụnɛ bụ ga nu utokwobi! Epe isɛbwɛ-ti'ima keeni rishe-tɛtɛtana ra atwa tijilo Agwatana ru namɛ.

¹¹Ngaa kwụbɛ tu usunda-ehilo unya mwe na cɛnjɛ tu unyizo. Una ata 'yajɛ mahiuaŋ mi yebi gana mu na mi Yɛu-ụgwụdụ, wa duma iwɛ gana buduwo ata.

¹²Wa nda uhwara nu ụhwada usunda-ehilo we ebe uhiiŋ hwɛɛ nu umbe ubwa. Waa njɛ cɛnjɛ tu unyizo keeni atwa na namɛ na tuba ni iji maa o kwuzono usunda-ehilo we ebe uhiiŋ aa nɛnjɛ undala ubwa u tu'wo maa a zhɛbɛ uŋ.

¹³Wa nda arụhwajɛ a'wụtụ, maa ga ulwa banɛ na azuba u zwe nu unyizo ne eshe atwa.

¹⁴Tedure na arụhwajɛ na ee peni usunda-ehilo ga uyebi maa bu na nda nu umbe usunda-ehilo we ebe uhiiŋ, na arụhwajɛ ata kaa bee helekeci atwa na namɛ nu unyizo. Wɛɛ hiɛŋ atwa na namɛ nu unyizo, maa ge e meni usunda-ehilo we ebe aa ga gwụcɛnjɛ nu utokwobi, na 'yagananɛ uraiŋ itɛtɛnuwɛŋ.

¹⁵Ibɛ ee leneni usunda-ehilo ata uyebi maa pana itɛtɛnuwɛŋ usunda-ehilo ata ihwungwɛ, iwɛ maa gɛ itɛtɛnuwɛŋ usunda-ehilo ata na duma n-ndumwa, maa u njɛ du maa a kwụnɛ atwa elele na lacɛ maa a zhɛbɛ itɛtɛnuwɛŋ usunda-ehilo ata.

¹⁶Waa njɛ maa o to bụtụ be elele bi'nyata nu u'ala ubiye kwo kaa ni itune; ta atwa ticwɛŋ cwɛŋ, ta atwa a'wụtụ a'wụtụ, ta azhɛgba to okofwo, ta atwa na mama-'yajɛ ta ajama,

¹⁷iwɛ maa kede bụtụ be elele so ya iyi kwo kaa senji ya iyi o, semi bụtụ na 'yajɛ bi'nyata ata, ibɛ shɛ izeci usunda-ehilo ata, kwo kaa ulamba izeci ibwɛ.

¹⁸Epe ti'inta tu namɛ. Ga bụtụ na eri be eshicigo iyi na rɛta ulamba usunda-ehilo ata, ulamba u butugwumwa waa shɛ. Ulamba ubwa ụ shɛ akpakwụ-atatụ-nu-dupu-ne-eshe-umpwa-na-ba-ecihiŋ (666).[33]