Read bassa N-NDUMWA TƐKAPƐSHƐNGA 14 Bible Online

N-NDUMWA TƐKAPƐSHƐNGA 14 - bassa bible

N-NDUMWA TƐKAPƐSHƐNGA 14

¹Nazhɛ Ngaa mbiyanɛ, Ngaa kwụbɛ Yɛu-ụgwụdụ ti yee shikeni ni Ishɛmɛ Zayon,[34] atwa igbɛɛ-dupu-nu-woshi-ni-bɛ-iyebi (144,000) namɛ pu bwa. A na oo to izeci ibwɛ keeni inɛ Bishi bwa nu ntuno ma aba.

²Ngaa hwụjɛ ta rụhwụŋ ru ko ru banɛ na azuba gana rụhwụŋ ru uwururu meni mu ufwugwo, keeni gana rụhwụŋ ru uto ụ'wụtụ. Rụhwụŋ ra ata Ngaa hwụjɛ rɛ shɛ rụhwụŋ ra atwa na a 'nyama shiduma sha aba.

³Aa zunga azunga ofwo nu umbe idwɛtwɛ ɛtɛ, tu umbe iyi-uumwa ɛtɛ ineshi, keeni umbe n-nyarɛ ma ata. I zasa bụtụ eri bo soso azunga ata o, semi atwa ebe igbɛɛ-dupu-nu-woshi-ni-bɛ-iyebi kiri, a na ee gwube a na banɛ nu unyizo.

⁴Atwa ga meme heshigeni shi ne eyikwo, iwɛbɛ po aa shɛ asapa[35] a na namɛ rụmbɛɛ. Atwa ga aba a 'wa Yɛu-ụgwụdụ no ofwo elele na bɛɛ zhɛ. E gwube atwa ga no olugwo atwa, ibɛ po aa shanɛ Agwatana keeni Yɛu-ụgwụdụ ata wa atwa ticinji ehiiŋ.[36]

⁵A zasa i'inswɛ no onu aba o, a zasa unu-tusapa o.

⁶Nazhɛ Ngaa kwụbɛ butumwa-ba-azuba bi nya, na 'yajɛ Anabarɛ Ebiye unyizo-nom, tu baa hiɛrɛ na ashashɛ azuba, maa anangana atwa elele, ne edenji elele, ta alamụ elele, na rɛjɛmɛ re elele.

⁷Baa dumanɛ iwɛ na rụhwụŋ rụ 'wụtụ, bɛɛ hiɛŋ, Sụma ma Agwatana inyɛsɛ, pana bu ma ụjɛrụma, iwɛnɛ ta aka ci ya maa u duma ụshɛrɛya. Kwuzo ma maa hiɛ zhɛbɛ bụtụ ata njɛ azuba, tu unyizo, ti itekwu, tɛ ɛmɛzhinjɛ meni.

⁸Ibɛ butumwa-ba-azuba bi yebi 'wa bu na ata bi hiiŋ, bɛɛ hiɛŋ, Babulon ụshɛpwụ ata ụ'wụtụ, na njɛ maa ge edenji elele swe mayaga mi isɛbwɛ tuwɛle tu bwa tɛnda u loyo, u loyo.

⁹Nazhɛ butumwa-ba-azuba bu tatụ 'wa atumwa ebe ehiiŋ eyebi, baa dumanɛ iwɛ na rụhwụŋ rụ 'wụtụ, bɛɛ hiɛŋ, Bụtụ be elele na kwuzeni usunda-ehilo ata, kwo kaa itɛtɛnuwɛŋ ibwɛ, kwo kaa oo to bu bi'nyata bu bwa ni itune ibwɛ kwo kaa nu u'ala ubwa,

¹⁰bụtụ ata zhɛ ba swa meni mu tụ'walụ ta afwafwa mi isɛbwɛ ya Agwatana du, mu naa na ee zweni nu ukwopi isɛbwɛ ibwɛ uzawa tihiŋtotongo ni iyi elele. Nazhɛ ɛɛ zhɛ a pana bu ụbaụta ụ'wụtụ nu ulwa keeni tuwiŋ-tu-uwaŋna, ne eshe atumwa-azuba tijilo, te eshe Yɛu-ụgwụdụ ata.

¹¹Nazhɛ nshikwo mu ụbaụta ụ'wụtụ wa atwa na a zhɛba usunda-ehilo ata keeni itɛtɛnuwɛŋ ibwɛ keeni bụtụ be elele na oo to bi'nyata bi izeci ibwɛ, mi zhɛ mo mungo tutu unyizo-nom, a zasa ụhinjanụ tu uwaŋna tu ụjita o.

¹²Epe isɛbwɛ-ti'ima ya atwa tijilo Agwatana namɛ, epe ɛɛ zhɛ a mapa atwa na a untangana unu-tupana wa Agwatana, keeni atwa na a tɛtana Jisus rishe.

¹³Nazhɛ Ngaa hwụjɛ ta rụhwụŋ ru ko ru banɛ na azuba, rɛ n hiɛŋ, 'Nyata, hiɛŋ, Atwa na 'wi na amɛ Agwangwama te kwuni hwuwayɛ i zhɛ geri-be-eshe gwoje. Iwɛ-tɛkana Mpiala mɛ jɛmɛ, mɛɛ hiɛŋ, E beni nu ụbaụta wa aba oo to ụhinjanụ, iwɛnɛ tɛ ɛ zhɛ a lashɛga titeni tu ugondu na aa njɛ la.

¹⁴Nazhɛ Ngaa mbiyanɛ, Ngaa kwụbɛ udomu ụcɛnjɛ! Nu udomu ata bụtụ bu ko na sụbɛ Yɛu Bụtụ[37] jɛjɛ. Baa patanɛ udara wa azhɛnarɛya nu uhiuhiu ubwa, baa untanganɛ iluwuzhe[38] nɛ lacɛmɛ nu u'ala ubwa.

¹⁵Nazhɛ butumwa-ba-azuba bi nya banɛ nu umwono wa Agwatana, baa suyanɛ bụtụ ata jɛjɛ nu udomu ata na rụhwụŋ rụ 'wụtụ, bɛɛ hiɛŋ, Tumwana iluwuzhe bu maa i hwɛ unyizo. Iwɛnɛ po iyi unyizo i nɛ ya tuhwa.

¹⁶Nazhɛ bụtụ ata jɛjɛ nu udomu ata karɛ ga iluwuzhe ibwɛ nu unyizo, yaa hwɛ ga iyi unyizo.

¹⁷Nazhɛ butumwa-ba-azuba bi nya banɛ nu umwono wa Agwatana na namɛ na azuba, baa 'waŋnɛ du iluwuzhe nɛ lacɛmɛ.

¹⁸Nazhɛ butumwa-ba-azuba bi nya na 'yajɛ ụhwada ulwa, banɛ nu utukwu-ụrụpɛ, baa suyanɛ butumwa-ba-azuba ebe ga 'yajɛ iluwuzhe ebe lacɛmɛ, bɛɛ hiɛŋ bụ, Tumwana iluwuzhɛ ɛtɛ bu lacɛmɛ maa i cwe tụ'walụ ta afwafwa tu unyizo, iwɛnɛ ta tụ'walụ ta ata tɛ nɛ ya tebiye.

¹⁹Nazhɛ butumwa ata karɛ ga iluwuzhe ibwɛ nu unyizo, yee cwi ga tụ'walụ ta afwafwa tu unyizo, bee zweni tu no onunu na shɛ u'ibwa ụ'wụtụ na oo rukoto tụ'walụ ta afwafwa, ubwa ụ shɛ u'ibwa isɛbwɛ ya Agwatana.

²⁰Nazhɛ ee rikeci tụ'walụ ta ata nu u'ibwa tuba na namɛ no tupohondo tu ụshɛpwụ ata, nazhɛ mehieŋ mu banɛ nu u'ibwa ata oo rukoto tụ'walụ ta ata, maa fwụnjɛ gana Urefu na ụnjɛswa ubwa u ci ɛmɛli ukpakwụ, me'ilwo mu bwa mu vwɛ cwɛŋ maa mɛ yɛ budakwa.