Read bassa N-NDUMWA TƐKAPƐSHƐNGA 15 Bible Online

N-NDUMWA TƐKAPƐSHƐNGA 15 - bassa bible

N-NDUMWA TƐKAPƐSHƐNGA 15

¹Nazhɛ Ngaa kwụbɛ iyi tudama inyɛ na azuba, i shɛ iyi i'wɛtwɛ keeni iyi ụrụhwajɛ. Atumwa-azuba ecenje 'yajɛ tishikpe ti cenje tu na tɛ shɛ ma tu tu umɛwɛɛ, na amɛ tuba isɛbwɛ ya Agwatana ulwa.

²Nazhɛ Ngaa kwụbɛ iyi nɛ shɛ gana itekwu irɛtɛ, nɛ hiŋtotongu nu ulwa, keeni atwa na lasụ usunda-ehilo ata, ti itɛtɛnuwɛŋ ibwɛ, tu ulamba izeci ibwɛ; ta a patanganɛ ni itekwu ɛtɛ irɛtɛ, aa untanganɛ shiduma sha Agwatana.

³Aa zunga azunga Moses, na shɛ yɛu-ugondu ya Agwatana, keeni azunga Yɛu-ụgwụdụ ata, ɛɛ hiɛŋ, Oo Agwangwama na shɛ Agwatana, na Hwuri Kpaaŋ, ugondu bu ụ shɛ una ụ'wụtụ, keeni una ụrụhwajɛ. Gabụ bụtụ na Hwuri Kpaaŋ, ihwɛŋnɛ bu namɛ ririri; gabụ Agwuma edenji,[39] ihwɛŋnɛ bu i shɛ inɛ tɛkana!

⁴Oo Agwangwama, gaaba zha shɛ ma bu sụma inyɛsɛɛ? Gaaba zha shɛ ba pana izeci bu ụjɛrụmaa? Iwɛnɛ ti yaa shɛ gabụ kiri bɛ shɛ bụtụ bụ tụrụmbɛɛ; iwɛbɛ po edenji elele zhɛ a zhajɛ a bu zhɛba; iwɛnɛ tu ugondu bu u tiririri banɛ caakwụ.

⁵Na aba inɛ gɛ, Ngaa kwụbɛ te e kepishinji umwono na shɛ udulo u tiseyida na azuba.

⁶Nazhɛ atumwa-azuba ecenje a na 'yajɛ tishikpe ta ata, banɛ nu umwono ata. E uregeni ɛlinɛn nɛ namɛ shɛshɛshɛ inɛ cɛnjɛmɛ paawụụ, ee umpi amazhɛya azhɛnarɛya na shɛgba sha aba.

⁷Nazhɛ iyi-uumwa ɛtɛ ike na ashashɛ iyi-uumwa ɛtɛ ineshi peni atumwa ata wa azuba shikolo sha azhɛnarɛya shi cenje, shɛ na isɛbwɛ ya Agwatana na shɛ buumwa tutu unyizo-nom shini na amɛ shɛ ba.

⁸Nazhɛ nshikwo na mu banɛ nu ụjɛrụma keeni ukpahiŋ wa Agwatana, mi shini nu umwono ata. I zasa bụtụ be elele na eri bo tono nu umwono ata o, semi aka na te tishikpe ta ata ti cenje ta atumwa ata wa azuba ecenje tu hwuwowu.