Read bassa N-NDUMWA TƐKAPƐSHƐNGA 16 Bible Online

N-NDUMWA TƐKAPƐSHƐNGA 16 - bassa bible

N-NDUMWA TƐKAPƐSHƐNGA 16

¹Nazhɛ Ngaa hwụjɛ ta rụhwụŋ ru ko ru banɛ nu umwono ata Agwatana, rɛɛ hiɛŋ atumwa ata azuba ecenje, Zhaga 'waŋ ma isɛhwɛ ɛtɛ ya Agwatana i zweni no shikolo sha ata shi cenje nu unyizo.

²Ibɛ po bu na bi hiiŋ 'wɛŋ inɛ yo okolo ubwa nu unyizo. Nazhɛ undala uci'nyɛ na wa gwuma bụtụ, to atwa na 'yajɛ bi'nyata bu usunda-ehilo ata, keeni atwa na a zhɛba itɛtɛnuwɛŋ ibwɛ.

³Bu na bi yebi 'wɛŋ inɛ yo okolo ubwa ni itekwu; nazhɛ itɛkwu ɛtɛ jɛshɛrɛjɛ mehieŋ, gana mu na ma bụtụ na 'wi. Nazhɛ iyi elele nɛ ya hwungwa ni itekwu ɛtɛ i 'wi.

⁴Bu na bu tatụ 'wɛŋ inɛ yo okolo ubwa ne erefu keeni ɛmɛzhinjɛ meni, ibɛ aa jɛshɛrɛjɛ mehieŋ.

⁵Nazhɛ Ngaa hwụjɛ ta butumwa-ba-azuba be meni hiɛŋ, Oo gabụ bụtụ bụ tụrụmbɛɛ, na shɛ bụtụ bi Tijilo, na namba, na namɛ cala! Gabụ bɛ jɛmɛ ụshɛrɛya ijɛ.

⁶Aba 'wɛŋ mehieŋ[40] ma atwa bu tijilo keeni mu na me egesere bu, ibɛ po ebi peni aŋ mehieŋ maa e swe, iwɛnɛ ta a lanɛ na muba.

⁷Ngaa hwụjɛ ta rụhwụŋ ru banɛ nu utukwu-ụrụpɛ, rɛɛ hiɛŋ, Oo Agwangwama na shɛ Agwatana, na Hwuri Kpaaŋ, iiŋ, ụshɛrɛya na aba duma namɛ shiriri.

⁸Bu na bineshi 'wɛŋ inɛ yo okolo ubwa nu uwaŋna. Ibɛ po ee peni uŋ ụhwada maa u hwoŋzhingo atwa nu ulwa.

⁹Ibɛ po oholobwo a'wụtụ hwoŋzhinji atwa, ibɛ po atwa twajɛ izeci ya Agwatana na 'yajɛ ụhwada tishikpe ta ata. A jɛshɛrɛjɛ shɛ kaa shihaŋsa sha aba maa e peni bu ụjɛrụma o.

¹⁰Bu na bu tana 'wɛŋ inɛ yo okolo ubwa ni idwɛtwɛ usunda-ehilo ata. Nazhɛ cɛnjɛ-ta-tugwama tu bwa tɛ shɛ tishi; atwa a ya irɛtu ya aba iwɛ ụngwụ na aa hwuga.

¹¹Aa twajɛ Agwatana azuba iwɛ ụngwụ wa aba na aa hwụjɛ, keeni iwɛ andala aba. Ama a jɛshɛrɛjɛ shɛ kaa shihaŋsa sha aba maa e genji ugondu wa aba ụwɛ o.

¹²Bu na bi cihiŋ 'wɛŋ inɛ yo okolo ubwa nu Urefu ụ'wụtụ na ɛɛ hiɛŋ, Yufretis, ibɛ po meni mu bwa mu hwɛŋ, iwɛ maa uhwaŋna namana shɛgwuma shɛ na shi zhɛ sha banɛ geri bu uwaŋna-banụ.

¹³Ngaa kwụbɛ mpiala mụ wɛ[41] mu tatụ, mu na mu sụbɛ okwutu, tu maa banɛ nu unu buduwo ata, tu unu usunda-ehilo ata keeni unu bigesere ata bu tukata.

¹⁴Mɛ shɛ mpiala ma atumwa-ibiri, mu na ma nda arụhwajɛ. Mee beni mee zhe no ofwo shɛgwuma shi unyizo, tutu ofwo elele na atwa jɛjɛ, mee suje aŋ mee suteni iwɛ ujasa, nu ụjita ụ'wụtụ na shɛ ụjita wa Agwatana na Hwuri Kpaaŋ.

¹⁵Hioko ma, Gamba ta me ci gana buzundo! Bụtụ na ba 'yaka, na ba ima otogwo ubwa u'ala, iwɛ maa kede bu no rungo mohondo, maa kede a kwụbɛ ezuye ubwa o, gwoje.

¹⁶Ibɛ Mpiala ma ata mu suje aŋ mee suteni no ofwo na Ehibru ɛ hiɛŋ, Hamagɛdon.[42]

¹⁷Bu na bi cenje 'wɛŋ inɛ yo okolo ubwa na mpiala na mo vwungo. Nazhɛ rụhwụŋ ru ko rụ 'wụtụ ru banɛ nu umwono wa Agwatana keeni ni idwɛtwɛ ɛtɛ, rɛɛ hiɛŋ, I nduwa ya.

¹⁸Nazhɛ ɛbɛrɛ a nda, rundu ra nda, oto a kala, cɛnjɛ to zhingotu gana na to o to zhingotu su la kwukwuŋ, taa na aka na ta atwa namɛ la hwayɛ nu unyizo. Cɛnjɛ ta ata tizhingotu ti 'yajɛ ikɛnyi tebiye, ta a shɛ kaa ma tu tụ 'wụtụ.

¹⁹Ụshɛpwụ ata ụ'wụtụ dwotwogonu orubwo atatụ, nazhɛ ashɛpwụ edenji hwuŋzwotongwu. Agwatana kaa teyinje Babulon ata ụ'wụtụ, maa pana uŋ meni mu tụ'walụ ta afwafwa mi isɛbwɛ ibwɛ i'wɛtwɛ maa swa.

²⁰Adakwụ Urefu 'inɛ hwɛɛ, tu nshama mu zasaba ya o.

²¹Nazhɛ atayɛ-eshilo a na uzhinono wa aba ụ shɛ gana bimenji dipi-yebi, banɛ na azuba, ee tegeni atwa. Ibɛ po atwa ata twajɛ Agwatana iwɛ tishikpe ta ata ta atayɛ-eshilo, iwɛnɛ te tishikpe ta ata tu hwuri ugombo.