Read bassa N-NDUMWA TƐKAPƐSHƐNGA 17 Bible Online

N-NDUMWA TƐKAPƐSHƐNGA 17 - bassa bible

N-NDUMWA TƐKAPƐSHƐNGA 17

¹Nazhɛ butumwa-ba-azuba bu ko na ashashɛ atumwa-azuba ata ecenje a na 'yajɛ shikolo sha ata shi cenje, zhajɛ baa duma n-ndumwa ne mi, bɛɛ hiɛŋ, Zhajɛ epe, maa Mo bu mbisono ta a duma ụshɛrɛya buwɛle ata bụ 'wụtụ na ba gɛga ne meni mu ofwugwo.

²Ubwa na shɛgwuma shi unyizo shɛ njɛ tuwɛle nu bwa. Ibɛ po mayaga mu tuwɛle tu bwa mɛ 'imɛ atwa na namɛ nu unyizo.

³Nazhɛ butumwa ata m becinji apata na amɛ mpiala, bee n shiri nu ụshɛka, apata Ngaa kwụbɛ biyikwo bu ko na patanɛ na aba usunda-ehilo uko ushenje. Usunda ata 'yajɛ ohiuhiu ecenje keeni mahiuaŋ umpwa, Agwatana tutwagaga urigeni bu hwɛ hwɛɛ bwa.

⁴Biyikwo ata uregeni tugwuno tu uduhwa ushenje keeni ma ti ti shenje howu, bɛɛ mɛmɛ njɛ tisemberi na azhɛnarɛya, keeni atayɛ ogwumishi, keeni odworo. Baa 'waŋnɛ ukwopi wa azhɛnarɛya nu u'ala ubwa, iyi-tupwaŋ, keeni iyi tuwɛle tu bwa nɛ zasa shɛshɛshɛ shini nu ukwopi ata.

⁵Izeci ike 'nyeci ni itune ibwɛ, ɛɛ hiɛŋ: Iyi tusweci, Babulon ata Ụ'wụtụ, bino ba anjɛ-tuwɛle keeni bino bi iyi-tupwaŋ nu unyizo.

⁶Ngaa kwụbɛ te mehieŋ ma atwa tijilo Agwatana keeni mu na me eseyida Jisus ma ngba biyikwo ata. Aka na tu Ngaa kwụbɛ bụ, yaa n shanɛ iyi ụrụhwajɛ i'wɛtwɛ.

⁷Nazhɛ butumwa ata ba azuba n hiɛŋ, Iwembe po yaa bu shanɛ iyi ụrụhwajɛɛ? N zhɛ mo bu mbisono iyi tusweci iwɛ biyikwo ata, keeni iwɛ usunda-ehilo ata u 'waŋnɛ bụ, ugata 'yajɛ ohiuhiu ecenje keeni mahiuaŋ umpwa.

⁸Usunda-ehilo ata abu kwụbɛ, u namwawaŋ la, ama u zasaba ya hwuwayɛ o, u tɛ zhɛ kaa we munje maa u banɛ nu u'ibwa ata zasa uce, maa tono ufwu tɛnda. Aka na ta atwa na namɛ nu unyizo, a na ee 'nyeci shi nzeci ma aba nu utakada uraiŋ,[43] taa na aka na ta a karɛ unyizo, kwụbɛ usunda-ehilo ata na namwawaŋ la, na kaa zasaba ya, na kaa te e ci, i zhɛ ya dama aŋ.

⁹Epe ti'inta keeni iyi-ti'eshicigo namɛ. Ohiuhiu ata ecenje a shɛ nshama mi cenje, mu na biyikwo ata ba gɛga;

¹⁰maa shɛ du shɛgwuma shi cenje. Shɛgwuma shɛ ta shi loyo na ashashɛ aba, bu ko ta namba taa hwayɛ, ama binya bi te ci shi o, ama aka na bee ci, i shɛ tilɛɛ maa bo ilogogo cwɛŋ bana.

¹¹Usunda-ehilo ata na namwawaŋ la cala, na kaa zasaba ya hwuwayɛ, ubwa du shɛ bụtụ bu tụndatụ na banɛ na ashashɛ shɛgwuma shi cenje, na zhɛ wo tono ufwu tɛnda.

¹²Mahiuaŋ ma ata umpwa abụ kwụbɛ, mɛ shɛ shɛgwuma umpwa, shɛ na shi te leshiji shi cɛnjɛ-ta-tugwama ta aba, ama ɛ tɛ zhɛ a lashɛga ụhwada tugwama ta aba na aka oko abana nu usunda-ehilo ata.

¹³Ahaŋsa atwa ga a shɛ oko, ɛ zhɛ a pana usunda-ehilo ata ukpahiŋ wa aba keeni ụhwada wa aba.

¹⁴Atwa ga zhɛ a jasa ujasa ni Yɛu-ụgwụdụ ata, ama Yɛu-ụgwụdụ ata kaa zhɛ ya lasụ aŋ, iwɛnɛ tu baa shɛ Agwangwama shɛgwangwama keeni Agwuma shɛgwuma. Atwa na namɛ nu bwa, a shɛ atwa na baa suyanɛ, bee teri, a na shɛ atwa tɛcara.

¹⁵Nazhɛ butumwa ata ba azuba n hiɛŋ, Meni ma ata mu ofwugwo abu kwụbɛ biyikwo ata jɛjɛ, mɛ shɛ atwa ofwugwo, ne edenji, keeni rɛjɛmɛ.

¹⁶Mahiuaŋ ma ata umpwa abu kwụbɛ, keeni usunda-ehilo ata, ɛ zhɛ o imo buwɛle ata, ɛɛ zhɛ o tufworongo bu tugwuno maa shilo mohondo, ɛ zhɛ a ya usunda-tu'waba ubwa, ɛɛ zhɛ o hwoŋzhingo bu nu ulwa kwunduu.

¹⁷Iwɛnɛ po Agwatana shiyeni iyi nɛ namɛ na ahaŋsa ubwa na shɛmɛ sha shɛgwuma sha ata, maa shɛmɛ sha aba shɛ nama shi ko, maa e peni usunda-ehilo ata cɛnjɛ-ta-tugwama tu bwa uuwa i ci aka na iwɛ nɛ Agwatana jɛmɛ i sɛ.

¹⁸Biyikwo ata abụ kwụbɛ, ubwa shɛ ụshɛpwụ ata ụ'wụtụ na yɛ tugwama ta shɛgwuma shi unyizo.