Read bassa N-NDUMWA TƐKAPƐSHƐNGA 19 Bible Online

N-NDUMWA TƐKAPƐSHƐNGA 19 - bassa bible

N-NDUMWA TƐKAPƐSHƐNGA 19

¹Na aba inɛ gɛ, Ngaa hwụjɛ rụhwụŋ na azuba gana rụhwụŋ ra atwa ofwugwo ụ'wụtụ, rɛɛ hiɛŋ, Haleluya! Agwatana tu, ubwa 'yajɛ ubino, tu ụjɛrụma, tu ukpahiŋ,

²iwɛnɛ tu baa dumwa ụshɛrɛya u tɛkana, keeni una u tishiriri, baa dumwa kaa ụshɛrɛya buwɛle ata bụ 'wụtụ, na tecinji unyizo ụdamụ nɛ tuwɛle tu bwa. Baa tupwanua bu kaa tụlụkpashɛ ta tụkwụna tu na baa kwụnɛ miaụŋ-mu-ugondu ubwa.

³Ɛɛ hiɛŋ sasana, Haleluya! Nshikwo mu tuhwoŋtu tu bwa mu munji tutu unyizo-nom.

⁴Nazhɛ n-nyarɛ ma ata woshi-na-muba-mi-neshi, keeni iyi-uumwa ɛtɛ ineshi, hiɛŋ, Ami! Haleluya!

⁵Nazhɛ rụhwụŋ ru banɛ ni idwɛtwɛ ɛtɛ, rɛɛ hiɛŋ, Ahiɛba miaụŋ-mu-ugondu Agwatana tu, ta ahiɛba na hia sụma bu inyɛsɛ, ta atwa ticwɛŋ cwɛŋ, ta atwa a'wụtụ a'wụtụ, shɛtana bu ma.

⁶Nazhɛ Ngaa hwụjɛ iyi ike gana rụhwụŋ ra atwa ofwugwo ụ'wụtụ, keeni gana rundu re meni mu ofwugwo, gana maa rundu ro oto a na 'yajɛ ikɛnyi, rɛɛ hiɛŋ, Haleluya! AGWANGWAMA na shɛ Agwatana tu na Hwuri Kpaaŋ, ba ya tugwama!

⁷Tu na nda ma unyasa, tu na bwada ma unyasa, maa ti peni bu ma ụjɛrụma, iwɛnɛ ta aka towo ti Yɛu-ụgwụdụ ata i ci ya! Biyikwo bwa bu ufwo kaa mama imwangwa.

⁸Ibɛ po ee peni bu ụhwada maa urugono tugwuno ti ilinɛn ti biye, tu na tɛ cɛnjɛmɛ paawụụ, tu na kaa tu namɛ rụmbɛɛ. (Iwɛnɛ po ilinɛn ɛtɛ ibiye ibɛ shɛ ugondu u tiririri na atwa tijilo Agwatana njɛ).

⁹Nazhɛ butumwa ata ba azuba n hiɛŋ,[46] 'Nyata maa, Atwa na aa suyanɛ no ofwo iyimɛyɛ towo ti Yɛu-ụgwụdụ ata gwoje! Bɛɛ n hiɛŋ sasana, Iwɛ gɛ i shɛ iwɛ-tɛkana ya Agwatana.

¹⁰Ngee leyi ni ivwunɛ ibwɛ maa ma zhɛba bu. Bɛɛ n hiɛŋ, Awo! Ta nda inɛ ɛtɛ o! Miaụŋ-mu-ugondu atɛ shɛ atuba na bu, atuba na bu tɛ shɛ miaụŋ-mo-bino mu na mu untanganɛ iwɛ tiseyida ti Jisus. Kwuzo maa zhɛbɛ Agwatana; iwɛnɛ po mpiala mi eni atwa upo ee le tiseyida ti Jisus gana tigesere.

¹¹Nazhɛ Ngaa kwụbɛ ta azuba kapɛshɛngwa, Ngaa kwụbɛ budakwa bɛ cɛnjɛ, keeni bụtụ na ba suka bụ. Bụtụ ata shɛ bụtụ bɛ tɛcara, keeni bụtụ bɛ tɛkana. Ne tishiriri baa duma ụshɛrɛya keeni ujasa tijasa.

¹²Eshe ubwa a shɛ gana bụratụ bu ulwa, akata tugwama patanganɛ nu uhiuhiu ubwa. E 'nyeci izeci ike na tu'waba tu bwa, inɛɛ nɛ zasa bụtụ be elele na mepi iŋ, semi ubwa ata ni ikɛnyi ibwɛ kiri.

¹³Bee urigeni utogwo na ee shiyeji ne mehieŋ,[47] ɛ hiɛŋ izeci ibwɛ, n-ndumwa ma Agwatana.

¹⁴Ejeshi azuba patanganɛ idɛkwɛ icɛnjɛ, ee uregeni tugwuno ti ilinɛn ti biye tɛ cɛnjɛ, tu na tu namɛ rụmbɛɛ, aa 'wa bụ.

¹⁵Utokwobi na lacɛmɛ banɛ nu unu ubwa, iwɛ maa pa uŋ edenji. Ne bidingbengbere bu ụshɛmbɛrɛ, bɛɛ zhɛ ba nda u'iywa wa aba. Bi zhɛ kaa bo rukoto aŋ nu u'ibwa ata ụ shɛ onunu na oo rukoto tụ'walụ ta afwafwa, na shɛ isɛbwɛ i tinyarɛrɛ ya Agwatana na Hwuri Kpaaŋ.

¹⁶Ɛ hiɛŋ izeci nɛ ee 'nyeci nu utogwo ubwa, keeni n'nto mu bwa, Agwuma shɛgwuma keeni Agwangwama shɛgwangwama.

¹⁷Nazhɛ Ngaa kwụbɛ butumwa-ba-azuba bu ko ti bee shikeni nu uwaŋna, baa uganɛ duwa, bɛɛ hiɛŋ shanụnụ shɛ na sha hila na azuba, Zhajɛ ma, maa hi ụlwataganụ iyimɛyɛ ụrụmɛ i'wɛtwɛ ya Agwatana,

¹⁸iwɛ maa hiɛ yɛ tu'waba ta shɛgwuma, te ehiu ejeshi, ta atwa na 'yajɛ ikɛnyi, ti idɛkwɛ, ta atwa na a suka iŋ, ta atwa elele, ta atwa na mama-'yajɛ, ta ajama, ta atwa ticwɛŋ cwɛŋ, ta atwa a'wụtụ a'wụtụ!

¹⁹Nazhɛ Ngaa kwụbɛ usunda-ehilo ata, ta shɛgwuma shi unyizo keeni ejeshi aba, ta a ụlwatagwụ maa e jeshi bụtụ ata ba suka budakwa ata keeni ejeshi ubwa.

²⁰Ibɛ po aa 'imɛ usunda ata ehilo, keeni bigesere ata bu tukata abana nu bwa, ubwa shɛ bigesere ata njɛ arụhwajɛ nu umbe ubwa, na kaa helekeci atwa na oo to la bi'nyata bu usunda-ehilo ata, keeni atwa na kwuzeni itɛtɛnuwɛŋ ibwɛ. Ee suji aŋ buumwa buumwa, a 'wɛŋ nu ukwokwo ulwa na tuwiŋ-tu-uwaŋna to hwoŋno.

²¹Nazhɛ bụtụ ata ba suka budakwa ata kwụnɛ atwa vwɛ nu utokwobi ata ubwa na banɛ nu unu ubwa. Nazhɛ shanụnụ she elele shi shigeji na tu'waba ta aba tu na aa yɛ.