Read bassa N-NDUMWA TƐKAPƐSHƐNGA 2 Bible Online

N-NDUMWA TƐKAPƐSHƐNGA 2 - bassa bible

N-NDUMWA TƐKAPƐSHƐNGA 2

¹'Nyatana butumwa bu tụ'ụlwa-tụ-ụhiɛŋshɛ-AGWANGWAMA, na namɛ nɛ Ɛfɛsɛs utakada, hiɛŋ bụ, Bụtụ ata untanganɛ mkpasu mi cenje nu u'ala ubwa ubiye, na kaa bo rungo na ashashɛ eteburu-asụtụla ecenje a na aa njɛ na azhɛnarɛya, ubwa ba duma iwɛ gɛ, bi hiɛŋ,

²M mepi ugondu bu, tụ ụbaụta bụ keeni isɛbwɛ bu ti'ima gom, maa bu lacɛmɛ shɛ na atwa awɛ o. Gabụ bi menji atwa na mama suyana maa a shɛ atumwa, a na kaa shɛ shɛ atumwa, abu kwụbɛ kaa maa a shɛ atwa tukata.

³M mepi maa bɛ 'imɛ-isɛbwɛ, abu uranjɛ kaa iwɛ izeci mi, bu lukwumi shi kaa o.

⁴Ama i 'yajɛ iyi ike nɛ Ngɛɛ zhɛ ma bu sukakana iwɛ ibɛ, bi genji tulubo ta ala tụ bụ ti hiiŋ.

⁵Ibɛ po teyinje olugwo na abu banɛ abu layɛ, maa jɛshɛrɛjɛ-ahaŋsa, maa njɛ ugondu ala bu uhiiŋ; shibwonu, Gamba ta me ci pụ bụ. Yaa shɛ abɛ jɛshɛrɛjɛ shɛ ahaŋsa, N zhɛ mo mwo uteburu-ụsụtụla bụ no ohwolu ubwa.

⁶Ama iyi nɛ abi 'yajɛ na; ibɛ shɛ maa bo imo ugondu wa atwa Nikolatia,[9] ubwa ụ shɛ unaa na Omo imo du ni ikɛnyi mi.

⁷Bụtụ na 'yajɛ acɛbɛ, ga bu na hwuga iwɛ nɛ Mpiala mo mbiso tụ'ụlwatagwụ-tụ-ụhiɛŋshɛ-Agwangwama. Bụtụ na lasụ, N zhɛ ma pana bụ tụ'walụ tụ ụ'wụ'wụ ata uraiŋ namɛ na ashashɛ Paradais Agwatana, maa ya.

⁸'Nyatana butumwa bu tụ'ụlwa-tụ-ụhiɛŋshɛ-AGWANGWAMA, tu Smuna utakada, hiɛŋ bụ, Bụtụ ata bi hiiŋ na shɛ bụtụ bu umɛwɛɛ, na 'wi la, na kaa ta 'yajɛ uraiŋ, ubwa ba duma iwɛ gɛ, bi hiɛŋ,

⁹M mepi ụbaụta bụ, to tukofwo tụ bụ gom; ama bɛ shɛ kaa bɛzhɛgba. M mepi tugbozhigo tu na atwa na hiɛŋ maa a shɛ Eju a na kaa shɛ shɛ Eju, mo bu gbozhigo, ama a shɛ atwa umwono tu'ulwa ti Setan.

¹⁰Ta nda inyɛsɛ iyi nɛ ɛbi zhɛ bo hioko ụbaụta ibɛ o. Hioko Ibiri zhɛ yo zwono atwa oko na ashashɛ hiŋ nu umwono-tishi, iwɛ maa ehi menji, maa hi hieci ụbaụta i ci ijitɛ umpwa. Ama sha bụtụ bɛ tɛcara uuwa i ci tu'wo, nazhɛ Ngɛɛ zhɛ ma bu pana udara uraiŋ.[10]

¹¹Bụtụ na 'yajɛ acɛbɛ, ga bu na hwuga iwɛ nɛ Mpiala mo mbiso tụ'ụlwatagwụ-tụ-ụhiɛŋshɛ-Agwangwama. Bụtụ na lasụ, tu'wo ti yebi[11] ti eri shi ta nda bu ya iyi elele kwukwuŋ.

¹²'Nyatana butumwa bu tụ'ụlwa-tụ-ụhiɛŋshɛ-Agwangwama, tu Pɛgamum utakada, hiɛŋ bụ, Bụtụ ata 'yajɛ utokwobi na lacɛmɛ apada hweehwe, ubwa ba duma iwɛ gɛ, bi hiɛŋ,

¹³M mepi ofwo na abɛ jɛjɛ; ibɛ shɛ ofwo ata idwɛtwɛ Setan namɛ, abu untanganɛ kaa izeci mi dimi. Bi teri shi kaa ashamanjɛ iwɛ rishe rụ bụ tɛtɛtana ne mi o, okwo na aka na aa kwụnɛ la Antipas na ashashɛ hiŋ, no ofwo na ge Setan jɛjɛ, iwɛnɛ tu baa shɛ useyida mu u tɛcara.

¹⁴Ama N 'yajɛ iyi ike nɛ Ngɛɛ zhɛ ma bu sukakana iwɛ ibɛ, iwɛnɛ ta abi 'yajɛ atwa oko a na untanganɛ imbisegeni balam[12] apata. Ubwa shɛ bụtụ ata mbisegeni la balak maa ga halakaka miaụŋ mi Isrɛl, maa a yɛ iyi nɛ oo to ụrụpɛ nu ntatanuwaŋ maa a njɛ du tuwɛle.

¹⁵Abi 'yajɛ sasana atwa oko a na untanganɛ imbisegeni ya atwa Nikolatia.[13]

¹⁶Ibɛ po jɛshɛrɛga-ahaŋsa bu, shibwonu, Gamba ta me ci pụ bụ kakayɛ, maa ma jasa ujasa na aba nu utokwobi unu mu.

¹⁷Bụtụ na 'yajɛ acɛbɛ ga bu na hwuga iwɛ nɛ Mpiala mo mbiso tụ'ụlwatagwụ-tụ-ụhiɛŋshɛ-Agwangwama. Bụtụ na lasụ, ubwa Ngɛɛ zhɛ ma pana mana uko na swacɛ, keeni utayɛ ata cɛnjɛmɛ paawụụ. Izeci ifwo 'nyeci nu utayɛ ata, nɛ zasa bụtụ be elele na mepi iŋ semi bụtụ ata leshiji uŋ kiri.

¹⁸'Nyatana butumwa bu tụ'ụlwa-tụ-ụhiɛŋshɛ-Agwangwama tu Tayatayɛra utakada, hiɛŋ bụ, Yɛu ya Agwatana nɛ eshe ubwa a shɛ gana bụratụ bu ulwa, na ɛvwɛvwɛjɛ ubwa a shɛ gana utumburɛ na wa ta, ubwa ba duma iwɛ gɛ, bi hiɛŋ,

¹⁹M mepi ugondu bu, to tulubo tụ bụ, te rishe rụ bụ tɛtɛtana keeni iyi nɛ aba ndana atwa, ti isɛbwɛ bu ti'ima gom; maa ugondu bu umɛwɛɛ, uhwuri una uhiiŋ.

²⁰Ama kaa N 'yajɛ iyi nɛ Ngɛɛ zhɛ ma bu sukakana iwɛ ibɛ, ibɛ shɛ iwɛnɛ ebi leneni biyikwo ata, gɛ Jɛzɛbɛl,[14] na mɛmɛ hiɛŋ bigesere. Boo mbisogono miaụŋ-mu-ugondu mu, baa inzhɛnga aŋ maa ga na nda tuwɛle, maa du ga a na ya iyi nɛ oo to ụrụpɛ nu ntatanuwaŋ.

²¹Ngoo pwonuo bu aka maa ga jɛshɛrɛga-ahaŋsa, ama i kwụlanɛ shɛ bụ maa jɛshɛrɛga-ahaŋsa maa ganga tuwɛle tɛnda o.

²²Hioko, N zhɛ ma kala bu no ogodo ụngwụ. Yaa shɛ atwa na a nda tuwɛle nu bwa jɛshɛrɛjɛ shɛ shihaŋsa sha aba, maa e genji ugondu ata wa aba, asha N zhɛ mo zwono aŋ nu ụbaụta ụ'wụtụ.

²³N zhɛ ma kwụna miaụŋ mu bwa.[15] Nazhɛ tu'ulwatagwụ-tụ-ụhiɛŋshɛ-Agwangwama hwɛɛ ti zhɛ ta mapa maa, Gamba ma yalaga shihaŋsa keeni shɛmɛ. N zhɛ ma tụpa bụtụ bụtụ hiŋ te teni cɛŋ gana na tu baa njɛ ugondu ubwa.

²⁴Ama ahiɛba na hiɛ vwɛ nu Tayatayɛra, na hi zasa imbisegeni Setan nɛ ɛɛ hiɛŋ, Me'ilo, Mo hi mbiso maa, N zha shɛ ma hi kaana i'wɛŋnɛ inyɛ nɛ zhineni tupatana o.

²⁵Ama untangana ma iyi nɛ ahi 'yagawa dimi, uuwa i ci aka na Ngaa zhajɛ.

²⁶Bụtụ na lasụ, na kaa untanganɛ ugondu ubwa uuwa i ci uce, ubwa Ngɛɛ zhɛ ma pana ụhwada maa ya tugwama te edenji.

²⁷Ubwa zhɛ na nda u'iywa wa aba no okwuto ụshɛmbɛrɛ; bɛɛ zhɛ ba bwarataga aŋ gana na aa bwarataga iyi nɛ oo mo na cɛnjɛ-ti'wɛŋnɛ, gana na du ti Ngee leshiji ụhwada ni i'ɛlɛ Bishi mi.

²⁸N zhɛ ma pana bụ ikpɛsu ɛtɛ ɛɛ hiɛŋ unagbajɛ.[16]

²⁹Bụtụ na 'yajɛ acɛbɛ, ga bu na hwuga iyi nɛ Mpiala mo mbiso tụ'ụlwatagwụ-tụ-ụhiɛŋshɛ-Agwangwama.