Read bassa N-NDUMWA TƐKAPƐSHƐNGA 4 Bible Online

N-NDUMWA TƐKAPƐSHƐNGA 4 - bassa bible

N-NDUMWA TƐKAPƐSHƐNGA 4

¹Na aba inɛ gɛ, Ngaa mbiyanɛ, Ngaa kwụbɛ to odubo oko kapɛshɛngwa na azuba. Rụhwụŋ ri hiiŋ ru na Ngaa hwụjɛ, rɛ shɛ gana rụhwụŋ ru ukakacɛ, raa dumanɛ iwɛ ne mi, rɛɛ hiɛŋ, Munje epe, N zhɛ mo bu mbisono iyi nɛ zhɛ ya nda tilɛɛ na aba inɛ gɛ.

²Gunu ata tu Ngaa namɛ na amɛ Mpiala, Ngaa kwụbɛ ti idwɛtwɛ ike shikeni na azuba. Bụtụ bu ko jɛjɛ ni idwɛtwɛ ɛtɛ!

³Abu kwụbɛ bụtụ ata jɛjɛ ni idwɛtwɛ ɛtɛ, bɛ shɛ gana utayɛ jaspa keeni Sadioni, buhwa na shɛ gana ɛmeraledi bacɛ boo rungwutwonu idwɛtwɛ ɛtɛ.

⁴N-ndwụtwụ woshi-na-muba-mi-neshi mu rungwutwonu idwɛtwɛ ɛtɛ. Ngaa kwụbɛ tu n-nyarɛ woshi-na-muba-mi-neshi mu gɛgajɛ nu n-ndwụtwụ ma ata; ee uregeni otogwo acɛnjɛ; aa patanganɛ adara azhɛnarɛya no ohiuhiu aba.

⁵Ɛbɛrɛ, keeni rụhwụŋ keeni oto a banɛ ni idwɛtwɛ ɛtɛ. Asụtụla ecenje a na 'yajɛ ulwa, o gorogo nu umbe idwɛtwɛ ɛtɛ, aba shɛ mpiala ma Agwatana mi cenje.

⁶Umbe idwɛtwɛ ɛtɛ ụ shɛ gana itekwu irɛtɛ, iyi-uumwa ineshi namba rungwutwonu idwɛtwɛ ɛtɛ; i 'yajɛ eshe, tu umbe, ta aba hwɛɛ.

⁷Iyi-uumwa ɛtɛ, inɛ ihiiŋ sụbɛ bizeci, inɛ iyebi sụbɛ yɛu buna, ụpɛshɛka inɛ itatụ sụbɛ ụpɛshɛka bụtụ, inɛ ineshi sụbɛ ugbeji na wa hila.

⁸Iyi-uumwa ɛtɛ ineshi, inɛ inɛ 'yajɛ apiambɛ ecihiŋ; a na rungwutwonu tu'waba ta aba, ta amɛ apiambɛ ata, a shɛ ge eshe hwɛ hwɛɛ aba. E genji shi n-ndumwa mu gana ga tụdụma, tu uwaŋna tu ụjita o, ɛɛ hiɛŋ, Tijilo, tijilo, tijilo, tɛ shɛ ma tu Agwangwama na shɛ Agwatana, na Hwuri Kpaaŋ, bụtụ na namba la, na ta shɛ buumwa taa hwayɛ, na kaa te ci!

⁹Aka elele na ti iyi-uumwa ɛtɛ peni bụtụ ata jɛjɛ ni idwɛtwɛ ɛtɛ, na kaa shɛ buumwa tutu unyizo-nom ụjɛrụma, na tumuna, keeni ugwoje.

¹⁰Nazhɛ n-nyarɛ ma ata woshi-na-muba-mi-neshi mu 'waŋ na cɛnjɛ nu umbe bụtụ ata jɛjɛ ni idwɛtwɛ ɛtɛ, ee kwuzenji, aa zhɛbɛ bụtụ ata shɛ buumwa tutu unyizo-nom, aa 'wɛŋ du adara aba nu umbe idwɛtwɛ ɛtɛ, ɛɛ hiɛŋ.

¹¹Agwangwama, na shɛ Agwatana tu, gabụ bu lanɛ maa e bi peni ụjɛrụma, na tumuna, keeni ukpahiŋ, iwɛnɛ ti yaa shɛ gabụ bu karɛ iyi elele kpaaŋ; nu ukwulana bu kaa yaa namɛ, iwɛbɛ po abu karɛ iŋ.