Read bassa N-NDUMWA TƐKAPƐSHƐNGA 6 Bible Online

N-NDUMWA TƐKAPƐSHƐNGA 6 - bassa bible

N-NDUMWA TƐKAPƐSHƐNGA 6

¹Ngaa kwụbɛ aka na ti Yɛu-ụgwụdụ ata kepishinji tuswana ti hiiŋ na ashashɛ tuswana ta ata ti cenje, Ngaa hwụjɛ ti iyi-uumwa ike na ashashɛ iyi-uumwa ɛtɛ ineshi, dumanɛ iwɛ, gana rụhwụŋ ru uto, yɛɛ hiɛŋ, Zhajɛ!

²Ngaa mbiyanɛ, Ngaa kwụbɛ budakwa bɛ cɛnjɛ. Bụtụ na ba suka bụ, 'waŋnɛ uta, ee peni bu udara. Bee beni maa lasụ, baa lasụ ga kaa.

³Aka na ti bee kepishinji tuswana ti yebi, Ngaa hwụjɛ ti iyi-uumwa iyebi hiɛŋ, Zhajɛ!

⁴Nazhɛ budakwa bi nya na shɛ bi shenje banɛ. Ee peni bụtụ ata ba suka bụ ụhwada maa bacɛnga amɛ-olom na cɛnjɛ tu unyizo, maa ga atwa mama kwụnanụ. Ibɛ po ee peni bu utokwobi uko ụ'wụtụ.

⁵Aka na ti bee kepishinji tuswana tu tatụ, Ngaa hwụjɛ ti iyi-uumwa itatụ hiɛŋ, Zhajɛ! Ngaa kwụbɛ budakwa bi shi. Bụtụ na ba suka bụ 'waŋnɛ umudu nu u'ala ubwa.

⁶Ngaa hwụjɛ rụhwụŋ ru ko na ashashɛ iyi-uumwa ɛtɛ ineshi, rɛɛ hiɛŋ, Umudu izɛgwu wit uko gba ụ shɛ urinya uko, omudu izɛgwu bali atatụ, a shɛ urinya uko. Ta nda manɛbɛ keeni meni mu tụ'walụ ma afwafwa ufwu o.

⁷Aka na ti bee kepishinji tuswana ti neshi, Ngaa hwụjɛ ta rụhwụŋ ri iyi-uumwa ineshi ri hiɛŋ, Zhajɛ!

⁸Ngaa mbiyanɛ, Ngaa kwụbɛ budakwa bu ubusubusu. Ɛ hiɛŋ izeci bụtụ na ba suka bụ, Tu'wo. Ibɛ e'uye 'wa bu ne ekwunyi kpimi. Ee peni aŋ ụhwada urubwo uneshi unyizo, ma a kwụnɛ uŋ tedure nu utokwobi, ni imunɛ-tiya, ne tishikpe keeni ni isundɛ-ehilo unyizo ga.

⁹Aka na ti bee kepishinji tuswana tu tana, Ngaa mbiyanɛ, tuta tu utukwu-ụrụpɛ, Ngaa kwụbɛ shihwulu sha atwa na aa kwụnɛ la iwɛ n-ndumwa ma Agwatana keeni iwɛ tiseyida tu na ee le.

¹⁰Aa uganɛ na rụhwụŋ rụ 'wụtụ, ɛɛ hiɛŋ, Oo Agwangwama Mokondo, gabụ bụtụ bi tijilo, na shɛ bụtụ bɛ tɛkana, uuwa i ci aka naa ɛbi zhɛ ba duma ụshɛrɛya, maa tụpanɛ tụlụkpashɛ te mehieŋ mu tu no ohiuhiu atwa na namɛ nu unyizoo?

¹¹Ibɛ ee peni bụtụ bụtụ na ashashɛ aba utogwo ụcɛnjɛ, ɛɛ hiɛŋ aŋ ga a na ta ụhinjanụ tugwo aka fwalaa, uuwa i ci aka na ufwugwo wa atwa na aa shɛ miaụŋ-mu-ugondu na aba keeni miaụŋ-mo-bino ma aba a na ɛɛ tɛ zhɛ a kwụna gana aba du ulwa.

¹²Aka na ti bee kepishinji tuswana ti cihiŋ, Ngaa mbiyanɛ, Ngaa kwụbɛ ta cɛnjɛ tɛ njɛ bụlama duwa, uwaŋna shɛ ya ushi gana ụzhɛka na aa njɛ ne tihiŋzhe, upiana shɛ gana mehieŋ hwɛ hwɛɛ,

¹³mkpasu ma 'waŋtatangwụ na cɛnjɛ, gana tụ'walụ tu uwowo tu na ta 'waŋtatangwụ na aka na tu uvwugo ụ'wụtụ zhingeci uŋ.

¹⁴Ibɛ ee kwungwuri azuba, gana utakada-u-tukwungwulo na ee kwungwuri. Nazhɛ nshama me elele keeni adakwụ Urefu mushongwu no orubwo aba.

¹⁵Nazhɛ shɛgwuma shi unyizo, ta atwa a'wụtụ, te ehiu asaza, ta azhɛgba, ta atwa na 'yajɛ ikɛnyi, ta ajama elele hwɛɛ, keeni atwa na mama'yajɛ, mama intanɛ na amɛ apangwụ keeni na atayɛ a'wụtụ nshama.

¹⁶Ɛɛ hiɛŋ nshama keeni atayɛ ata a'wụtụ, Hwuŋzwo ma hi tu ubi, maa hi ti intanɛ, iwɛ maa kede ta kwụba ụpɛshɛka ụ bụtụ ata jɛjɛ ni idwɛtwɛ ɛtɛ o, maa kede du isɛbwɛ Yɛu-ụgwụdụ ata iti jiteni o.

¹⁷Iwɛnɛ tụ ụjita ụ'wụtụ isɛbwɛ ya aba u ci ya, gaaba te eri bo shikonoo?