Read bassa 1 SAMUƐL UHIIŊ 10 Bible Online

1 SAMUƐL UHIIŊ 10 - bassa bible

1 SAMUƐL UHIIŊ 10

¹Nazhɛ ga Samuɛl shepi ikeke nɛ manɛbɛ mu zweni, bee dudugeni Soul manɛbɛ nu uhiuhiu, baa ruwanɛ bụ, bɛɛ hiɛŋ bụ, AGWANGWAMA ubu dudugeni manɛbɛ maa shɛ agwuma na zhɛ a untangana atwa ubwa Isrɛl.[24] Gabụ bi zhɛ ba untangana atwa AGWANGWAMA, maa lesheji aŋ ni i'ɛlɛ ya atwa i'ime ya aba a na rungwutwonu aŋ. Useyida na ɛbi zhɛ ba mapa maa AGWANGWAMA ubwa bi teri, bee bu dudugeni manɛbɛ maa shɛ uhiu wa atwa ubwa na:

²Aka na ebi beni hwayɛ no olugwo mi, bi zhɛ ba twa ne etwenyi oko eyebi to dongonu u'uye Rechɛl, ni Zɛlza na namɛ na cɛnjɛ ti Bɛnjamin. Ɛ zhɛ mo bu mbiso maa o towo nzhinyacɛ ma ata ebi ge beni urungo muba ugbe cebe, ohwulu herikeni shi ya bishi bu iwɛ muba o. Iwɛ bụ kiri ohwulu o horoko bu ya, bɛɛ hiɛŋ, Gana na bwaa Ngɛɛ zhɛ ma nda iwɛ yɛu mii?

³Ebi beni apata ebi keeni izhɛ fwalaa, bi zhɛ ba twa ne etwenyi oko atatụ nu ucilo ukpekpeshi ata namɛ nu Tabo, tɛ ɛ zhɛ Bɛtɛl maa a panɛ Agwatana ụrụpɛ. Bụtụ aba bu ko 'waŋnɛ oywoywo iyweywe atatụ, bụtụ bi yebi 'waŋnɛ tu'unto tu mbrad tụ tatụ, nazhɛ bụtụ bu tatụ 'waŋnɛ ututu meni mụ tụ'walụ ta afwafwa.

⁴Ɛ zhɛ ma bụ 'walụ, nazhɛ a bụ pana tu'unto tu mbrad ti yebi, bi zhɛ kaa ba lashɛga tụ ni i'ɛlɛ ya aba.

⁵Na aba inɛ ɛtɛ, bi zhɛ ba zha ni Ishɛmɛ ya Agwatana nɛ namɛ ni Gibia,[25] no ofwo ata ugba we ejeshi Afilistia namɛ. Aka na ɛbi zhɛ bo tono no odubo ụshɛpwụ ata, bi zhɛ ba twa ne edingbe egesere oko ta a banɛ ne bikpekwu bu ko, aa 'nyamɛ shɛduma, na aganga, oo hwulo akpasana keeni egweje, ta a duma tigesere.

⁶Gunu ata Mpiala ma AGWANGWAMA mi zhɛ mo bu ubo nu ukpahiŋ ụ'wụtụ, nazhɛ ɛbi zhɛ du bo kwuno tigesere tụdụma na aba, ba sha ya bụtụ na beni swooŋ.

⁷Aka na abụ kwụbɛ ti ijɛ ibi teneni hwɛɛ, iyi elele nɛ Agwatana ubu utegeni maa njɛ, nda iŋ ya.

⁸Mizha no mo hwulono maa no to Gilgal, Gamba ta me ci, maa ma ta ụrụpɛ tuhwoŋzhingo keeni ụrụpɛ wa amɛ-olom. Jitɛ icenje ɛbi zhɛ bu ma n shɛlana apata maa ma zhajɛ Mo bu mbisono iyi nɛ abɛ shɛ ba nda.

⁹Aka na tu go Soul genji Samuɛl, nazhɛ Agwatana peni Soul masha mu ufwo. Iyi elele nɛ ga Samuɛl ge mbishi bu, i sɛ jita ata hwɛɛ.

¹⁰Aka na te e ci Gibia, aa twa apata ne edingbe egesere oko. Gunu ata Mpiala ma Agwatana mu ubi bu nu ukpahiŋ ụ'wụtụ, nazhɛ bee kwuni du tigesere tụdụma na ashashɛ aba.

¹¹Aka na ta atwa na ge mepi bu cala kwụbɛ tu baa duma tigesere ne egesere vwɛ, atwa ata mama hiaŋnụ, Imbe bwa teneni yɛu Kishii? Go Soul suu shaananɛ ma bigesere?

¹²Ibɛ po bụtụ bu ko na ga namɛ apata cebe heŋteni aŋ, bɛɛ hiɛŋ, Gaaba kwuŋ shɛ bishi ba abaa? Ibɛ po n-ndumwa ma ata mɛ shɛ ya ushwa na aa duma, ɛɛ hiɛŋ, Go Soul suu namɛ ya du na ashashɛ egesere?

¹³Aka na tu go Soul hwuwi tigesere tụdụma, bee hwuri ne bikpekwu ata.

¹⁴Nazhɛ bishi Soul bu ko heŋteni bu, ti yɛu ibwɛ ugondu, bɛɛ hiɛŋ aŋ, Cee kwuŋ ehi ge zhee? Go Soul jishijɛ bụ, bɛɛ hiɛŋ, Ti ge zhe urungo nzhinyacɛ, ama gana na atụ kwụbɛ shɛ mụ, ibɛ po eti zhe ya no ofwo Samuɛl.

¹⁵Nazhɛ bishi ata Soul hiɛŋ Soul, Ma bụ tabwa, m mbishi iyi nɛ ga Samuɛl ihi mbishe?

¹⁶Go Soul jishijɛ bụ, bɛɛ hiɛŋ, Bi ti mbishe kpataa maa o towo nzhinyacɛ ma ata ugbe. Ama bi mbishi shi tuba bishi ata bwa iyi nɛ ga Samuɛl mbishe bu maa ubwa zhɛ ba sha agwuma o.

¹⁷Ga Samuɛl suyaganɛ atwa Isrɛl, aa ulwa no ofwo AGWANGWAMA ni Mizpa,

¹⁸bɛɛ hiɛŋ aŋ, AGWANGWAMA na shɛ Agwatana atwa Isrɛl hiɛŋ, N hi bɛcinjɛ na cɛnjɛ ti Ijipti, Ngɛɛ hi lɛshijɛ du kaa ni i'ɛlɛ ya atwa Ijipti keeni i'ɛlɛ ya atwa cɛnjɛ ti nya te elele tu na tu ma hi nda la umungwuta.

¹⁹Ama hiɛ lacɛ ya Agwatana hiŋ, na ihi bicinji nu ufwu hiŋ tɛnda keeni tiriri ti hiŋ hwuwayɛ go. Ɛhi hiɛŋ, Iti peni agwuma na zhɛ ma ti 'yagaga. Ụlwatagwụ ma na agba AGWANGWAMA, ta alamụ hiŋ keeni amwamwa hiŋ.

²⁰Nazhɛ ga Samuɛl suje alamụ atwa Isrɛl hwɛɛ maa a kaanɛ izhɛ. Aa 'wɛŋ icɛcɛ, ibɛ icɛcɛ 'imɛ ụlamụ Bɛnjamin.

²¹Ga Samuɛl kaanɛ amwamwa ụlamụ Bɛnjamin izhɛ amwamwa amwamwa, ibɛ icɛcɛ 'imɛ umwamwa Matri. Baa kaanɛ umwamwa Matri izhɛ atwa oko oko,[26] ibɛ icɛcɛ 'ime Soul yɛu Kish. Ama te e dwelekeci bu, e te shi bu ugbe o.

²²Ibɛ po ee heŋteni AGWANGWAMA, ɛɛ hiɛŋ, Bụtụ ata te ci ba suu? AGWANGWAMA jishijɛ aŋ, bɛɛ hiɛŋ, Go Soul ye kaa mama intanɛ ni i'wɛŋnɛ ɛtɛ ehi suteni.

²³Nazhɛ ee gezhiji, ɛɛ vwɛ Soul apata, aka na ti bee ci bee shikeni na ashashɛ atwa ata, aa kwụbɛ maa i'ilu ibwɛ zeci yee hwuri inɛ bụtụ be elele.

²⁴Ga Samuɛl hiɛŋ atwa ata hwɛɛ aba, Bụtụ ganana AGWANGWAMA teri! I zasa bụtụ be elele na shɛ gana bwa na ashashɛ atwa ga o. Nazhɛ atwa ata uganɛ hwɛɛ aba, ɛɛ hiɛŋ, Agwuma Tumaka! Ya urugbo te ilegeji.

²⁵Nazhɛ ga Samuɛl mbishi atwa ata undwa wa agwuma keeni ugondu na agwuma zhɛ na nda. Bee 'nyeci iŋ du nu utakada, bee shepi utakada ata, bee shiri uŋ na agba AGWANGWAMA. Nazhɛ bee genji atwa ata, bụtụ bụtụ ji ni ihwɛ ibwɛ.

²⁶Go Soul du ji ni ihwɛ ibwɛ ni Gibia. Ibɛ ejeshi[27] na 'yajɛ ikɛnyi, anaa na Agwatana ishicinjɛ shɛmɛ sha aba, she Soul.

²⁷Ama atwa oko tusashɛ, hiɛŋ, Gana naa bụtụ ga eri ma tu lashagaa? Ibɛ po aa ngbaracɛ bụ cwɛŋ, a 'waŋnanɛ shɛ bụ upwaŋ we elele maa e peni bu. Ama go Soul njɛ shɛ isɛbwɛ na aba o.