Read bassa 1 SAMUƐL UHIIŊ 12 Bible Online

1 SAMUƐL UHIIŊ 12 - bassa bible

1 SAMUƐL UHIIŊ 12

¹Ga Samuɛl mbishi atwa Isrɛl hwɛɛ, bɛɛ hiɛŋ, N shɛlajɛ n-ndumwa mi hiŋ ni iyi elele nɛ ɛhi n hiɛŋ, Ngee hi peni agwuma na zhɛ ma hi untangana.

²Agwuma hiŋ ta namɛ ya ne hiŋ, maa ma hi 'yagaga, inee mi shɛ N injɛ ya, Ngaa shɛ ya tuhwaŋla tu baba. Miaụŋ mi mi ta kaa mu namɛ ne hiŋ. N hi 'yagajɛ te kwune na tuwaŋnɛ ti mi uuwa i ci aka ga.

³Gamba na, m mbishi ma ne eshe AGWANGWAMA keeni eshe agwuma hiŋ na bee dudugeni manɛbɛ. Gaaba Ngee leshiji buna bu bwaa? Gaaba Ngee leshiji izhinyɛci ibwɛɛ? Gaaba Ngaa njɛ umungwuta ni imwere tiyaa? Gaaba Ngee leshiji ukwuribi ugworo ni i'ɛlɛ ibwɛ maa mo lubicingo eshe mi nu bwaa? Duma ma ne eshe mi maa ma tụpa bụtụ ata iyi elele nɛ bɛɛ hiɛŋ N le bu.

⁴Atwa ata jishijɛ bụ, ɛɛ hieŋ, I zasa bụtụ be elele abɛ yɛ imwere kwo kaa abɛ njɛ umungwuta o, i zasa kaa du bụtụ be elele ebi leshiji iyi elele ni i'ɛlɛ ibwɛ o.

⁵Ga Samuɛl hiɛŋ aŋ, AGWANGWAMA keeni agwuma hiŋ na bee dudugeni manɛbɛ, aba shɛ eseyida na ashashɛ mi ne hiŋ maa N zasa tụwụma te elele no ofwo hiŋ o. Atwa ata jishijɛ bụ, ɛɛ hiɛŋ, Iiŋ, AGWANGWAMA ubwa shɛ ga useyida tu.

⁶Ga Samuɛl hiɛŋ aŋ, AGWANGWAMA na teri la Moses keeni Aron, ubwa na bɛcinjɛ la ogwunukwoshi hiŋ na cɛnjɛ ti Ijipti, ubwa shɛ useyida tu.[29]

⁷Shikono ma epe zhirimi, maa Mo hi zwogono n-ndumwa ne eshe AGWANGWAMA ne titeyingeni tu na Ngɛɛ zhɛ me hi teyingeni iyi elele nɛ AGWANGWAMA ihi bicenji ni ibɛ keeni eshi hiŋ, tedure nu ugondu ubwa ụ'wụtụ.

⁸Aka na ete Jekob zhe la Ijipti, nazhɛ atwa Ijipti njɛ aŋ umungwuta,[30] ibɛ po ogwunukwoshi hiŋ keri AGWANGWAMA ụhiɛŋshɛ, nazhɛ baa tumwananɛ aŋ Moses keeni Aron, aba bɛcinjɛ aŋ, ee suje aŋ aa namɛ ya na cɛnjɛ tu ga

⁹Ama isɛbwɛ ya AGWANGWAMA na shɛ Agwatana aba 'wi aŋ, iwɛbɛ po bee leni maa ge Sisɛra na shɛ uberezhe Jabin agwuma[31] na jɛjɛ nu Hazo, keeni Afilistia, keeni agwuma Moab sukakanɛ aŋ nu ujasa maa e eri ogwunukwoshi hiŋ tụlasụ.

¹⁰Ee keri AGWANGWAMA ụhiɛŋshɛ, ɛɛ hiɛŋ, AGWANGWAMA, tụ bụ njɛ iwɛwɛ, iwɛnɛ eti bi jineci, ata zhɛba ntatanuwaŋ mu tuwa tu na ɛɛ hiɛŋ Beal, keeni tuwa tu na ɛɛ hiɛŋ Ashtarot. Sukwu, iti leshiji ni i'ɛlɛ ya atwa i'ime tu, gabụ ɛti zhɛ ta zhɛba ya!

¹¹Ibɛ po AGWANGWAMA tumwanɛ Jɛrubeal (ubwa shɛ ge Gidion), na Barak,[32] keeni Jɛfta, keeni Gamba ga Samuɛl. Eti hi lesheji ni i'ɛlɛ ya atwa i'ime hiŋ geri elele; ibɛ po ahiɛ namɛ ya epe suu.

¹²Ama aka na ahiɛ kwụbɛ ti ga Nahash na shɛ agwuma A'amon ba jala maa ma hi sukakana, ehi jineci AGWANGWAMA na ga shɛ agwuma hiŋ, ɛhi n hiɛŋ, Iti peni agwuma na zhɛ ma tu untangana.

¹³Agwuma na ehi meme teleji na, hiɛ lụpɛ iwɛ ubwa, ibɛ po AGWANGWAMA ihi peni bu maa ma hi untangana.

¹⁴Yaa shɛ ahia sụma AGWANGWAMA na shɛ Agwatana hiŋ inyɛsɛ ta agwuma hiŋ na ihi untanganɛ, maa hi na zhɛba bụ, maa hi na hwuga kaa unu ubwa, ehi te shi tigezhe nu unu ubwa tụpana, yaa shɛ ɛhi zhɛ hia 'wa bụ tutu, nazhɛ yɛɛ zhɛ ma hiɛ zhɛmana tebiye.

¹⁵Ama yaa shɛ ahiɛ zha shɛ hia hwuga-unu wa AGWANGWAMA, ɛhi zhɛ hi na ta tigezhe na andwa ubwa, asha AGWANGWAMA zhɛ ma hi sukakana ta agwuma hiŋ[33] hwɛɛ.

¹⁶Ibɛ po shikono ma zhirimi maa hiɛ kwụbɛ iyi i'wɛtwɛ nɛ AGWANGWAMA zhɛ a nda ne eshe hiŋ.

¹⁷Shɛ ubwaza na hŋ? N zhɛ ma tabwa AGWANGWAMA maa kala uto maa eshilo ngbi. Aka na ahiɛ kwụbɛ ti ijɛ ɛtɛ njɛ hwayɛ, nazhɛ ɛhi zhɛ hia mapa maa hiɛ njɛ AGWANGWAMA iwɛwɛ i'wɛtwɛ iwɛnɛ ahiɛ lụpɛ bụ maa ma hi pana agwuma.

¹⁸Ga Samuɛl keri ga AGWANGWAMA ụhiɛŋshɛ, nazhɛ AGWANGWAMA keri ga uto, eshilo ngbi gu nụ ụjita ata gbaa. Nazhɛ inyɛsɛ ya AGWANGWAMA keeni inyɛsɛ Samuɛl shɛ atwa ata hwɛɛ aba tebiye.

¹⁹Ibɛ po atwa ata hwɛɛ hiɛŋ Samuɛl, Iyɛri, sukwu utu lụpajɛ AGWANGWAMA na shɛ Agwatana bụ iwe tu na shɛ miaụŋ mụ bụ mu ugondu, iwɛ maa kede to 'wo. Iwɛnɛ po tụ kwụbɛ maa ti keeni iwɛwɛ tu ugombo iwɛ agwuma na atu mama lụpajɛ.

²⁰Ga Samuɛl jishijɛ aŋ, bɛɛ hiɛŋ, Ta nda ma inyɛsɛ o, Okwo ta ahiɛ njɛ ijɛ iwɛ hwɛɛ, ta ganga ma AGWANGWAMA tu'wa o, ama na zhɛba bụ ma na amɛ hiŋ oko kpaaŋ.

²¹Ganga ma tuwa ta ata tɛ shɛ iyi tɛgadaga tu'wa, iwɛnɛ tu taa zasa ule, ti eri shi to bicingo bụtụ o, iwɛnɛ tu taa shɛ iyi tusashɛ.

²²Iwɛnɛ po AGWANGWAMA zha shɛ o jinoko atwa ubwa iwɛ izeci ɛtɛ ibwɛ i'wɛtwɛ o. Bu nduwa ahaŋsa ubwa oko maa hiɛ shɛ atwa ubwa ikɛnyi ibwɛ.

²³Inee mi shɛ, kede i n timeni kwukwuŋ maa ma nda AGWANGWAMA iwɛwɛ iwɛ adua njɛshɛ iwe hiŋ o. Ama N zhɛ mu no hi sokokono uhwaŋna ubiye keeni unaa na teni cɛŋ maa hi na 'wa.

²⁴Na hwuga ma unu wa AGWANGWAMA, maa hi na zhɛba bụ na shɛmɛ shi hiŋ kpaaŋ. Ne teyinje ma iyi i'wɛtwɛ nɛ baa hiɛ ndanɛ.

²⁵Ama yaa shɛ ahia ta tuhwulo ni iyi tugworozwo tɛnda, asha ɛ zhɛ me hi iricingo hwɛɛ ta agwuma hiŋ.