Read bassa 1 SAMUƐL UHIIŊ 13 Bible Online

1 SAMUƐL UHIIŊ 13 - bassa bible

1 SAMUƐL UHIIŊ 13

¹Go Soul namɛ shiywa buhanda te e meci bu, nazhɛ bee kwuni tugwama tiya. Baa yɛ tugwama ti Isrɛl shiywa shi yebi.

²Go Soul meme teleji etwenyi ugbaa-na-akpakwụ-a-ta (3,000), ugbaa-uko (2,000) namɛ nu bwa ni Mikmash na namɛ na cɛnjɛ ti Bɛtɛl. Baa tumwanɛ akpakwụ-a-ta no ofwo yɛu ibwɛ go Jonatan ni Gibia na namɛ na cɛnjɛ tu ụlamụ Bɛnjamin. Bee jicinji atwa vwɛ, bụtụ bụtụ ji ni ihwɛ ibwɛ.

³Go Jonatan kwụnɛ Afilistia ofwugwo ni Gibia, Afilistia hwụjɛ iwɛ ɛtɛ. Go Soul 'nyemeni utiitidi[34] maa ga suyanɛ atwa elele na namɛ na cɛnjɛ ta ata, bɛɛ hiɛŋ, Ge Ehibru hwụjɛ maa a zhajɛ no ofwo ujasa.

⁴Ibɛ po atwa Isrɛl hwɛɛ hwụjɛ maa bwonu go Soul lasụ ufwugwo we ejeshi Afilistia nu ujasa, maa iwɛ ɛtɛ kaa du gwumanɛ Afilistia duwa. Ibɛ po atwa Isrɛl leni ụhiɛŋshɛ ata, aa zhajɛ ee keeni Soul ni Gilgal.

⁵Afilistia sotulonu maa a njɛ ujasa na atwa Isrɛl. Ihɛŋtu ya aba ujasa namɛ igbɛɛ-umpwa-ni-bɛ-tɛ (30,000),[35] asụcɛ idɛkwɛ ya aba namɛ igbɛɛ-itɛtu (6,000), ufwugwo wa asaza aba ụ shɛ gana ahwayɛ Urefu. Ee zhe Mikmash na namɛ geri bu uwaŋna-banụ bu Bɛt-avɛn, ee jwe ugba wa aba apata.

⁶Aka na ta tusukakana ta ata tu hwuri atwa Isrɛl ikɛnyi, aa kwụbɛ maa eshe vweni aŋ, ibɛ po atwa oko mama intanɛ na a'ibwa, atwa oko mama intanɛ na apangwụ, atwa oko mama intanɛ no tuhwolu ta atayɛ, keeni a'ibwa meni,

⁷kwo kaa atwa oko keshi Urefu Jodan[36] no ofwo na wee iri shi, ee zhe na cɛnjɛ tu Gad keeni Giliad. Go Soul tuba ta namɛ ni Gilgal, ibɛ atwa vwɛ 'wa bụ hwɛɛ, aa zhɛgɛdaga, iwɛnɛ ti inyɛsɛ shɛ aŋ.

⁸Go Soul 'yacɛ Samuɛl ijitɛ icenje gana na tu ga Samuɛl sekekeni bu la. Ama ga Samuɛl kaa te ci shi waa o, ibɛ po atwa ata kwuni tụgaratagwụ maa e genji Soul.

⁹Go Soul hiɛŋ atwa ata, N sugeni ma iyi ụrụpɛ tuhwoŋzhingo keeni iyi ụrụpɛ wa amɛ-olom, ee sugeni bu ga. Boo to ụrụpɛ ata tuhwoŋzhingo.

¹⁰Gunu na tu go Soul kwunanjɛ ụrụpɛ ata tuhwaŋzhingo tuta, ga Samuɛl pushe. Go Soul ishijɛ bee teji bu uhwaŋna, boo to bu amuraba.

¹¹Ga Samuɛl hiɛŋ Soul, Imbe nɛ kwuŋ abɛ njɛɛ? Go Soul jishijɛ bụ, bɛɛ hiɛŋ, Atwamwa ta a garatagwụ maa e n genji, gabụ kaa bi ci shi no ogwungwu na ebi ge shiri maa bi zhɛ bo to, Afilistia ta kaa ụlwatagwụ ni Mikmash.

¹²Ibɛ po Ngee heŋshi maa Afilistia e ci maa a n sukakanɛ nu ujasa epe ni Gilgal ga. N ta tabwa sụ kaa AGWANGWAMA maa Ma mapa uwebiye ubwa o, ibɛ po Ngaa mama njɛ iji Ngoo to ụrụpɛ ga tuhwoŋzhingo.

¹³Ga Samuɛl jishijɛ bụ, bɛɛ hiɛŋ, Bɛ njɛ iyi ụlagwụ, bụ hwụjɛ shɛ unu na AGWANGWAMA na shɛ Agwatana bụ ubi peni o. Yaa shɛ abụ ga hwụjɛ-unu ubwa, bi gɛ zhɛ mo bu shikicingono cɛnjɛ-ta-tugwama tụ bụ ti Isrɛl, ta ajalalo bu unyizo-nom.

¹⁴Ama hwuwayɛ go bi zha shɛ ba ta ya tuhwulo na tugwama tụ bụ tiya o. Iwɛnɛ po AGWANGWAMA dwolwokwokwo bụtụ na ce amɛ ubwa maa ya tugwama ta atwa ubwa, iwɛnɛ ta abụ hwụjɛ shɛ unu ubwa ni iyi nɛ be bi peni-unu ibɛ.

¹⁵Tu ga Samuɛl beni ni Gilgal, bee hwuri Gibia na namɛ na cɛnjɛ ti Bɛnjamin. Go Soul rɛcɛ ejeshi na ta namɛ nu bwa, aa shɛ gana atwa akpakwụ-atatụ (600).

¹⁶Go Soul ni yɛu ibwɛ go Jonatan keeni atwa na namɛ na aba jwe ugba wa aba ni Gibia na namɛ na cɛnjɛ ti Bɛnjamin, Afilistia tuba jwe ugba wa aba ni Mikmash.

¹⁷Ejeshi Afilistia a na o tono ofwo eshigiri maa e bwereteji shimwono beni nu ugba wa aba, oo momo dwotwogonu edingbe atatụ. Udingbe uko hwuri geri bu Ofra na namɛ na cɛnjɛ tu Shual,

¹⁸udingbe uyebi hwuri geri bu Bɛt-horon, undingbe wa aba unya hwuri geri bu Ulomu Zɛboim na namɛ geri bu ụshɛka.

¹⁹Bụlụma be elele zasaba ya na cɛnjɛ ti Isrɛl kwukwuŋ na aka ata, iwɛnɛ ta Afilistia mama 'imɛ maa kede Ehibru njɛ otokwobi kwo kaa nsanu o.

²⁰Ama atwa Isrɛl elele a zhagana Afilistia maa a na ulaga aŋ n-ngowo ma aba, ta afwuya aba, to shigwubo sha aba unu-tupa, te eluwuzhe aba.

²¹Ulumo na aa ulagana aŋ n-ngowo keeni afwuya ụ shɛ gana urinya uko, ulumo na aa paga aŋ ogwubo unu keeni iyi nɛ aa sapaga buna no okpongwu[37] ụ shɛ gana arinya eyebi.

²²Iwɛbɛ po bụtụ eri shi ba kwụbɛtana ya asaza Isrɛl a na 'wa Soul keeni yɛu ibwɛ go Jonatan utokwobi kwo kaa isɛnu na aka na tu ujasa layɛ, semi go Soul ni yɛu ibwɛ go Jonatan aba kiri 'yajɛ.

²³Ejeshi Afilistia beni apata ee duri uhwaŋna Mikmash.