Read bassa 1 SAMUƐL UHIIŊ 17 Bible Online

1 SAMUƐL UHIIŊ 17 - bassa bible

1 SAMUƐL UHIIŊ 17

¹Na aka ata ibɛ Afilistia sotulonu ejeshi aba nu Soko na namɛ na cɛnjɛ tu Juda iwɛ ujasa. Ee jwe ugba wa aba ni Ɛfɛs-damim na namɛ na ashashɛ Soko na Azika.

²Go Soul na atwa Isrɛl tuba sotulonu, ee jwe ugba wa aba nu Ulomu Ila. Ee keleni Afilistia bụkpagwụ bu ujasa.

³Afilistia shikekeni ni ishɛmɛ ye, atwa Isrɛl tuba shikekeni ni ishɛmɛ nɛ, ulomu tuba shiyeni na ashashɛ aba.

⁴Ibɛ bụtụ bu ko bu ukpahiŋ ụ'wụtụ banɛ nu ugba wa Afilistia, ɛ hiɛŋ izeci ibwɛ go Goliat bụtụ bu Gat. Ụnjɛswa ubwa ụ shɛ gana imbele i'ɛlɛ icihiŋ na ashashɛ.

⁵Baa patanɛ ukata utumburɛ, bee hwuŋteni idikɛ utumburɛ. Uzhinono idikɛ ɛtɛ ibwɛ ụ shɛ ɛshɛkɛl igbɛɛ-iyebi-na-akpakwụ-a-ta (5,000).

⁶Abida ubwa shɛ utumburɛ, ee munje tutu ogbongboro ubwa. Isɛnu ibwɛ i shɛ utumburɛ, no shitutu shɛ bwa baa patana iŋ.

⁷Utata isɛnu ibwɛ i ci ụ'wụ'wụ na oo zwono tugwuno unyomo. Isɛnu ɛtɛ ibwɛ shɛ ụshɛmbɛrɛ na uzhinono ibɛ ụ shɛ ɛshɛkɛl akpakwụ-atatụ (600). Busaza na ba 'waŋnana bụ avwula ubwa ujasa bo hwulono bu umbe.

⁸Go Goliat shikeni baa uganana tụkpagwụ ta atwa Isrɛl, bɛɛ hiɛŋ, Iwembe po kwuŋ ahiɛ banɛ maa hi keri bụkpagwụ bu ujasaa? Shɛ Bufilistia suu Ngaa shɛ? Shɛ miaụŋ-mu-ugondu Soul suu ahiɛ shɛ? Vwɛ ma bụtụ hiŋ bu ko maa zwe pi mi maa ma nda ujasa nu bwa.

⁹Yaa shɛ bee eri hwayɛ baa n kwụnɛ, asha ti zhɛ ta sha ajama hiŋ. Ama yaa shɛ kaa Gamba n eri bu hwayɛ tụkwụna, asha ahiɛba hi zhɛ hia sha ajama tu a na zhɛ na tu ndana iyi.

¹⁰Bɛɛ hiɛŋ, Ahiɛba ejeshi atwa Isrɛl, Omo zwogono n-ndumwa hwayɛ ga. N vwɛjɛ ma bụtụ hiŋ bu ko maa Ma nda ujasa nu bwa.

¹¹Aka elele na tu go Soul na atwa Isrɛl hwụjɛ n-ndumwa ma ata, asha ohwulu herikeni aŋ hwɛɛ, inyɛsɛ ya sha aŋ.

¹²Gɛ Jɛsi na shɛ bụtụ bu Ɛfrat na jɛjɛ ni Bɛtlɛhɛm na namɛ na cɛnjɛ tu Juda, ubwa kaa meci Devid. Gɛ Jɛsi kaa meci miaụŋ-me-eyi mu tụndatụ. Bɛ injɛ ya tebiye na aka na tu go Soul yɛ tugwama.

¹³Miaụŋ mi Jɛsi mu tatụ mu na mɛ shɛ n-nyarɛ na atwa vwɛ, mi zhe ujasa no Soul. Ɛ hiɛŋ izeci bụtụ na shɛ iyɛri ya aba, gɛ Ɛliab, ɛɛ hiɛŋ izeci bụtụ na 'wa bụ, ga Abinadab, ɛɛ hiɛn izeci bụtụ bu tatụ ga Shama.

¹⁴Ge Devid ubwa shɛ bihiakana ba aba na aka na ta atagwụ ata ubwa atatụ 'wa Soul.

¹⁵Ge Devid ba bana no olugwo Soul ba zha Bɛtlɛhɛm baa panɛ agwụdụ bishi bwa iyimɛyɛ.

¹⁶Gana go Goliat bo mbisogo ejeshi atwa Isrɛl n-ndumwa tu uvwungwa tụ ụrụmɛ ta, tutu ijitɛ buhanda.

¹⁷Gɛ Jɛsi hiɛŋ yɛu ibwɛ ge Devid, Shapa ipurɛ gɛ shini okolo oko keeni akara ga umpwa maa zhe kakayɛ maa panɛ atagwụ bụ a na namɛ nu ugba ujasa.

¹⁸Sugo du iyimɛyɛ gɛ namɛ umpwa ee untengenji no mosubo mi inɛ maa peni uberezhe ata untanganɛ ejeshi akpakwụ-a-ta (1,000) Kwubɛ du okwo atagwụ bụ namba lapiya, maa n 'waŋnɛ du useyida na zhɛ mo m mbisono maa a namba ga lapiya.

¹⁹Na aka ata kaa ibɛ go Soul na atagwụ Devid keeni atwa Isrɛl hwɛɛ zweni nu Ulomu Ila aa nda ujasa na Afilistia.

²⁰Ge Devid gbatụ ti'ishijɛ nu uvwungwa dididi ti iyi heri, bee utegeni bi'iywa bu ko agwụdụ, bee suji iyimɛyɛ ɛtɛ baa sanɛ gana na te bishi bwa ge peni bu unu. Bee ci ugba wa atwa Isrɛl, gunu ga te e beni maa e keri bụkpagwụ bu ujasa, aa kala ukwuruwa ujasa.

²¹Ibɛ atwa Isrɛl shamanɛ geri aba, Afilistia shamanɛ geri aba, ibɛ ejeshi ata mama ngbarakanụ.

²²Ge Devid tileneni bi'iywa bi i'wɛŋnɛ ya aba iyimɛyɛ ɛtɛ baa ga 'waŋnɛ. Bee hwuri bee teni na bụkpagwụ ata bu ujasa no ofwo atagwụ ubwa. Ba 'walụ atagwụ ubwa, bee heŋteni aŋ gana na tu ujasa shɛ.

²³Ti ge Devid ta dumanga n-ndumwa na atagwụ ubwa, tu go Goliat banɛ na bụkpagwụ be ejeshi Afilistia bee ci, boo mbisogo atwa Isrɛl n-ndumwa gana na tu baa shana ba nda. Ge Devid hwụjɛ tu baa njɛ mụ.

²⁴Aka elele na ta atwa Isrɛl kwụbɛ Goliat, inyɛsɛ ya sha aŋ, o no gozhogo hwɛɛ aba.

²⁵[48] Ibɛ atwa Isrɛl mama hiaŋnụ, Hiɛ kwụbɛ shɛ ta bụtụ ga be ci hŋ? Be ci maa mbisogo atwa Isrɛl n-ndumwa gom.

²⁶Ge Devid heŋteni atwa na dongonu bu, bɛɛ hiɛŋ, Imbe kwuŋ ɛɛ zhɛ a ndana bụtụ be elele na kwụnɛ Bufilistia ga be teleyi tu umudu maa pashɛnga atwa Isrɛl tutwa tu gaa? Ɛɛ jishijɛ bụ, ɛɛ hiɛŋ,[49] Bụtụ be elele na kaa kwụnɛ bụ, agwuma zhɛ a nda bụ bɛzhɛgba bụ 'wụtụ, bɛɛ zhɛ ba pana bụ du yɛu ibwɛ maa zana. Bɛɛ zhɛ ba bacɛnga du umwamwa bishi bwa nụ ụdalụ tụtụpa ni Isrɛl. Gaaba kwuŋ Bufilistia ga shɛ maa bu na twagaga ejeshi Agwatana uumwaa?

²⁷Nazhɛ atwa ata jishijɛ bụ, ee mbishi bu n-ndumwa me ebe mu ko mu ko, ɛɛ hiɛŋ, Bụtụ be elele na kwụnɛ bụ, kazabana kazabana agwuma zhɛ a nda bụ.

²⁸Ti gɛ Ɛliab na shɛ batagwụ ba aba hwɛɛ hwụjɛ ti ge Devid bo hwoyigono iwɛ na atwa ata, bee kwuni isɛbwɛ tɛnda ne Devid. Bɛɛ hiɛŋ bụ, Imbe ubu shapɛ epee? Gaaba bwaa abụ ganganɛ agwụdụ ata ticwɛŋ nụ ụshɛka ataa? M mepi tugworozwo tụ bụ keeni iyi nɛ namɛ na amɛ bụ; iwɛ maa kwụbɛ ujasa ga kiri ebu zwe epe.

²⁹Ge Devid jishijɛ aŋ, bɛɛ hiɛŋ, Imbe kwuŋ Ngaa nduwa yaa? Shi iheŋtene maa kwakwa Ngee heŋteni?

³⁰Bee beni no olugwo bụtụ ata, bee zhegeni binya bụtụ, bee heŋteni bu iheŋtene ebe ike ike. Ibɛ atwa ata jishijɛ bụ du ajɛshɛgwa ebe oko oko.

³¹Aka na ta atwa ata hwụjɛ n-ndumwa mu na ge Devid jɛmɛ, ee zhe ee swegeni mu Soul, go Soul hiɛŋ ga suyananɛ bụ Devid.

³²Ge Devid hiɛŋ Soul, Agwuma Tumaka! Kede ohwulu herikeni bụtụ be elele o. Gamba ga yɛu gɛ bu ugondu, N zhɛ ma zha ma nda ujasa na Bufilistia ga.

³³Go Soul hiɛŋ Devid, Bi eri shi ba nda ujasa nu bwa o, bu ta shɛ yɛu tidice, inɛ ibwɛ shɛ bijeshi baa shɛ taa nɛ tiyɛu tu bwa.

³⁴Ge Devid hiɛn Soul, Agwuma Tumaka! Gamba ga yɛu bu ugondu, Ma shana Ama ngbaraka agwụdụ bishi mi. Aka na te bizeci keeni ucwee zhajɛ ee shepi yɛu-ụgwụdụ,

³⁵Ngaa 'wa bụ, Ngoo po bu iyi, Ngee leshiji yɛu-ụgwụdụ ata nu unu ubwa. Aka na bɛɛ ishijɛ maa ma n sukakana, Ngaa 'imɛ apa ubwa Ngoo po bu na cɛnjɛ Ngaa kwụnɛ bụ.

³⁶Gamba ga yɛu bu ugondu, N kwunua te bizeci, tu ucwee; Bufilistia ga jeji shi teleyi zhɛ ba sha gana bu ko na amɛ aba hwayɛ ga, iwɛnɛ tu baa twagaga ejeshi Agwatana uumwa.

³⁷Ge Devid hiɛŋ, Agwatana ata n lesheji la ne bizeci keeni ucwee, bi zhɛ du ma n lashɛga ni i'ɛlɛ Bufilistia ga. Go Soul hiɛn Devid, Zhaga, ga AGWANGWAMA nama na bụ!

³⁸Nazhɛ go Soul hwuŋteni Devid i'wɛŋnɛ ibwɛ ujasa, bee peteni bu ukata ata utumburɛ nu uhiuhiu, bee hwuŋteni bu idikɛ ɛtɛ ya ashɛmbɛrɛ.

³⁹Ge Devid rɛ utokwobi ebe Soul na azuba i'wɛŋnɛ ibwɛ ujasa, bee mekeni maa zha tahaŋnụ, bi eri shi ba zha o, iwɛnɛ tu boo to nyiwonowuŋ su ni ibɛ. Nazhɛ ge Devid hiɛŋ Soul, N eri shi ma zha ni i'wɛŋnɛ gɛ o, iwɛnɛ tu Ngoo to nyiwonowuŋ su ni ibɛ, ge Devid hwuceci iŋ bee tileni.

⁴⁰Ge Devid shepi bukwuto bu bwa bu u'iywa, bee zhe ni isese ike bee tenji atayɛ oko tigbelegbele a ta, bee zweni aŋ nu ulapa ubwa u'iywa; baa 'waŋnɛ ikwele ibwɛ, baa sala Bufilistia ata.

⁴¹Bufilistia ata ba kaanɛ izhɛ no ofwo Devid, bu'waŋnɛ ba avwula ubwa ujasa hwuleni bu umbe, baa kaana go tugwumwonu.

⁴²Aka na tu baa mbiyanɛ, baa kwụbɛ Devid, baa kwụnanɛ bụ rishe, iwɛnɛ ti ge Devid ta shɛ yɛu tidice nɛ kaa zhɛmɛ kwakwa igbɛtɛtɛ.

⁴³Bufilistia ata hiɛŋ Devid, Uwɛwɛ suu Ngaa shɛ, abụ n 'waŋnanɛ bukwuto? Bee keleni Devid unu ni izeci tuwa tu bwa.

⁴⁴Bɛɛ hiɛŋ Devid, Zhajɛ pi mi, maa ma pana shanụnụ keeni isundɛ ehilo ru'wo rụ bụ.

⁴⁵Ge Devid hiɛŋ Bufilistia ata, Bi me n teni nu utokwobi, ni isɛnu keeni ɛcibwɛ, ama Gamba ta tuba me bi teni ni izeci ya AGWANGWAMA na Hwuri Kpaaŋ, ubwa shɛ Agwatana ejeshi Isrɛl, bu gata aba twagaga.

⁴⁶AGWANGWAMA zhɛ mo bu shiyono ni i'ɛlɛ mi hwayɛ ga, N zhɛ ma bụ kwụna kaa hwayɛ ga maa Ma jaja uhiuhiu bu. N zhɛ kaa ma pana shanụnụ keeni isundɛ ehilo n'wo ma Afilistia hwayɛ ga maa a yɛ, iwɛ maa atwa cɛnjɛ tu unyizo kpaaŋ mepi maa Agwatana namba ga ni Isrɛl,

⁴⁷Ga atwa ga sotulonu epe hwɛɛ mepi maa, Shɛ nu utokwobi kwo kaa ni isɛnu AGWANGWAMA o bicingo atwa ubwa o. Iwɛnɛ po ujasa ga ụ shɛ una wa AGWANGWAMA, bi zhɛ kaa mo hi zwono ni i'ɛlɛ tu hwɛɛ hiŋ.

⁴⁸Aka na ta Bufilistia ata ishijɛ, bɛɛ sɛrɛ Devid, ge Devid gezhiji kakayɛ baa sala bụkpagwụ be ejeshi Afilistia maa nda ujasa nu bwa.

⁴⁹Ge Devid keri u'ala nu ulapa ubwa, bɛɛ bwɛ utayɛ uko bee shiyeni uŋ ni ikwele ibwɛ, be vwurenji boo to Bufilistia ata ni itune. Utayɛ ata teni ni itune ibwɛ, go Goliat leyi bee ubi eshe na cɛnjɛ.

⁵⁰Gana ge Devid lasụ Bufilistia ata nu utayɛ ikwele ta, tu boo to bu uŋ, baa kwụnɛ bụ. Ge Devid kaa 'waŋnɛ shɛ utokwobi o.

⁵¹Ge Devid gezhiji bee shikiteni Bufilistia ata, bee shepi utokwobi ebe ubwa, bee hwucice uŋ nu ufwutwa, bee jeji uhiuhiu ubwa nu bwa, baa kwụnɛ bụ. Aka na ta Afilistia vwɛ kwụbɛ maa bụtụ ba aba bu ukpahiŋ 'wi, ee gezheji.

⁵²Ibɛ po atwa Isrɛl na atwa Juda ishijɛ, ee keri n'ungwa, ee gezhiji ee urigeni Afilistia tutu Gat[50] keeni tutono to odubo Ɛkron. Afilistia na aa gwucanjɛ 'waŋtatangwụ nu uhwaŋna ata, te kwuni ni Sharaim tutu Gat keeni Ɛkron.

⁵³Aka na ta atwa Isrɛl gwure ee genji Afilistia tu'urugono, ee zhe ee suji i'wɛŋnɛ nɛ ge tileni nu ugba wa Afilistia.

⁵⁴Ge Devid shepi uhiuhiu Bufilistia ata bee zhe Jɛrusalɛm. Ama bu zweni tuba i'wɛŋnɛ ujasa Bufilistia ata nu umwono ubwa.

⁵⁵Aka na tu go Soul kwụbɛ ti ge Devid zhɛ maa sukakana Bufilistia ata, bee heŋteni uberezhe we ejeshi ubwa, bɛɛ hiɛŋ, Abnɛ, Yɛu aba na kwuuŋ? Ga Abnɛ jishijɛ bụ, bɛɛ hiɛŋ, Agwuma Tumaka! M mepi shi du o.

⁵⁶Agwuma hiɛŋ bụ, Zhaga hwoyigono yɛu bụtụ na usemberi ga shɛ.

⁵⁷Aka na ti ge Devid gwure nu ugba wa aba, na aba na ti bɛɛ kwunɛ Bufilistia ata, ga Abnɛ zɛrijɛ Devid no ofwo Soul, ge Devid ta kaa ta 'waŋnɛ uhiuhiu we ebe Bufilistia.

⁵⁸Go Soul heŋteni Devid, bɛɛ hiɛŋ, E-semberi ga, yɛu aba kwuuŋ abɛ shɛɛ? Ge Devid jishijɛ bụ, bɛɛ hiɛŋ, N shɛ yɛu bujama ata bụ gɛ Jɛsi ata namɛ ni Bɛtlɛhɛm.