Read bassa 1 SAMUƐL UHIIŊ 19 Bible Online

1 SAMUƐL UHIIŊ 19 - bassa bible

1 SAMUƐL UHIIŊ 19

¹Go Soul mbishi yɛu ibwɛ go Jonatan keeni anjɛ-ugondu ubwa hwɛɛ, maa ga kwụnɛ Devid. Ama go Jonatan kaa bo lubo Devid tebiye.

²Iwɛbɛ po go Jonatan mbishi Devid, bɛɛ hiɛŋ bụ, Go Soul bishi mi ma bụ jala tụkwụna. Iwɛ ecilo ata na nda pece, beyi ga nu uvwungwa zhaga swaka no ofwo na atwa zha shɛ ma bu kwụba.

³N zhɛ tuba ma bana mo shikono ne bishi mi ne ehilo ata abụ swacɛ, N zhɛ ma dumanga iwɛ bụ ne bishi mi. Iyi elele nɛ Ngee mepi, N zhɛ ma nda maa mepi iŋ du.

⁴Go Jonatan dumanga Devid ne eshe bishi bwa, bɛɛ hiɛŋ bụ, Ada, ta nda yɛu gɛ bu ugondu ge Devid iwɛwɛ o, iwɛnɛ tu ba bụ njɛ shɛ du iwɛwɛ, sasana ugondu we elele na baa bu ndana kaa mo bu mbiyono tebiye.

⁵Ubwa shiyeni uhiuhiu ubwa no tu'wo tụ 'wụtụ, baa kwụnɛ Bufilistia ata. AGWANGWAMA kaa lasagwụ atwa Isrɛl tụlasụ tụ 'wụtụ. Amɛ bụ kaa lemi la hwɛɛ na aka na abụ kwụbɛ iŋ. Iwɛmbe po tuba aba jala ya maa njɛ Devid na zasa tụwụma iwɛwɛ harɛ maa kwụnɛ bụ uzawa eciloo?

⁶Go Soul leni n-ndumwa mu na go Jonatan mbishi bu, harɛ bee shiri-unu, bɛɛ hiɛŋ, N to AGWANGWAMA, N zha shɛ ma kwụna ya Devid kwukwuŋ.

⁷Go Jonatan suyanɛ Devid, bee mbishi bu n-ndumwa mu ga hwɛɛ. Go Jonatan zɛrijɛ sasana Devid no ofwo Soul baa namɛ pu bwa gana na tu baa namɛ la cala.

⁸Aka na ujasa unya layananɛ, ge Devid zhe bee jeshi Afilistia, baa kwụnɛ aŋ tebiye, ibɛ po ee gezhigeni bu.

⁹Jitoo ko mpiala ma ata mụ wɛ mu zhaganɛ Soul sasana, tu baa jɛjɛ nu umwono ubwa. Baa 'waŋnɛ kaa isɛnu ibwɛ, ge Devid ba 'nyamangana bụ aduma.

¹⁰Go Soul heŋshi, bɛɛ hiɛŋ bi zhɛ ba ta Devid isɛnu ɛtɛ maa i 'imɛ ụdatụ ata, ama ge Devid benengeni, ibɛ po isɛnu hwuri yoo to ụdatụ. Ge Devid gezhiji bee genji bu.

¹¹Gụnụ ụrụmɛ ata go Soul tumwanɛ atwa maa e zhe a shɛka Devid maa a kwụnɛ bụ ti iyi heri nu uvwungwa. Ama biyikwo Devid ga Maikal mbishi bu, bɛɛ hiɛŋ, Yaa shɛ ebi gezhiji shi, ɛ zhɛ ma bụ kwụna beyi ga nu uvwungwa.

¹²Ibɛ po ga Maikal becinji Devid na agbahwụ umwono ata, ge Devid benengeni bee hwuri.

¹³Ga Maikal shepi itɛtɛnuwɛŋ ike nɛ ga namɛ nu umwono ata bee wecicinji iŋ no ogodo. Bee peteni iŋ uhiuhiu nu utudu na aa njɛ ne tihiŋzhe ti iyweywe, bee urigeni iŋ du tugwuno.

¹⁴Aka na tu go Soul tumwanɛ atumwa maa ga shapɛ Devid, ga Miakal hiɛŋ aŋ, Ba gwuma.

¹⁵Go Soul tumwananɛ aŋ maa e gwuri ɛ kwubɛ Devid, bɛɛ hiɛŋ aŋ, N shapɛrɛganɛ bu ma epe hwɛɛ to ogodo ata ubwa, maa ma kwụna bụ.

¹⁶Aka na atumwa ata teni nu umwono ata, aa kwụbɛ ti itɛtɛnuwɛŋ ɛtɛ weci no ogodo, yee peteni uhiuhiu ibɛ nu utudu na aa njɛ ne tihiŋzhe ti iyweywe.

¹⁷Go Soul hiɛŋ Maikal, Iwembe po ebi n helekeci, ebi leni maa bụtụ bi i'ime mi m benengenii? Ga Maikal jishijɛ Soul, bɛɛ hiɛŋ, Ubwa n hiɛŋ ga ma ganga bụ maa u hwulo shibwonu bi zhɛ ma n kwụna.

¹⁸Ti ge Devid benengeni Soul, bee gezhiji bee zhegeni Samuɛl nu Rama, bee swegeni bu iyi elele nɛ go Soul ba nda bụ. Ga Samuɛl ne Devid zhe aa namɛ nu Naiot.

¹⁹Ee mbishi Soul ɛɛ hiɛŋ, Ge Devid namba nu Naiot ata namɛ na cɛnjɛ tu Rama.

²⁰Go Soul tumwanɛ atumwa maa ga shapɛ Devid. Aka na ta atumwa ata kwụbɛ[52] ufwugwo we egesere a na a duma tigesere, tu ga Samuɛl kaa shikeni baa shɛ uhiu wa aba. Ibɛ Mpiala ma Agwatana mi 'yagajɛ atumwa ebe Soul, ee kwuni du tigesere tụdụmanga.

²¹Aka na te e mbishi Soul, baa tumwanɛ atumwa anya, a na ata kwuneneni tigesere tụdụma. Go Soul tumwananɛ atumwa anya a na ụtatụ, a na ata dumananɛ tigesere.

²²Nazhɛ bee zhe ya Rama ni ikɛnyi ibwɛ, bee ci u'ibwa uko meni ụ'wụtụ na namɛ ni Siku, bee heŋteni apata, bɛɛ hiɛŋ, Cee kwuŋ ga Samuɛl keeni Devid namɛɛ? Bụtụ bu ko mbishi bu, bɛɛ hiɛŋ, A namɛ ni Naiot ata namɛ na cɛnjɛ tu Rama.

²³Ti bee beni apata, bɛɛ zhɛ Naiot ata namɛ nu Rama, ibɛ Mpiala ma Agwatana mi kezhe mee ubi bu du, bee kwuni du tigesere tụdụma apata tutu bee ci Naiot ata.

²⁴Bee ushiji tugwuno tu bwa bee kwuni du tigesere tụdụma ne eshe Samuɛl. Bee shiri mohondo uuwa gụ ụrụmɛ, uuwa gi iyi yo holo. Ibɛ atwa a duma ya te kwuni na aka ata, ɛɛ hiɛŋ, Go Soul suu namɛ du na ashashɛ egesere?