Read bassa 1 SAMUƐL UHIIŊ 28 Bible Online

1 SAMUƐL UHIIŊ 28 - bassa bible

1 SAMUƐL UHIIŊ 28

¹Na aka ata ibɛ Afilistia sotulonu ejeshi aba maa a sukakanɛ atwa Isrɛl nu ujasa. Ga Akish hiɛŋ Devid, Mapa maa gabụ na atwa bụ hi zhɛ hia nama geri tu nu ujasa tɛnda.

²Ge Devid jishijɛ bụ, bɛɛ hiɛŋ, Iwɛ-tɛkana ga, bi zhɛ ba kwụba kaa iyi nɛ yɛu gɛ bụ ugondu eri ya nda. Ga Akish hiɛŋ Devid, I zhɛmɛ tebiye! Asha gabụ Ngɛɛ zhɛ ma nda bi'iywa mi tutu tu'wo tụ bụ.

³Ga Samuɛl uwo ya na aka ata, atwa Isrɛl hwɛɛ towo-ụkwụla ubwa, oo nuwoŋ bu nụ ụshɛpwụ ubwa Rama. Go Soul du kaa bocingwo anjɛ-tuwa elele te egesere tuwa hwɛɛ na cɛnjɛ ta ata.

⁴Ejeshi Afilistia sotulonu ee jwe ugba wa aba to dongonu ụshɛpwụ ata ɛɛ hiɛŋ Shunem. Go Soul sotulonu du atwa Isrɛl hwɛɛ aba ee jwe ugba wa aba ni Ishɛmɛ Giboa.

⁵Aka na tu go Soul kwụbɛ ejeshi Afilistia, inyɛsɛ shɛ bụ, ohwulu herikeni bu duwa.

⁶Ibɛ po bee heŋteni AGWANGWAMA gana na i shɛ maa nda. Ama AGWANGWAMA jɛshɛjɛ shɛ bụ kwukwuŋ, okwo nụ ụwalabụ, kwo kaa nu Urim tu'waŋ kwo kaa ne egesere o.

⁷Go Soul hiɛŋ anjɛ-ugondu ubwa, N dwelekekeni ma biyikwo na shɛ bukwupenyi maa Ma zha mo hoŋtono bu iwɛ mi. Ibɛ po anjɛ-ugondu ubwa jishijɛ bụ, ɛɛ hiɛŋ, Hioko, bu ko namba ni Ɛndo.

⁸Go Soul meme sheyinji, bee urigeni i'wɛŋnɛ inyɛ, bee suji etwenyi ubwa eyebi baa sanɛ na aba no ofwo biyikwo ata nụ ụjita. Bɛɛ hiɛŋ biyikwo ata, N ndanɛ tishino maa m bacɛnganɛ bụtụ be elele na Ngaa bu suyananɛ hwayɛ izeci ibwɛ.

⁹Biyikwo ata jishijɛ bụ, bɛɛ hiɛŋ, Bi mepi tebiye iyi nɛ agwuma Soul njɛ na cɛnjɛ tu ga, gana na baa kwụnua la anjɛ-tuwa keeni egesere tuwa elele na cɛnjɛ tu ga hwɛɛ. Iwembe po obu mo bitono modugwulo maa a n kwụnɛɛ?

¹⁰Go Soul shileni biyikwo ata unu ni izeci ya AGWANGWAMA, bɛɛ hiɛŋ bụ, M bi teji AGWANGWAMA, maa i zasa ulwapɛ we elele kwukwuŋ zhɛ mo bu jitono iwɛ ijɛ.

¹¹Nazhɛ biyikwo ata heŋteni Soul, bɛɛ hiɛŋ, Gaaba kwuŋ aba jala maa Ma bụ bacɛnganɛɛ? Go Soul jishijɛ bụ, bɛɛ hiɛŋ, M bacɛnganɛ Samuɛl.

¹²Aka na te biyikwo ata kwụbɛ Samuɛl. Bee keri n'ungwa taawụụ, bɛɛ hiɛŋ Soul, Iwembe po ebi n helekecii? Mashaka gabụ bɛ shɛ go Soul!

¹³Agwuma hiɛŋ biyikwo ata, Ta nda inyɛsɛ o! Imbe abụ kwụbɛɛ? Bɛɛ jishijɛ Soul, bɛɛ hiɛŋ, N kwụbɛ bụtụ be e'uye bu ko tu bee mwe na cɛnjɛ.[63]

¹⁴Go Soul hiɛŋ biyikwo ata, Gana naa kwuŋ baa shɛɛ? Biyikwo ata jishijɛ Soul, bɛɛ hiɛŋ, Bɛ shɛ iyɛri, bee ci ụbanụ, bee meme kwungure nu utogwo. Go Soul mepi ya maa ga Samuɛl ta. Bee kwuzhi na cɛnjɛ bee peni bu ụjɛrụma.

¹⁵Ga Samuɛl heŋteni Soul, bɛɛ hiɛŋ, Iwembe po abụ ma m pana tuzugaa? Iwembe po abụ m bɛcinjɛɛ? Go Soul jishijɛ Samuɛl, bɛɛ hiɛŋ, N namɛ ne tiriri tụ 'wụtụ. Iwɛnɛ po Afilistia ye n sugeni ujasa, Agwatana kaa n jineci ya, bu n jɛshɛjɛ shɛ ya okwo ne egesere kwo kaa na awalabụ o. Iwɛbɛ po Ngɛɛ bi bɛcinjɛ maa m mbishi iyi nɛ i shɛ maa Ma nda.

¹⁶Ga Samuɛl jishijɛ bụ, bɛɛ hiɛŋ, Iwembe po obu to mo hoŋtono iwɛɛ? Ta abu kwụbwa maa AGWANGWAMA ubu jinokwo, baa shɛwa bụtụ bi i'ime bu.

¹⁷AGWANGWAMA ubu nduwa gana na tu baa n tumwanɛ la maa Mo bu mbiso. Iwɛnɛ po AGWANGWAMA loshigwo cɛnjɛ-ta-tugwama ni i'ɛlɛ bu boo pwonuo binya bu ge Devid.

¹⁸Gabụ bụ lacɛ maa hwụjɛ-unu na AGWANGWAMA ubi peni maa iricinji la atwa Amalɛk hwɛɛ keeni iyi elele nɛ aa 'yajɛ. Iwɛbɛ po AGWANGWAMA ma bu nda ijɛ hwuwayɛ ya.

¹⁹Shɛ inɛ ɛtɛ kiri o, AGWANGWAMA zhɛ mo bu utogo Afilistia maa e bi teni u'ala. Beyi ga, tụ gabụ ta miaụŋ mụ bụ me eyi, hi zhɛ hia zhajɛ pi mi. AGWANGWAMA zhɛ o lono maa ejeshi Afilistia e eri ejeshi atwa Isrɛl maa e teni aŋ u'ala du.

²⁰Na aka ata go Soul leyi ya bee weci na cɛnjɛ kpanana, inyɛsɛ shɛ bụ duwa iwɛ n-ndumwa ma ata ga Samuɛl mbishi bu. Ubwa du kaa zasa ya okwo ukpahiŋ o, iwɛnɛ tu baa yɛ shɛ iyimɛyɛ, te kwuni nu uwaŋna ata tutu iyi heri.

²¹Biyikwo ata zhajɛ, baa kwụbɛ to ohwulu o horoko Soul, bɛɛ hiɛŋ Soul, Hioko, N nge senji uraiŋ mu, Ngaa hwụjɛ-unu bu Gamba yɛu gɛ bu ugondu yo o, Ngaa njɛ iyi nɛ ebi n eni tɛnda.

²²Iwɛbɛ po Ama jala ma hwụjɛ ya du unu mu Gamba na n shɛ yɛu bu ugondu yo o. Me ci ba ma sala inɛmɛ ike maa Ma bu ndana iyimɛyɛ maa yɛ maa 'yaga ikɛnyi nu uhwaŋna tɛ ɛbi zhɛ ujiyo.

²³Go Soul lacɛ, bɛɛ hiɛŋ bụ, N zha shɛ ma ya iyi elele o. Ama anjɛ-ugondu ubwa, hwɛɛ te biyikwo ata uranjɛ bụ, nazhɛ bee leni unu wa aba. Ibɛ po bɛɛ ishijɛ na cɛnjɛ baa jɛjɛ no ogodo.

²⁴Biyikwo ata njɛ izɛlɛgwu baa kwụnɛ yɛu buna ike nɛ nyemi, bee ge umpi nu umwono ata ubwa. Bee seri inɛmɛ baa fwɛŋ baa njɛ ibrɛd nɛ zasa Ifucingɛ ni ibɛ.

²⁵Baa shapɛ iŋ bee shi na agba Soul keeni anjɛ-ugondu ubwa, aa yɛ. Nazhɛ ɛɛ ishijɛ ee hwuri ujiyo na amɛ ụjita ata ba.