Read bassa 1 SAMUƐL UHIIŊ 30 Bible Online

1 SAMUƐL UHIIŊ 30 - bassa bible

1 SAMUƐL UHIIŊ 30

¹Tɛ ɛ hiɛŋ jitaala, ta ata Devid ci Ziklag. Ibɛ atwa Amalɛk tefuleji atwa na namɛ tuta tu Juda keeni Ziklag nu ujasa, aa lasụ Ziklag, ee hwoŋzhinji uŋ nu ulwa.

²E suji te eyikwo keeni atwa elele na namɛ nụ ụshɛpwụ ata, ta atwa na gwụmwatangwụ, ta atwa na gembenji. Ama a kwụnɛ shɛ bụtụ be elele o, e suji aŋ buumwa buumwa ee hwuri.

³Aka na ti ge Devid na atwa ubwa ci ụshɛpwụ ata, aa kwụbɛ maa o hwoŋzhingwo uŋ, aa imwa du eyikwo aba ta miaụŋ ma aba me eyi ta mu na mo o, oo hwulwo.

⁴Ge Devid na atwa ubwa suji rụhwụŋ ra aba na azuba aa cwɛ-u'wo uuwa i ci aka na ee lukwumenji, ee eri shi a twa ya.

⁵Ee suji du eyikwo Devid eyebi, ga Ahinoam yɛu ya atwa Jɛzrɛl keeni Abigail bululo Nabal bụtụ ata bu Kamɛl.

⁶Ama ge Devid namɛ ne tiriri tụ 'wụtụ, iwɛnɛ ta shɛmɛ sha atwa shɛ hashaganụ tebiye iwɛ miaụŋ ma aba me eyi na mu na mo o mu na ee suji. Ibɛ po atwa ata o zwono bu inyɛsɛ, ɛɛ hiɛŋ ɛ zhɛ a tagana bụ atayɛ. Ama AGWANGWAMA na shɛ Agwatana ubwa a ta bụ tuba ikɛnyi.

⁷Ge Devid hiɛŋ Abiata bunongbo ata shɛ yɛu Ahimɛlɛk, N shapɛrɛganɛ idikɛ ɛtɛ i tikpɛngbɛ. Ga Abiata shapɛrɛganɛ ga Devid idikɛ ɛtɛ.

⁸Ge Devid heŋteni AGWANGWAMA, bɛɛ hiɛŋ, Ma 'wa hŋ ejeshi ga? N zhɛ mo jitono aŋ hŋ? AGWANGWAMA jishijɛ bụ; bɛɛ hiɛŋ, Zhaga urugono aŋ, bi zhɛ bo jitono aŋ tilɛɛ, bi zhɛ kaa bɛ lɛshijɛ atwa ata aa 'imɛ.

⁹Ge Devid na atwa ubwa akpakwụ-atatụ a na namɛ nu bwa ishijɛ aa sanɛ ga. Ee zhe ee ci isese Biso, ibɛ atwa aba oko a na lɛ ekwunyi zokwu apata.

¹⁰Ama ge Devid na atwa vwɛ akpakwụ-eyebi to tuhwulo aa 'wa atwa ata, atwa kpakwụ tuba kwu ne ekwunyi, iwɛnɛ te e lukwumenji tebiye, e eri shi a kasha ya isese ɛtɛ Biso.

¹¹Nazhɛ atwa na zhagajɛ ne Devid kwụbɛ bụtụ bi Ijipti bu ko ne ehilo, ɛɛ zɛrijɛ bụ no ofwo Devid. Ee peni bu iyimɛyɛ baa yɛ, ee peni bu meni bee swe,

¹²ta akara tụ'walụ to owowo keeni tu'unto ta tụ'walụ ta afwafwa tu hwoo. Aka na tu baa yɛ ijɛ hwɛɛ, nazhɛ eshe ubwa kezhe, iwɛnɛ tu baa ga ta yɛ shɛ iyimɛyɛ i ci iwɛŋnɛ itɛtu keeni irụmɛ itɛtu tukwugwu.

¹³Ge Devid heŋteni bu, bɛɛ hiɛŋ, Gaaba kwuŋ ubu 'yajɛɛ? Cee kwuŋ abụ banɛɛ? Bụtụ ata jishijɛ bụ, bɛɛ hiɛŋ, Bijipti Ngaa shɛ, Ngaa shɛ yɛu-ugondu Amalɛk. Agwuma-ihwɛ mi n genji ne ekwunyi, iwɛnɛ tu u'waba n hwuwi shi te kwune taa jita neshi na hwayɛ.

¹⁴Bɛɛ hiɛŋ, Ti tefuleji la atwa cɛnjɛ ti Kɛrɛt a na namɛ tuta tu Juda keeni udenji Kalɛb, etu hwoŋzhinji du Ziklag hwɛɛ.

¹⁵Ge Devid heŋteni bu, bɛɛ hiɛŋ, Bi eri bu ma n zarɛga no ofwo ejeshi ata hŋ? Bɛɛ hiɛŋ Devid, Yaa shɛ ebi n teji Agwatana maa bu zha shɛ bu ma n kwụna o, abụ zha shɛ kaa du bu mo gwuricingono agwuma-ihwɛ mi, asha N zhɛ ma bu zarɛga no ofwo ejeshi ata.

¹⁶Ibɛ po bụtụ ata zeriji ga Devid ee zhe apata, aa kwụbɛ ta atwa ata mburusonu na cɛnjɛ ta ata hwɛɛ, aa ya, aa swa, aa hiɛba tɛhiɛba, iwɛnɛ te e suje ufwa ụ'wụtụ nu ujasa ata aa njɛ na Afilistia keeni cɛnjɛ tu Juda du.

¹⁷Ge Devid kwuni aŋ tụkwụna ti iyi ye suje tutu ụrụmɛ iyi tuholo na 'wa uŋ. I zasa bụtụ aba okwo bu ko na benengeni o, semi esemberi oko akpakwụ-eyebi a na munji nruhondo ma aba gezhiji, asha aba kiri benengeni.

¹⁸Ge Devid lɛshijɛ iyi elele nɛ atwa Amalɛk ge suji la hwɛɛ, te eyikwo ubwa eyebi.

¹⁹I zasa iyi elele nɛ kwu, ti inɛ ticwɛŋ, ti inɛ i'wɛtwɛ, ta miaụŋ-me-eyi, ta miaụŋ-mo-o ma atwa ubwa, tu ufwa ujasa we elele na atwa Amalɛk ge suji la o, ge Devid gwuricinje iyi elele kpaaŋ.

²⁰Ge Devid du suje iyimabiga ye elele hwɛɛ keeni inɛ, ibɛ po atwa ubwa sụcɛ iyimabiga ata ee hwuleni aŋ umbe. Aa duma, ɛɛ hiɛŋ, Ufwa ujasa na ge Devid suje na.

²¹Ge Devid zhe bee ci atwa ala kpakwụ, a na kwu la ni isese Biso, iwɛnɛ te e lukwumenji duwa, ee eri shi a 'wa la Devid. Aka na ti ge Devid bo gwumwongonu na aba, ɛɛ tɛjɛ ata Devid na atwa na zhagajɛ nu bwa uhwaŋna, ge Devid du 'walụ aŋ tebiye.

²²Nazhɛ atwa oko tuwumanga keeni atwa tusashɛ a na zhe la ne Devid hiɛŋ, Ti zha shɛ ta pana aŋ hwayɛ ufwa we elele na etu suje o, iwɛnɛ te e zhe shi la, semi asha eyikwo aba keeni miaụŋ ma aba kiri bụtụ bụtụ zhɛ ba shapa bo hwulo.

²³Ama ge Devid hiɛŋ aŋ, A-miaụŋ-mo-bino mi, hiɛ shɛ shɛ hia nda gana ata ni iyi nɛ AGWANGWAMA iti peni o! Ubwa iti bicinji, bee leni ma ta lasụ ejeshi ata ga tu sukakanɛ.

²⁴Gaaba zhɛ bo lono n-ndumwa mu ga mi hiiŋ? Iwɛnɛ po gana na ta bụtụ na ge zhe ujasa 'yajɛ, gobwonu du bụtụ na ga ngbaracɛ i'wɛŋnɛ shɛ ba 'yaga. Dwotwogonu iŋ ma hwɛɛ ta nangatagwụ.

²⁵Te kwuni nụ ụjita ata ibɛ ge Devid shiri undwa keeni okpogo ata. Atwa Isrɛl kaa ta untanganɛ uŋ tutu taa hwayɛ.

²⁶Aka na ti ge Devid ci Ziklag, baa tumwananɛ eyejilo ubwa a na shɛ n-nyarɛ mu Juda i'wɛŋnɛ ɛtɛ ike, bɛɛ hiɛŋ aŋ, Urobwo hiŋ na banɛ nu ufwa ujasa wa atwa i'ime AGWANGWAMA ta.

²⁷Baa tumwananɛ iŋ atwa Bɛtɛl, na atwa Ramot a na namɛ tuta ti Jati,

²⁸keeni atwa na namɛ na Aroe, na atwa na namɛ ni Sifimot keeni atwa na namɛ ni Ɛshitɛmoa,

²⁹na atwa na namɛ nu Rakal, na atwa na namɛ na ashɛpwụ Ajɛramɛil keeni ashɛpwụ Ekin,

³⁰keeni atwa na namɛ nu Homa, na atwa na namɛ nu Borashan, na atwa na namɛ ne Etak,

³¹na atwa na namɛ ni Hibron. Bu tumwanganɛ iŋ no ofwo elele na boo dulwogwo la na atwa ubwa hwɛɛ.