Read bassa 1 SAMUƐL UHIIŊ 4 Bible Online

1 SAMUƐL UHIIŊ 4 - bassa bible

1 SAMUƐL UHIIŊ 4

¹Aka elele na ga Samuɛl jɛmɛ iwɛ, atwa Isrɛl a shɛlaga iwɛ ubwa hwɛɛ aba. Na aka ata ibɛ atwa Isrɛl beni maa a njɛ ujasa na Afilistia. Ee zhe ee jwe ugba wa aba nɛ Ɛbɛnɛzɛ, Afilistia tuba jwe una wa aba ugba ne Efɛk.

²Afilistia keleni atwa Isrɛl bụkpagwụ, ee peji aŋ agba. Aka na tu ujasa vwi eshe, Afilistia kwụnɛ atwa Isrɛl gana atwa igbɛɛ-iyebi (4,000) ne ehilo ujasa.

³Aka na ta asaza na vwɛ gwure nu ugba wa aba, ehwurembe atwa Isrɛl hiɛŋ, Imbe po AGWANGWAMA leni maa ga Afilistia utu lasụ hwayɛ ga gana gaa? Hwure tɛ shapɛ ma Ikpɛtɛ Unu-tutwa ya AGWANGWAMA nu Shailo iwɛ maa i nama[12] na ashashɛ tu, iwɛ maa iti lesheji ni i'ɛlɛ ya atwa i'ime tu.

⁴Nazhɛ atwa ata tumwanɛ ga atumwa a na zhe Shailo, aa shapɛ ga Ikpɛtɛ Unu-tutwa ya AGWANGWAMA na Hwuri Kpaaŋ, ubwa na jɛjɛ na ashashɛ iyi-uumwa ya apiambɛ ɛtɛ iyebi. Ibɛ miaụŋ mi Ilai mi yebi, go Hofini ne Finihas mu 'waŋnɛ Ikpɛtɛ ɛtɛ Unu-tutwa ya Agwatana, aa zhajɛ ni ibɛ.

⁵Aka na ti Ikpɛtɛ ɛtɛ Unu-tutwa ya AGWANGWAMA ci ugba ata, nazhɛ atwa Isrɛl hwɛɛ uganɛ n'ungwa mu unyasa taawụụ, harɛ cɛnjɛ tɛ njɛ bulama.

⁶Aka na ta Afilistia hwụjɛ n'ungwa ma ata, ɛɛ hiɛŋ, Imbe po Ehibru a kala n'ungwa mi ci gana goo? Aka na te e hweyigeni, ee mepi ya maa Ikpɛtɛ Unu-tutwa ya AGWANGWAMA ibɛ pushe nu ugba we Ehibru.

⁷Ibɛ po inyɛsɛ shɛ Afilistia, ɛɛ hiɛŋ, Adooyi, ebe ti meni! Agwatana oko teni ba nu ugba ata. Iyi gɛnɛ gɛ ga ta tɛ njɛ shɛ la kwukwuŋ!

⁸Ebe ti meni! Gaaba eri ma tu lashaga na tuwa tu ga tu ukpahiŋ ụ'wụtụụ? Tuwa tu gana na la tụ kwụnɛ atwa Ijipti nụ ụshɛka ne tishikpe tu ufwugwo!

⁹Ahiɛba Afilistia, nda ma ohwulu hiŋ oko ma hiɛ njɛ teleyi maa kede tɛ shɛ ma ajama Ehibru gana na aa shɛ la ajama tu o. Mama 'imɛ ma maa hiɛ njɛ teleyi nu ujasa ga.

¹⁰Afilistia shanɛ ikɛnyi nu ujasa ata, aa lasụ atwa Isrɛl, ibɛ po atwa Isrɛl gezhiji ee ji nu nhwaŋ ma aba. Atwa na aa kwụnɛ jita ata shɛ shɛ atwa iyɛrɛ o. Asaza atwa Isrɛl a na a zha tahaŋnụ ni ivwunɛ a na aa kwụnɛ jita ata a shɛ atwa igbɛɛ-umpwa-ni-bɛ-tɛ (30,000).

¹¹Ee leshiji Ikpɛtɛ Unu-tutwa ya Agwatana, aa kwụnɛ miaụŋ mi Ilai mi yebi, go Hofini ne Finihas.

¹²Bụtụ bu ko na shɛ ụlamụ Bɛnjamin banɛ ne ehilo ata ujasa jita ata gom, bee gezhije bee gwure nu Shailo. Tugwuno tu bwa tu dwatwagwụ hwɛɛ, baa ulwa ahwayɛ nu uhiuhiu ubwa hwɛɛ iwɛ amɛ-tụhaŋtụ na baa 'yajɛ.

¹³Aka na ta bụtụ ata pushe, ge Ilai ta kaa jɛjɛ ni iyi bɛjɛjɛ nɛ shi nụ ụzalụ uhwaŋna, baa ngbarakacɛ uhwaŋna, iwɛnɛ to ohwulu o horoko bu, iwɛ Ikpɛtɛ ɛtɛ Unu-tutwa ya Agwatana. Gana na ta bụtụ ata teni nụ ụshɛpwụ ata, baa jɛmɛ unabarɛ gana na tu ujasa shɛ. Ibɛ po inyɛsɛ shɛ atwa ụshɛpwụ ata hwɛɛ, bụtụ bụtụ keri n'ungwa.

¹⁴Aka na ti ge Ilai hwụjɛ u'wo ata, bee heŋteni, bɛɛ hiɛŋ, Imbe kwuŋ njɛ atwamwa aa twa-u'wo gana goo? Ibɛ bụtụ ata zhe kakayɛ bee mbishi Ilai unabarɛ gana na tu ujasa ata shɛ.

¹⁵Ge Ilai kaa ulwa ya shiywa dupu-na-buhanda-na-shɛba-shɛ-tụndatụ (98) te e meci bu na aka ata, bụ kwụbɛ shɛ ya kaa du uhwaŋna tebiye o.

¹⁶Ibɛ bụtụ ata mbishi Ilai, bɛɛ hiɛŋ, Ne ehilo ujasa bana Ngaa bananganɛ hwayɛ ga, Ngee gezhije tutu epe. Ge Ilai heŋteni bu, bɛɛ hiɛŋ, Ɛ-yɛu mi, gana na ujasa ata shɛɛ?

¹⁷Butumwa ata mbishi Ilai, bɛɛ hiɛŋ, Atwa Isrɛl gezhigeni Afilistia. Tụkwụna tu na aa kwụnɛ atwa tu, tu hwuleji! Shɛ inɛ ɛtɛ kiri o, ehilo yɛ miaụŋ mụ bụ mi yebi, go Hofini ne Finihas, ee leshiji du Ikpɛtɛ Unu-tutwa ya Agwatana!

¹⁸Aka na ta bụtụ ata teyinje iwɛ Ikpɛtɛ ɛtɛ Unu-tutwa, ge Ilai bɛzhɛrungwa ni iyi nɛ baa ga jɛjɛ bee leyi mabaaba geri bo odubo ata ụshɛpwụ. Ubwa kaa injɛ ya, bee nyemi du kaa, ibɛ po ulayɛ ata dwonu bu i'ilu, bee 'wi. Bi 'yagajɛ atwa Isrɛl shiywa buhanda (40).

¹⁹Utashɛ Ilai na shɛ biyikwo Finihas, ga 'yajɛ ofubo, aka tumata tu bwa kaa du go gwumwonu. Aka na tu baa hwụjɛ unabarɛ maa e leshiji ba Ikpɛtɛ Unu-tutwa ya Agwatana, maa bishi bwolo bwa keeni bwolo bwa kaa du 'weeneni ba, ụngwụ tumata to bu gunu ata ko, bee kwuzhi bee meci.

²⁰Gana na ti bɛɛ zhɛ ya tu'wo, eyikwo ata na untanganɛ bụ, hiɛŋ bụ, Ta nda inyɛsɛ o, yɛu-ye-eyi ebi meci! Ama bɛ jɛshɛjɛ shɛ aŋ ya o, iwɛnɛ ti bee mepi shi ya okwo a njɛ ba nu bwa!

²¹Ibɛ po oo po yɛu ɛtɛ izeci ti ga Ikabod,[13] bi hiɛŋ, Ụjɛrụma pashɛngwa atwa Isrɛl. Ibɛ shɛ iwɛ Ikpɛtɛ ɛtɛ Unu-tutwa nɛ ee leshiji keeni iwɛ tu'wo te bishi bwolo keeni tu'wo to bwolo bwa du.

²²Bɛɛ hiɛŋ, Ụjɛrụma pashɛngwa nu uhiuhiu wa atwa Isrɛl, iwɛ Ikpɛtɛ ɛtɛ Unu-tutwa ya Agwatana ee leshiji.