Read bassa 1 SAMUƐL UHIIŊ 7 Bible Online

1 SAMUƐL UHIIŊ 7 - bassa bible

1 SAMUƐL UHIIŊ 7

¹Gabata atwa Kiriat-jiarim shepi ga Ikpɛtɛ ɛtɛ ya AGWANGWAMA ee shi iŋ nu umwono bụtụ bu ko na patanɛ ni ishɛmɛ, ɛɛ hiɛŋ ga Abinadab. Aa njɛ yɛu ibwɛ ye eyi gɛ Ɛleaza tijilo iwɛ maa bu na ngbaraka Ikpɛtɛ ɛtɛ ya AGWANGWAMA.

²Ikpɛtɛ ɛtɛ ya AGWANGWAMA shi ni Kiriat-jiarim te ilegeji i ci shiywa woshi. Atwa Isrɛl hwɛɛ twanɛ AGWANGWAMA u'wo tebiye maa mbiyono aŋ.

³Ga Samuɛl hiɛŋ atwa ihwɛ Isrɛl hwɛɛ, Yaa shɛ ɛhi zhɛ hie gwure no ofwo AGWANGWAMA na ahaŋsa hiŋ oko hwɛɛ, asha 'waŋ ma tuwa ta ata ta anya edenji keeni ntatanuwaŋ ma ata ɛɛ hiɛŋ, Ashtarot, maa hi peni AGWANGWAMA shɛmɛ shi hiŋ hwɛ hwɛɛ maa ga shɛ ubwa kiri ahia zhɛba. Nazhɛ bɛɛ zhɛ ma hi lashɛga ni i'ɛlɛ ya Afilistia.

⁴Ibɛ po atwa Isrɛl 'wɛŋ ga ntatanuwaŋ ma ata mu tuwa ta ata ɛɛ hiɛŋ Beal keeni mu na mu tuwa ta ata ɛɛ hiɛŋ Ashtarot, aa zhɛba ya AGWANGWAMA kiri.

⁵Ga Samuɛl hiɛŋ, Sotulonu ma atwa Isrɛl hwɛɛ ni Mizpa, maa Ma ndana aŋ adua no ofwo AGWANGWAMA apata.

⁶Aa ụlwatagwụ ga ni Mizpa, aa salajɛ meni aa 'wɛŋ na cɛnjɛ, ibɛ shɛ upwaŋ na ee peni AGWANGWAMA, aa njɛ ezumi apata jita ata uuwa uwaŋna teni. Aa jɛmɛ apata, ɛɛ hiɛŋ, Tɛ njɛ AGWANGWAMA iwɛwɛ. Ga Samuɛl jɛmɛ ụshɛrɛya wa atwa Isrɛl ni Mizpa ata.

⁷Aka na ta Afilistia hwụjɛ maa atwa Isrɛl sotulonu ba ni Mizpa, ehiu Afilistia na atwa aba zhe maa a sukakanɛ atwa Isrɛl. Aka na ta atwa Isrɛl hwụjɛ iŋ, inyɛsɛ shɛ aŋ.

⁸Ibɛ po atwa Isrɛl hiɛŋ Samuɛl, Ta ganga AGWANGWAMA na shɛ Agwatana tu tutabwa iwɛ tu o, iwɛ maa mo tu bicingo ni i'ɛlɛ ya Afilistia.

⁹Ibɛ po ga Samuɛl shepi yɛu-ụgwụdụ na to subo bee peni AGWANGWAMA ụrụpɛ tuhwoŋzhingo hwɛ hwɛɛ. Nazhɛ baa njɛ adua pa AGWANGWAMA iwɛ atwa Isrɛl, ibɛ po AGWANGWAMA jishijɛ adua ubwa.

¹⁰Tu ga Samuɛl ta ta ụrụpɛ ata tuhwoŋzhingo, ibɛ Afilistia sure maa a sukakanɛ atwa Isrɛl nu ujasa. Gunu ata AGWANGWAMA keleni Afilistia uto uko ụ'wụtụ na azuba. Ibɛ po tusukwutogwu tɛ 'imɛ aŋ hwɛ hwɛɛ, ee gezhigeni atwa Isrɛl.

¹¹Nazhɛ atwa Isrɛl beni ni Mizpa ee urigeni Afilistia nu usumwa, aa kwụna aŋ nu uhwaŋna ata tutu i ci tuta tu Bɛtika.

¹²Ga Samuɛl shepi utayɛ uko bee shikicinji uŋ na ashashɛ Mizpa ni Shen, boo po uŋ izeci, bɛɛ hiɛŋ, Ɛbɛnɛzɛ.[15] Bi hiɛŋ, AGWANGWAMA ubwa iti mbiyeni tutu.

¹³Gana atwa Isrɛl lasụ Afilistia ta, e teni shi ya cɛnjɛ ta atwa Isrɛl kwukwuŋ. Gobwonu kaa du isɛbwɛ ya AGWANGWAMA ya sukakana Afilistia uuwa ga Samuɛl to 'wo.

¹⁴Atwa Isrɛl leshigeneni ashɛpwụ elele na Afilistia lesheji la ni i'ɛlɛ ya aba, te kwuni ni Ɛkron tutu i ci Gat. Atwa Isrɛl leshigeneni cɛnjɛ ta aba na Afilistia hwɛɛ. Ibɛ po amɛ-olom du namɛ ya na ashashɛ atwa Isrɛl na A'amo.

¹⁵Ga Samuɛl jɛmɛ ụshɛrɛya wa atwa Isrɛl tutu tu'wo tu bwa.

¹⁶Uywa we elele rinje bo rungo Bɛtɛl, ni Gilgal keeni Mizpa, bu na kwunangana atwa Isrɛl ashɛrɛya aba na ashɛpwụ ata.

¹⁷Nazhɛ bo gwulo nu Rama, iwɛnɛ po apata shɛ ihwɛ ibwɛ. Ba dumangana du atwa Isrɛl ashɛrɛya tiririri apata. Apata du kaa bee meni AGWANGWAMA utukwu-ụtụpɛ.